Уæрæсейы пост уадзы акци, кæцымæ гæсгæ ветерантæ дыууæ къуырийы дæргъы телтæ æрвитдзысты æнæаргъæй. Акци уагъд цæуы Стыр Уæлахизы боны цытæн.

25 апрелæй 10-æм маймæ Стыр Фыдыбæстæйон хæсты хайадисджытæ æмæ инвалидтæн сæ бон уыдзæн æнæаргъæй телтæ æрвитын æмæ телефоны дзурын куыд Уæрæсейы, афтæ æввахс фæсарæнты бæстæтæм дæр. Сæ бон фæдзурын уыдзæн Уæрæсейы посты хайадты. Федералон посты операторы пресс-службæйы хъусынгæнинагмæ гæсгæ сæрмагонд уавæртæ аразынц Уæрæсейы пост æмæ «Ростелеком».

Ветерантæн сæ бон уыдзæн телтæ арвитын Украинæ, Беларуси, Молдави, Казахстан, Узбекистан, Таджикистан Хъыргъыстан, Туркменистан, Азербайджан, Сомихстон, Гуырдзыстон, Абхаз, Латви, Литвæ, Эстони æмæ Хуссар Ирыстонмæ, афтæ ма сæ бон уыдзæн уыцы бæстæты стационарон æмæ мобилон телефонтæм фæдзурын.

Хатыртæ лæвæрд цæуынц Стыр Фыдыбæстæйон хæсты ветеран кæнæ инвалиды статус бæлвырдгæнæг документ бавдисгæйæ.

Уæрæсейы пост æмæ «Ростелеком» æрвылаз дæр ауадзынц Стыр Фыдыбæстæйон хæсты Уæлахизы боны цытæн мадзæлттæ. Ахæм æмгуыстады руаджы Уæрæсейы цæрæг ветерантæн сæ бон свæййы фæдзурын се ‘мтохгæнджытæм, сæ хæлæрттæм æмæ хиуæттæм.

Comments are closed, but trackbacks and pingbacks are open.