Йæ цардæй ахицæн зынгæ ирон композитор, музыкалон æмæ æхсæнадон архайæг, Хæбæлаты Зинаидæ Савелийы чызг.

Стыр курдиаты хицау уæвгæйæ, Хæбæлаты Зинаидæ фæхъæздыгдæр кодта Ирыстоны музыкалон аивад йæ зынгæ уацмыстæй, кæцытæ йедзаг сты фæлгондзон характеристикæтæй æмæ оригиналон музыкалон фæрæзтæй.

Йе сфæлдыстады сæйрагдæр хиад у жанрон хъæздыгдзинад. Цардæгас бирæфарсон курдиат бæлвырд кæнынц композиторы царды фæндаджы мидис æмæ æвæлхатдзинад. Галаты Барис уыд йæ фыццаг ахуыргæнæг-зондамонæг. Дæс азы дæргъы Зинаидæ уыд Паддзахадон вокалон-инструменталон ансамбль «Бонвæрнон»-ы аивадон къухдариуæггæнæг.

Хæбæлаты Зинæ у ахæм сылгоймаг-композитор, кæцы ныффыста иууыл фылдæр симфонитæ æмæ уымæй бацыд Гиннесы рекордты чиныгмæ.

Уый ныффыста оперæ «Фатимæ», 19 симфонийы, бирæнымæц вокалон, хорон æмæ инструменталон уацмыстæ.

Композиторы сфæлдыстадон æмæ æхсæнадон лæггæдтæн æрцыд стыр аргъ. Уый уыд ССР Цæдисы Композиторты цæдисы уæнг, Уæрæсейы æрдззонынæдты академийы æцæг уæнг, ЮНЕСКО-йы фыццаг премийы лауреат, Цæгат Ирыстоны АССР-ы аивæдты сгуыхт архайæг, РЦИ-Аланийы адæмон артисткæ, Республикæ Хъыргъыстаны адæмон артисткæ.

Хæбæлаты Зинаидæйы рухс ном баззайдзæн нæ зæрдæты, куыд стыр гоймаг, стыр курдиаты æмæ бæрзонд профессионалон дæсныдзинады адæймаг, афтæ.

Зæрдæбынæй мæсæллæй кæнæм Хæбæлаты Зинаидæйы хиуæттæ æмæ хæстæджытæн.

 

РХИ-йы

Культурæйы министрад

 

 

 

Республикæ Хуссар Ирыстоны Президент Тыбылты Леониды мæсæллæйы фыстæг Хæбæлаты Зинæйы хиуæттæ æмæ æввахс адæммæ

 

Стыр хъыгзæрдæйæ райстон номдзыд композитор, Фыдыбæстæйы æцæг патриот, диссаджы адæймаг Хæбæлаты Зинаидæ Савелийы чызджы амæлæты цау.

Зинаидæ Савелийы чызг бирæ азты дæргъы фæллой кодта йæ райгуырæн Ирыстоны хæрзиуæгæн, æмæ бахаста, аргъ скæнæн кæмæн нæй, ахæм хайбавæрд дунеон культурæйы рæзт æмæ хъæздыг кæныны хъуыддагмæ, сæрмагондæй та – ирон национ культу-рæмæ. Уый кæддæриддæр ахсдзæн аккаг бынат Ирыстоны культурæйы архайджыты рæнхъыты.

Республикæ Хуссар Ирыстоны къухдариуæгад, нæ адæм æмæ мæхи номæй курæг дæн, цæмæй айсат мæ мæсæллæйы ныхæстæ, цы фыдох уыл æрцыд, уый сæраппонд.

Зинаидæ Савелийы чызджы рухс ном кæддæриддæр цæрдзæн нæ зæрдæты.

 

 

 

Галаты Асланджерийы номыл Культурæйы фонды уæнгтæ хъынцъым кæнынц цытджын сылгоймаг, композитор, 19 симфонийы автор Хæбæлаты Зинæ кæй фæзиан, уый тыххæй. Уый 19-æм симфони ныффыста музыкалон дунемæ йын фæндаг чи байгом кодта, йæ уыцы уарзон ахуыргæнæг Галаты Барисы цытæн.

Рухсаг у, Зинаидæ Савелийы чызг!

Æнустæм рох макуы у!

Comments are closed, but trackbacks and pingbacks are open.