Цалынмæ гуырдзиаг-ирон хæст  нæ райдыдта, уæдмæ дæр нæ хъæутæ иууылдæр ифтонг нæ уыдысты донæй.

2008 азы фæстæ хъæуты цы адæм баззад, уыдон цæуын райдыдтой Хицауадмæ, цæмæй сын баххуыс кодтаиккой фæндæгтæ аразын æмæ дон уадзынæн. Сæрмагонд программæ райста Хицауад æмæ нæм цы хъæутæ ис, уыдонмæ цадæггай райдыдтой аразын, кæм уæлæмхас, кæм та — ног доны резервуартæ. Афтæ­мæй ныр цалдæр азы хъæутæ ифтонг цæуынц фæндæгтæ æмæ донæй.

Цхинвалы районы арæзтадон-коммуналон хæдзарады сæргълæууæг Уазæгты Мевлуд нын радзырдта, ацы аз районы хъæутæй ахæм куыстытæ кæм бакодтой, уый тыххæй. «Цхинвалы районы хъæуты ахæм куыстытæ æрвылаз дæр цæуы. Хъыгагæн, капиталонæй арæзт кæй не ‘рцæуынц, уымæ гæсгæ та тагъд фехæлынц. Хъуамæ алчидæр зона, цæмæй доны хæтæлтæ капиталонæй арæзт æрцæуой, уый тыххæй хъæуы стыр æхцайы фæрæзтæ. Мах бацархайæм, хъæуты цы суадæттæ ис, уырдыгæй дон рауадзыныл. Уым бынаты  арæзт æрцæуы резервуар. Ацы районæн дæр ис йæхи техникон иуæгтæ, фæлæ уыдон сты зæронд æмæ æнцонтæй фехæлынц. Хатт бахъæуы ацæуын Ставрополмæ æмæ уæдмæ куыст бафæстиат вæййы. Вæййы афтæ дæр æмæ мах резервуар кæм саразæм дон æмбырд кæнынæн, уый цалдæр азмæ басур вæййы, кæннод та æрхауы йæ дебет æмæ та ногæй мах бацагурæм суадон. Æппæт уыцы куыстытæ кæнын æнцон нæу, фæлæ адæм дæр хъуамæ нæ фарсмæ балæууой, хъæуы кæрæдзийы уавæры цæуын», — зæгъы Цхинвалы районы арæзтадон-коммуналон хæдзарады сæргълæууæг. Уый ма æрдзырдта, донæмбырдгæнæн резервуартæ арæзт кæй æрцæуынц специалистты амындмæ гæсгæ. Йæ  гуырахст 60 кубон метр кæмæн у, ахæм резервуар хъуамæ фаг уа, 250 хæдзар кæм ис, ахæм хъæуæн, фæлæ резервуартæм æввахс цы цæрджытæ ис, уыдон æдзæсгомæй пайда кæнынц нуазыны донæй. Дон бауадзынц сæ цæхæрадæттæм æмæ хъæуы дæллаг фарс цы цæрджытæ ис, уыдонæн нæ вæййы сæрдыгон бонты дон, сæ цæхæрадæтты донхæр кæнын куынæ уал фæхъæуы, уæд та хъæуы кæронмæ дæр дон рацæуы.

Хъыгагæн, иуæй-иу цæрджыты фæнды, се ‘ппæт проблемæтæ дæр сын паддзахад скъуыддзаг кæна, уый.

Уазæгты лæппу куыд зæгъы, афтæмæй донуадзæн куыстытæ ацы аз бакодтой Дменис (1,5 км), Дампъалет (2 км), Зары хъæуы (800 м), Арцеу, Ортъеуы æмæ  Цъунары хъæуты. Цъунары ма фидæн аз дæр цæудзæн куыст, æндæр хаххыл горæтмæ Уанаты дон куы баиу кæнæм, уæд уырдыгæй. Ныртæккæ дæр архайæм Галуантыхъæу æмæ Гудзабары, уым дæр ивд цæуынц зæронд доны хæтæлтæ. Донуадзæн куыстытæй дарддæр ма архайæм фæндæгтæ æмæ хидтæ аразыныл дæр.

УАЗÆГТЫ Марфа

Comments are closed, but trackbacks and pingbacks are open.