Хъæлдзæг сæрдыгон улæфтытæ

Бæрæг куыд у, афтæмæй, Стыр Леуахийы былыл цы культурон æмæ фæлладуадзæн парк ис, уый æрцæудзæнис реконструкцигонд, инвестицион программæйы фæлгæтты. Проектон куыстытæ райдайдзысты ацы аз, фидæнмæ та парчы айтынг уыдзæн уæрæх масштабон арæзтад. Æмæ тагъд нæхицæн дæр уыдзæн аттракционтæ.

О, фæлæ сабиты ирхæфсын хъæуы, уыдонæн нæй зæгъæн, багæдзæ кæнут, цалынмæ парк рæза, зæгъгæ.

Ацы бонты нæ горæтмæ Ставрополæй æрластой сывæллæтты аттракцион. Сабиты хиирхæфсæн городокæн горæты администраци рахицæн кодта бынат Вокзалгæрон фæзуаты.

Ис дзы 9 аттракционы, 2-8 азы кары сабитæн æвæрд æрцыд манеж доны хъазт æмæ чысыл вагæттимæ. Иннæ аттракционтæ та сты хистæр кары сывæллæттæн. Ис ма дзы хъæлдзæг къуылдымтæ, батуттæ, хъеллаугæнæнтæ æмæ æндæртæ.

Ацы бæрæгбон сабитæн йæ цæст бауарзта не ‘мбæстаг, æхсæнадон архайæг Реуазты Сосланæн.

Уый куыд зæгъы, афтæмæй «Цхинвалы сабитæн хъæлдзæг рæстæг æрвитыны бынæттæ сты стæм. Ногдзауты парчы изæры сывæллæттæй азмæлæн дæр нæ вæййы, бирæ бинонтæ та улæфт бонты сæ зæнæджы сæхи аирхæфсыны тыххæй фæкæнынц Цæгат Ирыстонмæ».

Ивгъуыд аз, цæугæ аттракцион Дзæуджыхъæуы горæты æвæрд куы æрцыд, уæд йæ къухдариуæггæнæг Арсен Григорян аттракционмæ фæхуыдта нæ горæты скъола-интернат æмæ Ленингоры районы сывæллæтты хæдзары хъомылгæнинæгты. Фæлæ, цыдæр аххосæгтæм гæсгæ уæд сабитæн не уырдæм ацæуын нæ бантыст.

Реуазты Сослан ма куыд загъта, афтæмæй: «Ацы аз дæр сывæллæттæ хуынд цыдысты Цæгат Ирыстонмæ аттракционтæм. Уый фæдыл æз фембæлдтæн нæ паддзахады Президент Бибылты Анатоли æмæ Хицауады Сæрдар Пухаты Эрикимæ. Фембæлды рæстæджы Бибылты Анатолийы хъуыды уыд раст. Уый загъта, зæгъгæ, сæрдыгон бонты сабитæ уыцы дард фæндагыл бафæллайынц, бастайынц. Хуыздæр уаид, куы бадзуриккат   цæугæ аттракционы къухдариуæгадимæ, цæмæй сæхæдæг æрцæуой махмæ. Техникон æмæ финансон хæрдзтæ  æрби-ноныг кæныны хъуыддаг  та йæхимæ райста Президент», – зæгъы æхсæнадон архайæг.

Аттракционы къухдариуæггæнæг та загъта: «Анатоли Ильяйы фырт, организацион фарстыты хъуыддаджы йæхимæ стыр хæс райста. Уыйхыгъд, мах дæр нæ аттракционы æргътыл æрхæцыдыстæм 50 %. Мах цæттæ стæм, æнаргъæй атракционыл хъазынмæ æрхонæм Ленингоры районы сывæллæтты хæдзар, Цхинвал æмæ Дзауы районы скъола-интернатты, афтæ ма Къуайсайы поселочы сывæллæтты рæвдауæндæтты сабиты».

Арсен Григорян ма куыд загъта, афтæмæй йæ зæрды ис, Хуссар Ирыстоны адæм  республикæйы бæрæгбон куы нысан кæной, уæд нæ республикæйы сабитæн сюрприз саразынмæ. «Нæ цæугæ аттракцион кусы ныр фондз азы бæрц, мах гастролты вæййæм Уæрæсейы æппæт горæты дæр. Хуссар Ирыстонмæ нырмæ уымæн никуы æрцыдыстæм, æмæ фæндæгты уавæр, техникон æгъдауæй уыд зын. Ныр дæр нæм уæ паддзахады къухдариуæггæнæг куы нæ фæкастаид, уæд нæхæдæг нæ ныфс нæ бахастаиккам. Нæ атракцион, кæцыфæнды горæты ма уа, алыран дæр сидзæр сабитæн у æнæаргъæй», – зæгъы уый.

Уый ма банысан кодта, сабиты хиирхæфсæн городок Цхинвалы кæй уыдзæн 8-æм июлмæ. Кусдзæн райсомы 9 сахатæй изæры 21 сахат æмæ 30 минутмæ. Уый фæстæ та йæ балц акæндзæн Алагирмæ.

Уазæгты М.