Хуссар Ирыстоны культурæйы министрады æххуысæй киноконцертон зал «Чермен»-ы уагъд æрцыд хæрзаудæн концерт «За наших бойцов», зæгъгæ. Концерт нысан цыд Уæрæсейы сæрмагонд æфсæддон операцийы хайадисджытæн баххуыс кæныны тыххæй. Хайад дзы райстой Хуссар æмæ Цæгат Ирыстоны артисттæ: Лалыты Альберт, Игорь Тасо, Джиоты Ибрагим, Икъаты Миленæ, Цхуырбаты Сослан, Джихаты Рустам, Зæнджиаты Мæдинæ, Джелиты Оксанæ, Мæргъиты Лери, Икъаты Ибрагим æмæ æндæртæ. Уыдон сæххæст кодтой патриотикон зарджытæ дæр куыд ирон, афтæ уырыссаг æвзæгтыл.

Хæрзаудæн концертмæ æрбацыдысты нæ республикæйы къухдариуæгад президент Гаглойты Аланы сæргълæудæй. Бузныджы ныхæстæ загъта нæ президент концерты организатортæн æмæ банысан кодта, зæгъгæ ныртæккæ сæрмагонд æфсæддон спецоперацийы хайадисджытæн ахсджиаг у цыфæндыхуызон æххуыс дæр.

«Абон уын уæ зарджыты цы бирæ ахсджиаг ныхæстæ фехъуыстам, уыдон се ‘ппæт дæр дзурæг сты патриотизмыл. Ацы залмæ æрбамбырд сты нæ хъайтартимæ æцæгæй дæр зæрдæйæ чи ис, уыдон. Растдæр 14 азы размæ нæ зæххыл æвирхъау хæсты рæстæджы ныккалд бирæ туг, уыдис дзы амæттæгтæ дæр. Фæлæ уæд никæй бауырныдтаид, Хуссар Ирыстоны хæдбардзинад Уæрæсе куы банымадта, уый фæстæ ма нæ къухтæм хæцæнгарз искуы  райсдзыстæм, уый. Абон та бахъуыды рæстæджы нæ лæппутæ сты хæсты быдыры. Уыдон уым куынæг кæнынц знаджы, цæмæй ирон зæххыл уа фарн», – загъта Гаглойты Алан.

«Рæстдзинад алыхатт дæр фæуæлахиз вæййы. Сæ къухты æнæмæнгæй дæр уæлахиз бафтдзæн Уæрæсе, Ирыстон æмæ æппæт уыцы хæстонты къухы, кæцытæ уæхски-уæхск тох кæнынц знаджы ныхмæ»,- загъта президент.

Концерты организатор, Лалыты Альберт сæххæст кодта, йе ‘рдхорд Хуыгаты Радикыл фыст зарæг. Радик фæмард сæрмагонд æфсæддон операцийы рæстæджы. Джиоты Ибрагимы «Цхинвал»-ы зарæг куы акодта, уæд æм  зал хъуыстой лæугæйæ.

Амонæг Икъаты Миленæ та адæммæ бахатыд, цæмæй Украинæйы зæххыл  нæ хъайтартæй чи бабын, уыдонæн иу уысм æмырæй алæугæйæ ссарой сæ рухс нæмттæ. Миленæ нын йæхæдæг куыд радзырдта, уымæ гæсгæ концертæн сценари ныффыста йæхæдæг, кæцы рауад тынг цымыдисон.  Уый фыццаг хатт сценæйыл сæххæст кодта зарæг «Худинаджы бæсты – мæлæт», кæцыйы автор у Миленæ йæхæдæг.

«Нæ лæппутæ Украинæмæ фыццаг хатт куы цыдысты, уæд ирон тырысайыл ныф-фыстой: «Худинаджы бæсты – мæлæт». Фæнды мæ, цæмæй нæ лæппутæ, æцæгæй дæр, æрыздæхой сæрæгасæй уæлахизимæ»,- загъта Икъаты чызг.

Курдиатджын зарæггæнæг Джелиты Оксанæ фыццаг хатт нæ рухс кæны  йæ аив хъæлæсæй хуссарирыстойнаг адæмы зæрдæтæ. Йе ‘ххуыс кæм бахъæуы, уым фæстæ никуы фæлæууы. «Куы мын загътой хæрзаудæн концерт ауадзыны тыххæй, уæд нæ хъайтарты хæрзæбонæн мæ бон «нæ» зæгъын нæ бацис. Хуыцау зæгъæд, цæмæй тагъд рæстæджы зæххыл уа фарн æмæ сабырдзинад, цæмæй иунæг мад дæр мауал фесафа йæ хъæбулы»,- банысан кодта Джелиты Оксанæ.

Концерты цы æхцайы фæрæзтæ æртымбыл ис, уыдон се ‘ппæт дæр æрвыст æрцæудзысты æфсæддон службæгæнджытæн æххуысæн.

                                    КОКАЙЫ Зæринæ

Comments are closed, but trackbacks and pingbacks are open.