Цырд темптæй арæзт цæуы нæ горæты иууыл рæсугъддæр централон уынгтæй сæ иу – Хетæгкаты Къостайы уынг. Уым арæзтадон-цалцæггæнæн куыстытæ уагъд цæуынц 2015-2017 азтæн Хуссар Ирыстоны социалон-экономикон рæзтæн ахъазгæнæг Инвестицион программæ реализаци кæныны фæлгæтты. Хетæгкаты Къостайы уынг æххæстæй арæзт фæуыдзæн æмæ эксплуатацимæ лæвæрд æрцæудзæн ацы аз.
РХИ-йы Арæзтад, архитектурæ æмæ цæрæнуатон-коммуналлон хæдзарады министры хæдивæг Гаглойты Сергей нын куы фехъусын кодта, уымæ гæсгæ ныртæккæ Хетæгкаты Къостайы уынджы, Сталины уынгæй Тугъанты Мухарбеджы уынджы онг фадыджы, æппæт цæттæгæнæн куыстытæ арæзт фесты, æвæрд дзы æрцыдысты фæндагон æмæ тротуарон бордюртæ. Фесты сыджыты уæлцъар исыны æмæ проектон нысæнтты онг хуыр ныккалыны куыстытæ. Цалдæр боны дæргъы уынджы цæттæ кæндзысты асфальт сæвæрынмæ Сталины уынгæй Тугъанты Махарбеджы уынджы онг фадыджы. Тугъанты Махарбеджы уынгæй дæлдæр та уагъд цæуынц сыджыты уæлцъар исыны куыстытæ. Æмткæй объекты кусы 16 адæймаджы æмæ æртæ иуæджы та уæззау техникæ. Уынджы куыстыты æххæст кæны бынæттон организаци «Дорэкспострой».
Арæзтады министры хæдивæг Гаглойты Сергей ма куыд банысан кодта, уымæ гæсгæ, сын финанс кæныны проблемæтæ нæй. Хетæгкаты Къостайы уынг æххæстæй æндидзыд æмæ хæрзарæзт æрцæудзæн графикмæ гæсгæ.
Чертхъоты Ж.
Comments are closed, but trackbacks and pingbacks are open.