Нæ республикæйы Сывæллæтты сфæлдыстады галуаны архайы программæ «Хъæууон скъола». Уымæн йæ нысан у районты æмæ хъæуты скъолатæн методикон æмæ практикон æххуыс бакæнын. Уый тыххæй нын бæлвырддæрæй радзырдта Галуаны хъомылады куысты фæдыл директоры хæдивæг Джиоты Венерæ. 

«Ацы программæ у тынг цымыдисон. Йæ сæйраг нысан у, цæмæй районты æмæ хъæуты скъолатæн кæнæм методикон æмæ практикон æххуыс. Фыццаг рады мах бабæрæг кодтам Ленингоры район. Уырдæм ацыдысты Галуаны директор Джиоты Арянæ, йæ хæдивæг,  ахуыры хайы сæргълæууæг, методисттæ, ахуыргæнджытæ-организатортæ æмæ уæлæмхас ахуырты ахуыргæнджытæ — æдæппæтæй 16 адæймаджы. Махыл цытджын æгъдауæй сæмбæлдысты Ленингоры Сывæллæтты сфæлдыстады хæдзары минæвæрттæ», — банысан кодта Джиоты Венерæ.

Йæ ныхæстæм гæсгæ, мадзал рауад тынг цымыдисон æмæ хорз цæттæгонд. Мадзалмæ æрбацыдысты районы уырыссаг æмæ гуырдзиаг скъолатæй алы кары сывæллæттæй дæр 100-мæ æввахс.

«Фыццаг рады сын равдыстам куклæты театр. Уый фæстæ сын уыд уырыссаг адæмон аргъæуттæм гæсгæ  викторинæ,  1-7 кълæстæн ауагътам хъæлдзæг старттæ, шашкитæ æмæ шахматтæй ерыстæ. Ерысты рæстæджы сывæллæттæн истам сæ къамтæ  æмæ сæ къулыл бакодтам. Уымæ гæсгæ алы сывæллонæн дæр уыд хъазгæхъазын фæрсæрдыгæй йæхимæ бакæсыны фадат. Хъæзтыты рæстæджы сæхи уæлдай активондæрæй чи равдыстой, уыдоны мах схорзæхджын кодтам бузныджы фыстæджытæ æмæ грамотæтæй. Уый фæстæ сывæллæтты се ‘ппæты дæр суазæг кодтам адджинæгтæй. Сывæллæттæ сæхи равдыстой тынг активонæй æмæ æнæзивæгæй хайад истой бацæттæгонд мадзæлтты.

Мадзалы кæрон организатортæ æмæ къласгæстæн Джиоты Арянæ ауагъта методикон сахат. Уый фæстæ мах бабæрæг кодтам ацы районы Сывæллæтты сфæлдыстады хæдзар. Бацымыдис кодтам сæ уавæртæм æмæ сæ программæ куыд арæзт цæуы, уымæ», — радзырдта нын Венерæ.

Банысан кæнын хъæуы уый дæр, æмæ ныридæгæн ахæм мадзал Сывæллæтты сфæлдыстады галуаны кусджытæ кæй ауагътой горæт Къуайсайы дæр. Дарддæр ахæм мадзæлттæ ауадздзысты республикæйы иннæ районты дæр.

 

«Хайад райстой конкурс «Зондаби»-йы

Хуссар Ирыстоны Сывæллæтты сфæлдыстады галуаны хъомылгæни-нæгтæ хайад райстой Цæгат Ирыстон-Аланийы уагъдцæуæг конкурс «Зондаби»-йы. Уый тыххæй нын радзырдта Галуаны методикон кабинеты сæргълæууæг Гаглойты Азæ.

«Мадзал уагъд æрцыдис Дзæуджыхъæуы Сывæллæтты сфæлдыстады галуаны. Ацы аз традицион хъазт «Зондаби» баст уыд ирон адæмы æгъдæуттæ æмæ традицитимæ», -. банысан кодта Азæ.

Йæ ныхæстæм гæсгæ конкурсы хайад райстой интеллектуалон хъазт «Зонды къуыбар»-ы уæлахиздзаутæ, «Чысыл академи»-йы хъусджытæ, æвзонг сценæмæкæсæджы театры актертæ.

«Сывæллæтты сфæлдыстады галуаны хъомылгæнинаг Кокойты Дианæ республикон интеллектуалон хъазт «Зондаби»-йы капитанты конкурсы ссис уæлахиздзау.  Сывæллæтты сфæлдыстады галуаны хъомылгæнинæгтæ конкурсы  равдыстой  чысыл сценкæтæ æмæ зонадон куыстытæ мадæлон æвзагыл. Ацы номинацийы дæр нæ хъомылгæнинæгтæ райстой приз. Ауагътой ма брейн-ринг ирон адæмы традицион культурæ, ирон æвзаг æмæ литературæйы фæдыл»,- банысан кодта Гаглойты Азæ.

Кокайты Заринæ

Comments are closed, but trackbacks and pingbacks are open.