Токаты Мурзабег чысылæй сахуыр æмæ бауарзта зæхкусæджы уæззау куыст, фæлæ йæ фыд йæхи фæнд акодта, цæмæй йæ лæппу райстаид аккаг ахуырад Дзæуджыхъæуы. Ацы горæты лæппу æгасæй дæр йæхи снывонд кодта ахуырæн. Фæлæ сабыр цардæн æрцыд кæрон – райдыдта Стыр Фыдыбæстæйон хæст. Хæсты фыццаг бонты Мурзабег барвæндæй ацыд фронтмæ. Уæззау тохты Токайы фырт æртæ хатты фæцæф, фæлæ уæддæр йе службæ адарддæр кодта кæронмæ, кæцыйы фæстиуæгæн хорзæхджын æрцыд дыууæ орден æмæ бирæнымæц майдантæй. Мурзабегæн хæст фæцис Берлины, Рейхстаджы пырхæнты цур.
Фæсхæсты уæззау рæстæджы Мурзабег ногæй æрæвнæлдта зæххы куыстмæ. Уæдмæ йæ арвыстой Краснодармæ кæсаджы хæдзарад сахуыр кæныны тыххæй. Уыцы куыст кодта Чермены хъæуы колхозы дæр, цалынмæ 1985 азы æмбæлон улæфты нæ ацыд, уæдмæ. Уæд чи ахъуыды кодтаид, æмæ ацæргæ фронтоны ногæй хæцæнгарз райсыны сæр бахъæудзæн Райгуырæн бæстæ хъахъхъæнгæйæ? 1992 азы 31-æм октябры Чермены хъæумæ æрбабырстой мæхъæлон тыхæйисджытæ æмæ ирæтты хæдзæрттæ спиллон калдтой. Æхстыты хъæр æввахсæй-æввахс-дæр кодта Токаты хæдзармæ. Хъæбатыр ветеран сывæллæттæ æмæ зæрæдтимæ Ольгинскмæ али-дзыныл цæхгæр не сразы, йæ сæрмæ йæ не схаста æмæ æрлæууыд йæ хæдзары.
Бадтиаты Жаннæ, ацы цауы æвдисæн, йæ мысинæгты дзырдта: «Хæдзары рудзынгæй, тохмæ хъус даргæйæ, мах хъуыды кодтам уыцы хъæбатырты тыххæй, кæцытæ аккаг ныхкъуырд лæвæрдтой бандиттæн, сæ цардыл æнæхъуыдыгæнгæйæ, æмæ мæлæты дзæмбытæм цæугæйæ. Цахæм тых хъуамæ уа адæймаджы уæнгты, цæмæй, бандитты æрхъулайы уæвгæйæ, сæ ныхмæ хæцæнгарз сисай. Уыимæ, уый зонгæйæ, æмæ сæ ныхмæ чысыл ныхмæлæуд дæр нысан кодта æцæг мæлæт. Æмæ мах, хæсты тыххæй æрмæстдæр кинофильмтæм гæсгæ зонгæйæ, ныр кастыстæм хæсты æгъатыр цæсгоммæ. Тынг тæссаг уыд. Сахатæй фылдæр нæ зæрдæтæ скъуыдысты уыцы æгъатырдзинад уынгæйæ. Мах æнхъæлмæ кастыстæм, зæгъгæ, ныртæккæ æрбацæудзысты нæхиуæттæ æмæ уыцы æнæзонгæтæ, кæцытæ ныхкъуырд лæвæрдтой бандиттæн æмæ нæ фервæзын кæндзысты хæсты цæхæрæй. Уæд æй мах нæма зыдтам, знагæн аккаг ныхкъуырд кæй лæвæрдта æрмæстдæр иу адæймаг – Стыр Фыдыбæстæйон хæсты 75-аздзыд ветеран Токаты Мурзабег, уый. Галазты Æхсарбеджы радиосидтмæ хъусгæйæ, мах ныфс бацыд, зæгъгæ, изæрмæ ацы æгъатырдзинадæн кæрон æрцæудзæн. Фæлæ æххуыс никæцæй зынд æмæ нæ чи хъуамæ бахъахъхъæдтаид нæхицæй дарддæр.
Сыгъд цæхæрадоны хос, ссыгъдысты хæдзарадон мæнгагъуыстытæ, райдыдта судзын Мурзабеджы хæдзар дæр, фæлæ бандиттæн сæ бон нæ уыд йе ‘рцахсын. Мæхъæлон бандиттæ уæрæсейаг æфсæдтæй цы БТР байстой, уымæй судзгæ хæдзар цалдæр æхсты куы фæкодтой æрмæстдæр, уæд фæцис æппæт дæр… Тыхджын срæмыгъды фæстиуæгæн æрызгъæлдысты æвгтæ мах хæдзары дæр, æркалдысты къулы сæрстытæ æмæ нæ срæмыгъды уылæн раппæрста фæрсагтæрхæгæй – пъолмæ».
Ахæм уыд Стыр Фыдыбæстæйон хæсты ветераны фæстаг тох. Ирон æгъдаумæ гæсгæ, Токаты Мурзабеджы сгуыхтдзинады тыххæй фыст æрцыд зарæг æмæ афтæмæй йæ ном цæрдзæн æнустæм. Рухсаг уæд хъæбатыр ветеран!
Æрмæгыл бакуыста
ДЖИОТЫ Екатеринæ
Comments are closed, but trackbacks and pingbacks are open.