Хæрзаудæн фонд «Подари крылья»-йы акцийы фæлгæтты æхцайы фæрæзтæ хос кæнынæн радта Цхинвалы скъола-интернаты ахуыргæнинаг Диана Ткаченкойæн.

Республикæ Хуссар Ирыстоны сывæллæтты хæрзаудæн фонд «Подари крылья»-йы президент Цхуырбаты Татьяна фонды кусджытимæ иумæ сорганизаци кодта онкологион рынчын сывæллæттæн баххуыс кæныны тыххæй радон акци. Фонды презентацийæ акцийы организатортæ цы æхцайы фæрæзтæ æрбамбырд кодтой, уыдонæй 27-æм декабры радтой рынчын сывæллон Диана Ткаченкойæн.

Диана йæ мадимæ æрæджы æрæздæхтысты хæдзармæ дæргъвæтин хос кæныны фæстæ. Уымæн хос кодтой Мæскуыйы, рацыдис дзы хосгæнæг курс, сарæзтой йын цалдæр химийы.

Скъола-интернаты Дианæйыл æмбæлдысты йе ʻмкъласонтæ æмæ ахуыргæнджытæ æмæ йыл тынг фæцин кодтой. Чызджы мад Гаглойты Маринæйы ныхæстæм гæсгæ дохтыртæ зæрдæвæрæн ныхас зæгъынц йæ хос кæныны хорз фæстиуæджы тыххæй, фæлæ йæ, зæгъгæ, дарддæр дæр хъæудзæнис æртæ мæйæ æртæ мæймæ медицинон басгæрсты рацæуын Мæскуыйы. Уым-иу хъуамæ радта æмбæлон анализтæ, цæмæй йын контрол кæной йе ʻнæниздзинады уавæрыл.

Скъолайы ахуыргæнджытæ сæ директоры сæргълæудæй, фыццаджыдæр, арфæйы ныхæстæ загътой Дианæйæн, цæмæй кæддæриддæр уа æнæниз æмæ хъæлдзæг. Уыдон ма Дианæйы ныййарæг мадæн фехъусын кодтой Президент Бибылты Анатолийы хъуыды, кæцы разы у, цæмæй Израилы клиникæтæй сæ иуы адарддæр кæна йæ хос кæныны хъуыддаг. «Сымахæй рох ма уæт уый æмæ нæ цытджын Президент Бибылты Анатолийæ рохуаты кæй не стут æмæ уын уæ хъуыддагмæ йæ хъус лæмбынæг кæй дары. Бибылты Анатоли фæндон бахаста, цæмæй Дианæйæн Израилы хос кæныны аргъ бафида, кæд ма йæ дарддæр бахъæуа уырдæм ацæуыны сæр, уæд. Æрмæст развæлгъау хъæудзæнис чызджы анализтæ æмæ йын дохтыртæ йæ низæн цы хатдзæг сарæзтой, æппæт уыдæттæ», — банысан кодтой скъолайы педколлектив.

Фонд «Подари крылья»-йы къухдариуæггæнæг ныфс бавæрдта, сæ организаци дарддæр дæр кæй æххуыс кæндзæнис Дианæйæн æмæ йын балæвар кодта зæрдылдарæн лæвæрттæ, кæцытæ сæрмагондæй æлхæд æрцыдысты уымæн.

«Ацы лæвæрттимæ ма уын дæттæм æхцайы фæрæзтæ дæр Дианæйæн дарддæр хос кæныны тыххæй, афтæ ма дын Президент Бибылты Анатолийæ дæр лæварæн  планшет», — загъта Цхуырбаты Татьянæ чызгæн.

Йæ рады чызджы ныййарæг мад дæр бузныг æмæ арфæйы ныхæстæ загъта моралон æмæ материалон æгъдауæй сын дæргъвæтин рæстæджы чи æххуыс кæны, æппæт уыдонæн.

Цхуырбаты Ларисæ

Comments are closed, but trackbacks and pingbacks are open.