16-æм июны Хæсты, куысты, гарзджын тыхты æмæ барадхъахъхъæнæг органты, Ветеранты (пенсиисджыты) республикон совет фæстаг фондз азы цы куыст бакодта, ууыл дзырд цыдис, цы конференци ауагътой, уым.
Хыгъдон доклад сарæзта Ветеранты республикон советы сæрдар Бесаты Вячеслав.
Дарддæр уый цыбыртæй æрдзырдта, нæ республикæйы царды хорзæрдæм цы ивындзинæдтæ цæуы, уыдоныл. Æмæ уыдон та къухы æфтынц республикæйы разамынады архайды руаджы.
Хуыздæр скъуыддзаг цыдысты, Ветеранты республикон советы раз цы хæстæ лæууыдысты, уыдон дæр.
Хыгъдон рæстæджы Ветеранты совет æмæ Советы президиум сæ рабадтыты уынаффæ кæнынмæ хастой, сæ разы цы ахсджиаг хæстæ лæууыд, уыдон. Докладгæнæг сæрмагондæй æрдзырдта, афтæхуыйнæг «оппозицион къорд» æндæр æмæ æндæр инстанцитæм цы хахуыргæнæн хъæстытæ фæфыссыны, уый фæстæ ветеранты республикон организацийы цы ситуаци сæвзæрыд, ууыл. Йæ ныхæстæм гæсгæ ветеранты иу къорд фыста алыгъуызон организацитæм хъæстытæ, цыма организаци æмæ йæ сæрдары архайды ис цухдзинæдтæ. Хъаст кодтой, цыма цухдзинæдтæ ис финансон-хæдзарадон архайды, зæгъгæ, организацийы устав дзуапп нæ дæтты РХИ-йы закъæттæн, æгæрыстæмæй ма дзырдтой, зæгъгæ, организацийы сæрдар архайы РХИ-йы Президенты ныхмæ.
Фæлæ къорд басгæрстыты фæстиуæгæн ницы цухдзинæдтæ разынд организацийы архайды.
Ацы фарстыл æруынаффæ кæныны фæстиуæгæн йæ бынатæй ист æрцыд Ветеранты республикон советы сæрдары фыццаг хæдивæг. Ветеранты совет ма йæ организацийæ рацух кодта æртæ адæймаджы, устав кæй хæлдтой, уый тыххæй.
Ветеранты советы сæрдар куыд банысан кодта, афтæмæй организациты куысты ахс-джиагдæр здæхтытæй иу у ветеранты æппæт категориты хынцын. Абоны бонмæ организацийы хыгъды сты Стыр Фыдыбæстæйон хæсты хайадисджытæ, фæсчъылдымы 63 архайæджы, куысты 1045 ветераны, æфсæддон службæйы 12 ветераны, мидхъуыддæгты министрады 44 ветераны, Стыр Фыдыбæстæйон хæсты хайадисджыты 44 идæдзы, Венгрийы цауты 20 хайадисæджы, Афганис-таны хæсты 108 ветераны – хайадисæджы æмæ æфсæддон службæйы 7 инвалиды.
Конференцийы хайадисджытæ, иу уысм æмырæй алæугæйæ, сæ рухс нæмттæ ссардтой, сæ цардæй чи ахицæн сты, уыцы ветерантæн.
Ветеранты организаци, Бесайы фырты ныхæстæм гæсгæ йæ куыст аразы йæ уставмæ гæсгæ. Æмæ йæ сæйраг нысан у ветеранты закъонон бартæ хъахъхъæнын, æхсæнады сын аккаг уавæртæ ифтонг кæнын æмæ сын сæ удварнон домæнтæ æххæст кæнын.
Ветеранты республикон организациты сконды сты иу горæтон æмæ цыппар районон организацийы, 61 райдиан ветеранон организацийы.
Организаци æхсæнадон контроль æххæст кæны «Ветеранты тыххæй» РХИ-йы закъон æмæ æндæр закъондæттынадон акттæ куыд æххæст цæуынц, уый фæдыл. Æмæ сæ исты цухдзинад куы рабæрæг вæййы, уæд йæ иуварс кæныны тыххæй бахаты республикæ-йы æмбæлон структурæтæм.
Ивгъуыд аз Стыр Уæлахизы бæрæгбоны агъоммæ кæд коронавирусон инфекци йæ тæккæ карзыл уыд, уæддæр организаци сифтонг кодта æмæ хæсты ветерантæн лæвæрд æрцыдысты материалон лæвæрттæ æмæ «Стыр Фыдыбæстæйон хæсты уæлахизы 75 азы» майдантæ. Афтæ ма хæсты хайадис-джыты номхыгъд бавдыста æхгæд акционерон æхсæнад «Остелеком»-мæ æмæ сын сæ хыгъдтæм ахыгъдта фæйнæ 5 мин сомы.
Хæсты ветерантæн материалон æххуыс бакæнынц РХИ-йы Президент Бибылты Анато-ли, тæрхондонон приставты службæ, РХИ-йы УФ-йы минæварад, Россотрудничество, 4-æм æфсæддон базæ, РХИ-йы УФ-йы Арæн-гæрон управлени.
Стыр Уæлахизы 75 азы нысан кæныны рæстæджы хæсты 13 хайадисæгæн Бибылты Анатоли радта фæйнæ 75 мин сомы æмæ «Стыр Фыдыбæстæйон хæсты намысджын куысты тыххæй» майданæй хорзæхджын чи сты, фæсчъылдымы ахæм 10 архайæгæн та – фæйнæ 50 мин сомы.
Организацийæн цы магазин ис, «Ветеран», зæгъгæ, уый арендæйы дæттыны аргъ фæфылдæр 8 хатты æмæ ссис 40 мин сомы. Уымæй фадат фæцис ветерантæн материалон æххуыс бакæнынæн.
Ивгъуыд азы кæрон материалон æххуыс бачындæуыд иунæг пенсиисджытæн, иумæйагæй – 154 мин сомы. Уымæй размæ та хæсты дыууæ хайадисæгæн лæвæрд æрцыдис фæйнæ 10 мин сомы. Ветеранты организаци ахъаз кæны æхсæнады бæрзонд удварнон æргъадтæ фидар кæнынæн, ветерантæ хайад исынц фæсивæды патриотон хъомылады, дæттынц сæм куысты æмæ Фыдыбæстæйæн лæггад кæныны хуыздæр традицитæ. Хайад исынц хæстон цыртдзæвæнтæ æмбæлон уагмæ æркæныныл. Афтæ ма активон хайад райсынц паддзахадон бæрæгбонтæ æмæ зæрдылдарæн бонтæ уадзыны. Организаци æмгуыст кæны хъахъхъæнынады министрадимæ, уæлвæткон уавæрты министрадимæ, 4-æм æфсæддон базæимæ, арæнгæрон управленимæ, æнæниздзинад хъахъхъæнынады министрадимæ, фæсивæдон политикæ, спорт æмæ туризмы фæдыл комитетимæ.
Стыр Уæлахизы бонмæ цæттæ кæнгæйæ, республикæйы æппæт ахуырадон уагдæтты дæр уагъд цыдысты цытджын мадзæлттæ, кæцыты хайад истой хæсты ветеранты.
Фæстаг азты ветерантæ цыдысты республикæйы районтæм, æмбæлдысты ахуырдзау фæсивæдимæ, дидинджытæ сæвæрдтой Советон Цæдисы Хъайтартæ Остъаты Алекси æмæ Цхуырбаты Иваны, афтæ ма хæсты фæмардуæвæг хæстонты цыртыты раз. Уыцы фембæлдтыты скъоладзаутæ æвдыстой концерттæ ветерантæн.
Кæд ивгъуыд аз æмæ ацы азы райдианы дæр коронавирусон инфекцийы аххосæй ветеранты организацийы куыст æрнымæг, уæддæр Ветеранты совет æнæниздзинад хъахъхъæныны министрадимæ бацархайдта, цæмæй ветерантæ Нагутни æмæ Цæгат Ирыстоны хосгæнæн уагдæттæм æрвыст цыдаиккой. Ветерантæн се ‘нæниздзинадмæ гæсгæ зын кæй вæййы Цæгат Ирыстонмæ ацæуын æмæ сæ пенситæ райсын, уый хынцгæйæ, Ветеранты совет бахатыд РХИ-йы Парламентмæ æмæ Национ бангмæ, цæмæй сæ пенситæ исой ам, бынаты, банкоматты системæйы руаджы. Ацы фарст æвæрццагæй скъуыддзаг æрцыд. Куыст цыдис, цæмæй бынæттон пенси чи исынц, уыцы куысты ветерантæн лæвæрд цæуой льготæтæ. Уымæн æмæ бынæттон пенси къаддæр у Уæрæсейы пенсийæ. Ацы фарст дæр, æвæццæгæн, æввахс рæстæджы скъуыддзаг æрцæудзæнис.
Дарддæр Ветеранты советы сæрдар радзырдта, организацийы раз цы хæстæ лæууы, уыдоны тыххæй дæр.
Конференцийы ветеранты республикон организацийы финансон-хæдзарадон архайдыл документалон ревизийы акт бакастис контролон-ревизион къамисы уæнг Тадтаты Хаджумар. Уый куыд фехъусын кодта, афтæмæй контролон-ревизион къамисы сæрдар Пухаты Федр, йæхæдæг æмæ контролон-ревизион къамисы уæнг Буджиты Вадим ауагътой ревизи Ветеранты советы финансон-хæдзарадон архайды тыххæй 2016 азы 1 августæй 2021 азы 31 маймæ рæстæджы.
Конференцийы ма раныхас кодтой æмæ сæ бакæнгæ куысты фæстиуджытыл æрдзырдтой ветеранты горæтон советы сæрдар Джиоты Руслан, ветеранты районон советы сæрдæрттæ Дудайты Альберт, Гатыгкоты Мананæ, Дриаты Роберт, Гобозты Уасил, Афганы хæсты Ветеранты советы сæрдар Гуыцмæзты Мурат. Афтæ ма æвзæрст æрцыдысты мандатон къамисы уæнгтæ дæр. Фарсты фæдыл ра-ныхас кодтой Бестауты Азæ æмæ Уалыты Лидæ.
Кæронбæттæны хъæлæс дæттыны фæстиуæгæн Хæсты, куысты, гарзджын тыхты, барадхъахъхъæнæг органты, Ветеранты (пенсиисджыты) республикон советы сæрдарæй ногæй æвзæрст æрцыд Бесаты Вячеслав.
БЕСТАУТЫ Валя
Comments are closed, but trackbacks and pingbacks are open.