Хайад райста «Уæрæсейаг политикæйы скъола»-йы фæндзæм сессийы

Мæскуыйы йæ куыст фæцис æхсæнадæмон проекты фæндзæм сесси, кæцыйы реализаци кæны Автономон æнæкоммерцион организаци «Социалон дизайны центр» – «Уæрæсейаг политикæйы скъола» «Россотрудничество»-йы фарсхæцынадæй. Сессийы хайад раста Хуссар Ирыстоны минæвар – РХИ-йы Культурæйы министрады дзыллон информацион фæрæзтимæ бастдзинæдты фæдыл сæйраг специалист Остъаты Мадинæ.

Проекты йæ хайадисты тыххæй Остъаты Мадинæ куыд радзырдта, афтæмæй сессийы хайадисджытæ уыдысты 50 минæвары бæрц дунейы 25 бæстæйæ æмæ Уæрæсейы 25 регионæй.

«Къуырийы дæргъы  6-æм ноябрæй 12-æм ноябрмæ мах уыдыстæм УФ Федералон æмбырды Федерацийы Советы, Уæрæсейы Федерацийы  Федералон æмбырды Паддзахадон Думæйы æмæ Уæрæсейы Æхсæнадон палатæйы, фембæлдыстæм политиктимæ æмæ уынаффæ кодтам хисæрмагонд проекты реализацийы фæдыл. Рабадтытæ уагъд цыдысты гом брифингы формæйы. «Фæсивæдон политикæ», «Æхсæнадæмон ахастытæ», «Дзыллон информацион фæрæзты роль дунейы политикон ныв аразгæйæ» – уыдон  уыдысты, спикертимæ фембæлдтыты рæстæджы цы темæтыл уынаффæ кодтам,  уыдоны иу хай. 7-æм ноябры мах уыдыстæм Федерацийы Советы. Фыццаг дискуссион фæзуаты спикер уыд Федерацийы Советы Æвзонг закъондæтджыты  палатæйы спикер Виктор Конопацкий. Уый нын радзырдта Палатæйы куысты сæйраг здæхтыты тыххæй, кæцы йæ мидисмæ гæсгæ у, бæстæйы алыгъуызон æмвæзады æвзонг политикты чи æрбаиу кодта, ахæм уникалон структурæ, афтæ ма нын радта практикон бацамындтæ, политикæмæ куыд хъуамæ æрцæуай æмæ уыцы сферæйы дæ къухы æнтыстытæ куыд хъуамæ бафта, уыдæтты тыххæй», – загъта Остъаты Мадинæ.

Йæ ныхæстæм гæсгæ, æхсæнадæмон проекты боны фæткы проблемæтыл уынаффæ цыд Федерацийы Советы Æхсæнадæмон хъуыддæгты фæдыл комитеты уæнг Морозов Олегимæ.

«Олег Викторы фырт у уæрæсейаг фæлтæрддæр политиктæй сæ иу, кæцы Паддзахадон Думæмæ æвзæрст æрцыд æхсæз хатты, къухдариуæг кодта Уæрæсейы Федерацийы Президенты Администрацийы Мидæггагон политикæйы управленийыл. Фембæлды фæлгæтты спикер радзырдта, нырыккон геополитикон проблемæтæ æмæ сидтытæ йæхæдæг куыд уыны, уыдæтты тыххæй æмæ бæстæйы мидæггагон уавæры тыххæй. Сенаторы хъуыдымæ гæсгæ, мах цæрæм дыууæ дунеæмбарынады ныхмæлæуды дуджы: бирæполярон дуне, цыран æппæт паддзахадтæ дæр цыт кæнынц паддзахады хæдуагæвæрды барæн æмæ иуполярон дуне, цыран фæткойтæ фыссынц Урс хæдзары къулты ‘хсæн «табуреткæтыл. Ахæм уавæрты Уæрæсейы нæ хъæуы ныхмæлæууынад, фæлæ йын уыимæ иумæ нæй лæмæгъ уæвыны бар дæр», – бамбарын кодта уый.

Остъаты Мадинæ ма йæ ныхасмæ бафтыдта, зæгъгæ, проекты традицитæм гæсгæ, Олег Морозов Уæрæсейаг политикæйы скъолайы хайадисджытæн бацамыдта, кæцы чингуыты хъæуы бакæсын, сæрмагондæй сын бацамыдта, цæмæй бакæсой Николай Лесковы «Соборяне», Толстойы, Достоевскийы, Джек Лондоны æмæ Фенимор Куперы романтæ.

«Федерацийы Советы экскурсийы фæстæ Волгограды областæй сенатор, олимпиаг чемпионкæ, Рог атлетикæйы Æппæтуæрæсейаг федерацийы вице-президент Татьянæ Лебедеваимæ мах ныхас кодтам фæсивæды ‘хсæн спорты популярондзинадыл. Уыимæ иумæ ма дзырд цыд спорты рæзты проблемæйыл дæр æмæ ууыл политикæ куыд æндавы, уый тыххæй. 8-æм ноябры райсомæй базонгæ стæм Тулайы областы закъондæттæг æмæ æххæстгæнæг органты хицауиуæгадимæ, афтæ ма уыдыстæм Тулайы Хæцæнгæрзты паддзахадон музейы. 9-æм ноябры нын кусæгон фембæлд уыд Уæрæсейы Паддзахадон Думæйы. Уым нын Парламенты депутаттæ радзырдтой сæ архайды æмæ реализацицæуæг проектты тыххæй», – банысан кодта Остъаты Мадинæ.

Остъаты Мадинæ куыд загъта, афтæмæй 10-æм ноябры сессийы хайадисджытæ сæ куыст адарддæр кодтой Уæрæсейы Федерацийы Паддзахадон Думæйы. «Немæ фембæлд Уæрæсейы Федерацийы Паддзахадон Думæйы Сæрдары хæдивæг Петр Толстой, Культурæйы фæдыл комитеты уæнг Сергей Боярский, Физикон культурæ, спорт, туризм æмæ фæсивæдон хъуыддæгты фæдыл комитеты уæнг Александр Прокопьев. Дзырды сæрибардзинады тыххæй фарстæн дзуапп дæтгæйæ, Петр Толстой банысан кодта, зæгъгæ, размæдзыд европæйаг паддзахадты дзыллон информацион фæрæзтæн сæ фылдæр сты «иу хаххыл лæуд», оппозицион ресурстæ та кæнæ æппындæр не сты, кæнæ та маргинализацигонд цæуынц. Уæрæсейы та, Петр Толстойы хъуыдымæ гæсгæ, ис хъуыдыты плюрализм, æмæ дæ куы бафæнда, уæд иу цауы тыххæй алыгъуызон дзыллон информацион фæрæзты фехъусæн ис полярон цæстæнгастæ.

Культурæйы фæдыл комитеты уæнг Сергей Боярскийы хъуыдымæ гæсгæ, культурæ у ахæм фæзынд, кæцы иу кæны адæмты, уый ахæм сферæ у, кæцыйы фæрцы бадзурæн ис æндæр æмæ æндæр паддзахадты ‘хсæн, уымæн æмæ уый дард лæууы политикæйæ.

Михаил Дектярев банысан кодта, зæгъгæ, уæрæсейаг парламентаритæ цæттæ сты сæ фæсарæйнаг коллегæтæн сæ фæлтæрддзинад бацамонынмæ, уыцы нымæцы фæсивæдон политикæйы сферæйы æмкуысткæнынадмæ дæр. УФ Физикон культурæ, спорт, туризм æмæ фæсивæдон хъуыддæгты фæдыл комитеты уæнг Александр Прокопьев хъусдард аздæхта демографион проблемæмæ æмæ йæ бæрæггæнæнтæм гæсгæ, афтæ хуыйнæг «90-æм азты демографион къуыхцыдзинад» æркодта уымæ, æмæ 2025 азмæ æвзонг адæймæгты нымæц фæкъаддæр уыдзæн 10 милуаны бæрц, æмæ бахахх кодта, ома, спорты популярондзинад у стратегион  хæслæвæрд  æмæ æнæниз царды уаг хъуамæ суа модæйон»

Дарддæр Остъаты Мадинæ куыд ра-дзырдта афтæмæй рабадты Уæрæсейы Федерацийы Паддзахадон Думæйы депутаттæ ноджыдæр бафидар кодтой, цæттæ кæй сты Уæрæсейы регионты фæсивæдон парламентты минæвæрттимæ æмæ фæсарæйнаг бæстæты æвзонг парламентаритимæ æм-куысткæнынмæ.

«Уыимæ иумæ ма нын 11-æм ноябры фем-бæлд уыд «Россотрудничество»-йы  Управленийы хистæры хæдивæг, фæсивæдон политикæйы хайады хистæр Еремина Натальяимæ. 11 ноябры уыд Уæрæсейаг политикæйы скъолайы фæндзæм сесси, Уæрæсейы Æхсæнадон палатæйы уынаффæ цыд Уæрæсейы Федерацийы Æхсæнадон палатæйы куысты принциптыл, æхсæнадæмон æмкуысткæнынады механизмтæ æххæст кæныныл, афтæ ма  проектон архайды рæзты перспективæтыл æмæ Палатæйы куыстмæ фæ-сивæды æрбакæныныл» – банысан кодта уый.

Остъаты Мадинæ куыд бамбарын кодта, афтæмæй программæ уыд цымыдисон æмæ алыварсон.

«Æмкуысткæнынад æмæ иумиаг проектты реализацийæн байгом уæрæх фæзуат. Мæнæн ацы проекты ахсджиагдæр фæстиуджытæй иу уыд, Уæрæсейы субъекттæй, Хæдбар Паддзахадты Æмхæларады бæстæтæй æмæ фæсарæнтæй курдиатджын, æвзонг профессионалтимæ кæй базонгæ дæн, уый. Уыдонæй æз райстой бирæ цымыдисон ног хъуыдытæ», – банысан кодта Мадинæ.

Уый куыд загъта, афтæмæй сессийы куысты рæстæджы йæ хайадисджытæн лæвæрд æрцыд хайадисæджы сертификаттæ.

«Стыр бузныг зæгъын мæ фæнды Хуссар Ирыстоны «Россотрудничество»-йы минæварадæн, ахæм уæрæсейаг политикæйы бæрзондквалификациджын скъолайы ахуы-рæн мын фадат кæй радта, уый тыххæй, афтæ ма мæ бузныг зæгъын фæнды «Уæрæсейаг политикæйы скъолайы» командæйæн, сæрмагондæй йæ къухдариуæггæнæг Александр Немцовæн», – йæ ныхасы кæронбæттæны загъта Остъаты Мадинæ.

Бæрæг куыд у, афтæмæй «Уæрæсейаг политикæйы скъола» у ног проект. Уый реализацигонд цæуы Уæрæсейы Федерацийы Президенты гранты фæрæзтæй (оператор –  «Уæрæсейаг фæсивæды цæдис»). Проекты фыццаг сесси уыд 2015 азы 26 январæй 31 январмæ.

ИА Рес