7-æм февралы нæ Республикæмæ дыууæбонон кусæгон балцы æрцыд Уæрæсейы Федерацийы Президенты æххуысгæнæг Владислав Сурков.

Райдианы Владислав Сурков æмæ РХИ-йы Президент Тыбылты Леонид азылдысты 2015-2017 азты Хуссар Ирыстоны социалон-экономикон рæзтæн ахъазгæнæг Инвестицион программæмæ хаст арæзтцæуæг къорд объекттыл. Семæ ма уыдысты, Хицауады Сæрдар Хъуылымбегты Доменти, Уæрæсейы Федерацийы æххæстбарджын минæвар Хуссар Ирыстоны Къарджиаты Эльбрус, Æнæниздзинад æмæ социалон рæзты фæдыл президенты уынаффæгæнæг Игорь Галь, афтæ ма профилон министрадты сæргълæуджытæ, Цхинвалы горæты мэр Æлборты Алан æмæ æндæр официалон адæймæгтæ.

Æнæниздзинад æмæ социалон рæзты министры хæдивæг Плиты Агуындæ Владислав Сурковы базонгæ кодта сывæллæтты республикон рынчындоны, афтæ ма соматикон рынчындоны территорийыл ноджыдæр цы медицинон уагдæттæ рæзынц, уыдоны хъуыддæгты уавæримæ. «Зындгонд куыд у, афтæмæй ацы территорийыл арæзт цæуынц цалдæр медицинон объекты. Уыдонæй сывæллæтты республикон рынчындон ныридæгæн цæттæ у эксплуатацимæ радтынмæ. Ифтонг у нырыккон ифтонггæрзтæй. Операцион-хирургион комплекс дæр арæзтæуы Инвестицион программæйы фæлгæтты. Ацы медицинон объект куы сырæза, уæд дзы кусдзæн гемодиализы хайад дæр, цыран туг сыгъдæг цæудзæн аразгæ мембранæйы руаджы, «аразгæ уырг» аппаратæй пайда кæнгæйæ. Уый стыр æххуыс фæуыдзæн, нæ республикæйы цæрджытæй ахæм æххуыс кæй хъæуы, уыдонæн. Уыцы рынчынтæ цæмæй ахæм медицинон æххуыс райсой, уый тыххæй цæуынц Цæгат Ирыстонмæ æмæ сын уый та æвзарын кæны къорд зындзинæдтæ æмæ проблемæтæ. Операцион-хирургион корпус уыдзæн æртæуæладзыгон æмæ баиу уыдзæн соматикон рынчындоны бæстыхаимæ. Корпусы ма уыдзæн рынчындоны централон стерилизацион хайад. Эксплуатацимæ та лæвæрд æрцæудзæн фидæны азы кæронмæ. Куы сырæза, уæд æй сифтонг кæндзысты нырыккон ифтонггæрзтæй. Уыдон руаджы фадат уыдзæн дистанцион æгъдауæй уыргты фæзынгæ дуртæ пырх кæнынæн, уыдзысты дзы ног лапораскопион комплекстæ, æвæрд дзы æрцæудзæн магнитон-резонансон томограф. Централон стерилизацион хайады стерилизаци цæудзысты операцион дарæс, хирургион шприцтæ, æндæр медицинон æрмæджытæ. Корпусы уыдзæн 6 операцион блокы, урологион æмæ офтольмологон хайадтæ, рентгены аппараттæ, уыдзæн дзы реанимацион зал, интенсивон терапийы палатæтæ, фотолаборатори, дохтырты кабинеттæ, персоналон хатæнтæ», — æппæт уыдæттæ Плиты Агуындæ уынын кодта уазджытæн мониторыл.

Уæрæсейы Федерацийы Президенты æххуысгæнæг райгондæй баззад, йæ цæстæй цы федта, уымæй. «Социалон-экономикон рæз-тæн ис æрмæстдæр позитивон фæдыздæхт. Æз абон федтон, Инвестпрограммæйы фæлгæтты цы финанстæ хицæн цæуынц, уыдон раст фæдыздæхты хардз кæй цæуынц. Фыццаг рады уый у Леонид Харитоны фырты лæмбынæг хъусдарды фæрцы», — дзырдта цины æнкъарæнтимæ Владислав Сурков.

Æнæниздзинад æмæ социалон рæзты фæдыл Президенты уынаффæгæнæг Игорь Галь та загъта: «Ацы объекттæ эксплуатацимæ лæвæрд куы æрцæуой, уæд бирæ проблемæтæ æрцæудзысты скъуыддзаг. Тагъд хуынд æрцæудзæн бынатмæ медицинæйы фадыджы специалисттæ, цæмæй медицинон æххуыс организаци цæуа эффективонæй алы æмвæзады дæр æмæ уыцы здæхты алы къахдзæф дæр арæзт цæуа ахъуыдыгондæй. Æппæт ацы процедурæтæ арæзт цæуынц фыццаджы-фыццаг цæрджыты æнæниздзинад фæхуыздæр кæныны тыххæй, афтæ ма сын сæ медицинон æххуысы гъæд фæбæрзонддæр кæныны нысанæн. Æнæниздзинад хъахъхъæныны министрад концепцийы фыццаградон хæсыл нымайы медицинон-санитарон æххуысы системæ сфидар кæнын», — дзырдта Игорь Галь. Уый ма куыд загъта, афтæмæй Хуссар Ирыстоны æмбæстæгтæн Уæрæсейы цæудзæн специализацигонд медицинон æххуыс, Уæрæсейы æнæмæнг-хъæуæг медицинон фæдзæхсты системæйы хыгъдæй.

Дарддæр УФ-йы Президенты æххуысгæ-нæг бабæрæг кодта паддзахадон драмон театры бæстыхай дæр. Куыд зонæм, афтæмæй ныридæгæн театры арæзтад фæуд кæны, ам Цæгат Ирыстонæй æрхуынд нывгæнджытæ æрæвнæлдтой къултæ æмæ цар фæлындзынмæ, цыран уыдзæн мифологон æмæ историон моменттæ. Театруарзджытæн фадат уыдзæн Нарты эпосы истори бæстыхайы систæй æмæ цары фæлыстæй банкъарын. Залы центры плафонты алыварс, нывгæнджытæ куыд загътой, афтæмæй бынат сараздзысты Галæгон, Сафа, Æфсати, Фæлвæра, Куырдалæгон æмæ Донбеттыр. Сценæйы фæрсты та æрбынат кæндзысты дыууæ лирикон композици Ацæмæз æмæ Агуындæ, рахизфарс та — Сырдон. Залы фæзындзæн нарты бæстæ, цыран хæхты фоныл уыдзæн Уацамонгæ нуазæн. Ахæм диссаджы эскизтæ фæзындзæн театры фойейы дæр, уым та кусдзысты нывгæнджытæ Кæсойты Лаврент æмæ Чилæхсаты Магрез. Уыдон ма срæсугъд кæндзысты холлы систæ дæр. Æппæт уыдæттæ фенгæйæ Владислав Сурков загъта, æндидзынгæнæн процесс æмæ инвестицион бастдзинæдтæ Хуссар Ирыстоны территорийыл æмбæлонæй кæй цæуынц.

Инспекцион азылды фæстæ Тыбылты Леонид йæхимæ райста Владислав Сурковы. Ныхасы рæстæджы Президент банысан кодта, цы объекттыл азылдысты, уыдоны арæзтадон куыстытæ æнтысгæйæ кæй цæуынц æмæ бузныг загъта Уæрæсейы Федерацийы разамынадæн, республикæйы æндидзынады процессы йе стыр æххуысы тыххæй. Ныфс бавæрдта, Уæрæсейæ цы финансон æххуыс цæуы, уый дарддæр дæр хардз кæй цæудзæн ны-санмæздæхтæй. Уæрæсейы Федерацийы Президенты æххуысгæнæг Владислав Сурков Тыбылты Леонидæн загъта: «Мæнæн тынг æхсызгон у, абон кæй æмбæлæм. Æз райгондæй баззадтæн, абон цы арæзтæдтæ федтон, уыдонæй. Сывæллæтты республикон рынчындон æмæ драмон театры арæзтады тыххæй мæ стыр бузныг зæгъын фæнды сæрмагондæй дæуæн. Куыст æрцыд гъæдджынæй, къухы бафтыд, цы нысан сæвæрдтам сæрысуангæй, уый реализаци кæнын».

Владислав Сурков ма загъта, зæгъгæ, ахæм æххуыс дарддæр дæр цæудзæнис, Уæрæсейы кризис кæй ис, уымæ нæ кæсгæйæ. «Рагæй нал уыдтæн Хуссар Ирыстоны æмæ мын ныр æхсызгон у, уæ горæт хорзæрдæм кæй фæивта. Уынгты хæрзарæзт æмæ социалон нысаниуæджы уагдæтты арæзтадмæ кæсгæйæ мæ зæрдæ райы. Мæ зæрдыл хорз лæууы, драмон театры бынаты траншейтæ куыд уыд, рынчындон арæзт кæм æрцыд, уым та — каркастæ. Абон та мах уынæм, æгас Цæгат Кавказы дæр чи нæ уыдзæнис, ахæм арæзтæдтæ. Æппæт ацы æнтыстдзинæдтæ сты, ныртæккæ уæ бæстæйы сæргъ цы куырыхон къухдариуæг слæууыд, уый фæрцы. Уæрæсейы Федераци райгонд у, уæ республикæмæ цы финансон æххуыс цæуы, уыдон адæмы пайдайæн хардз кæй цæуынц, уыцы процессæй. Æвзæрстыты агъоммæ сымахæн уæ бон у равдисат бирæ позитивон хъуыддæгтæ. Стыр бузныг Леонид Харитоны фыртæн, процессыл контрол кæнын кæй фæразы. Мæн ныфс ис, дарддæр дæр ахæм æмбаргæ æмвæзадыл куы кусæм, уæд ноджы стырдæр æнтыстытæ кæй бафтдзæнис нæ къухты», — банысан кодта УФ-йы Президенты æххуысгæнæг.

РХИ-йы Президент стыр бузныг загъта Владислав Сурковæн йе стыр æууæнчы тыххæй æмæ ныфс бавæрдта, дарддæр дæр ахæм зæрдæмæдзæугæ куыст кæй кæндзæнис «Иумæйагæй ныфсдæттæг æвдисæнтæм куынæ кæсæм, уæд нын æнæзæгъгæ нæй, фидар экономикон рæзт сифтонг кæныны тыххæй нырма бирæ саразинæгтæ кæй ис. Хъæуы ноджы бæрзонддæр æмвæзадмæ схизын кæнын хæдзарадон архайды æппæт къабæзты дæр, дæсгай азты фæстейæ цы баззадыстæм, уый раййафын», — загъта Тыбылты Леонид.

Уазæгты М.

Comments are closed, but trackbacks and pingbacks are open.