Республикæ Хуссар Ирыстоны Президент Бибылты Анатоли хайад райста Сыгъдæг Георгийы VI-æм  бакастыты. Уыдон уагъд æрцыдысты Республикæ Цæгат Ирыстон-Аланийы дзуарæфтыды 1100 азы бæрæгбонмæ бацæттæ кæныны фæлгæтты.

Мадзалы оранизатор уыд Дзæуджыхъæуккаг æмæ Алайнаг епархи, Хетæгкаты Къостайы номыл Цæгат Ирыстоны паддзахадон университет æмæ РЦИ-Аланийы истори æмæ археологийы институты æххуысæй æмæ Уанеты Захары номыл Хуссар Ирыстоны зонад-иртасæн институты хайадистæй.

Бакастыты хайадисджытæ æруынаффæ кодтой Аланийы æмæ Кавказы бæстæты чырыстон историйы фарстытыл, культурон-историон бынтæ бахъахъхъæныны æмæ мурттатаг проблемæтыл.

Республикæ Хуссар Ирыстоны Президент Бибылты Анатоли радон хатт банысан кодта  чырыстон æргъадтыл республикæйы къухдариуæгады æмæ адæмы æнувыддзинады тыххæй.

«Мах зонæм, цас проблемæтæ нæм æрæмбырд, уый тыххæй. Куыд, зæгъæм,  муртаттаг проблемæ, сектæты æмæ ахæм фæзындтыты проблемæтæ. Уыдон иууылдæр сты нæ Чырыстондзинады проблемæтæ æмæ сæ хъæуы скъуыддзаг кæнын», — загъта Президент.

Уый банысан кодта, зæгъгæ, ирæттæ алыхатт дæр сæрыстыр уыдысты сæ фыдæлтæй æмæ уыдоны бынтæй. «Мах алыхатт дæр сæрыстыр уыдыстæм нæ фыдæлтæй, фæлæ ма мах сæрыстыр хъуамæ уæм уыдон нын цахæм чырыстон бынтæ ныууагътой, уымæй дæр. Иуæй-иу адæймæгтæ мын куы фæдзурынц, зæгъгæ, Уастырджи Сыгъдæг Георгий нæу, уæд сæм радтын фарст: «Куыд æмбарын кæнынц уыдон сыгъдæджы ном ирон æвзаджы дыгурон диалектыл  Уасгерги?», — загъта Бибылты Анатоли.

Уый зæрдыл æрлæууын кодта, зæгъгæ, «чырыстондзинад бавзæрста уæззау рæстæджытæ, уæд æнусы æмбисы аланты бахъуыд хæхтæм ацæуын. Чырыстондзинад æрлæууыд йæ рæзтæй, иннæ чырыстон адæмтæм сæ чырыстондзинад куы фидар кодта æмæ рæзт, уыцы рæстæджы».

«Æмæ абон, иудзинады тыххæй дзургæйæ, мах хъуамæ рахицæн кæнæм национ идеологийы дыууæ здæхты — ирон этносы иудзинад æмæ монон иудзинад, кæцыйæн бындур æвæрд хъуамæ æрцæуа æрмæстдæр чырыстондзинадыл. Уый уæззау процесс у, фæлæ монон тыхты æххуысы руаджы æмæ монондзинады æмæ уырнон адæймæгты иудзинады руаджы, махæн нæ къухты бафтдзæн снысангонд нысæнттæ сæххæст кæнын», — загъта Бибылты Анатоли.

Республикæ Хуссар Ирыстоны

Президенты пресс-службæ

Comments are closed, but trackbacks and pingbacks are open.