Æнæхъæн азы дæргъы бакæнгæ куысты фæдыл алы куыстуаты дæр саразынц хатдзæгтæ, цæмæй бахынцой сæ рæдыдтытæ æмæ дарддæр рараст кæной куысты процесс. Уымæ гæсгæ Мидхъуыддæгты министрады дæлхæйтты дæр уагъд цæуынц æмбырдтæ бакæнгæ куысты тыххæй, цыран хайад райсынц ведомствойы къухдариуæгады минæвæрттæ æмæ дæлхæйтты хистæртæ.

Гæззаты Вадимы номыл милицийы сæрмагонд нысаниуæджы къорды цы æмбырд уагъд æрцыд, уый йæ раныхасæй байгом кодта къорды хистæр инспектор Хъазиты Зелим.  Докладгæнæг банысан кодта, зæгъгæ, кæд æмæ 2021 азы спецкъорды раз дзæвгар хæстæ æвæрд уыд, уæддæр иу къабазы дæр нæ ныкъуылмпы ис сæ архайд.

«Æнæхъæн азы дæргъы къорды кусджытæ активон хайад истой æхсæнадон фæтк бахъахъхъæныны хъуыддаджы алыгъуызон культурон-массон, спортивон æмæ æндæр мадзæлтты рæс-тæджы. Се ‘ххуысы къух ма фæдаргъ кодтой криминалон милицимæ, Автоинспекцимæ, рæстæгмæдарæн изолятормæ, районты милицийы хайадтæм, Юстицийы минстрадмæ, республикæйы æфснайæн банкмæ. Уымæй уæлдай ма ОМОН-ы сапертæ 376 хатты басгæрстой алыгъуызон объекттæ, территоритæ æмæ зæрдæхсайгæ дзаумæттæ. Нæ разылæууæг хæстæ æххæст кæнынимæ нæ къуылымпы кæнынц физикон, психологон, тактикон цæттæдзинады хъуыддæгтæ рæнхъон скондимæ, – азы дæргъы 65 хаттæй фылдæр та уыдыстæм полигоны табелон æхсæнгарзæй нæ арæхстдзинад равдисынмæ. Рæнхъон сконд ма хайад иста республикæйы алыгъуызон спортивон мадзæлтты, цыран-иу бацахстой призон бынæттæ», – банысан кодта Хъазиты Зелим.

Паспортон-визæйон службæйы дæр азы дæргъы æмбæлонæй сæххæст кодтой сæ разылæууæг хæстæ. Алыгъуызон фарстаты фæдыл райстой сæхимæ 4 минæй фылдæр адæймаджы, 4 300 бæрц та басгæрстой Республикæ Хуссар Ирыстоны паспорт райсыны фæдыл æрмæджытæ.

Миграцийы фæдыл фарстаты управленийы дæр сарæзтой хатдзæгтæ сæ бакæнгæ куыстæн. 2021 азы регистрацигонд æрцыдысты 354 æндæрбæстаг гражданы æмæ 437 æндæрбæстаг гражданы та ацыдысты нæ республикæйæ. Ста-тистикæ йæ куыд æвдисы, афтæмæй иууыл фылдæр сты Таджикистаны æмбæстæгтæ, стæй та Узбекистан, Азербайджан æмæ Сомихыстонæй. Ацы управленийы инспектортæ æппынæдзух сæ хъус дарынц фæсарæйнаг æмбæстæгтæм, регуляронæй фæуадзынц рейдон мадзæлттæ æмæ азы дæргъы сбæлвырд кодтой 44 фæткхалæн цауы. Фæткхалджытæ иваргонд æрцыдысты. Уы-мæй уæлдай ма æнгом кусынц Ӕппæтдунейон Сырх Дзуары Комитетимæ, Арæнхъахъхъæнæг службæимæ æмæ юстицийы министрадимæ.

Цалдæр азы размæ нæ республикæйы арæзт æрцыд паддзахадон унитарон куыстуат «Ирбис», кæцы ис Мидхъуыддæгты министрады дæлбар. Хыгъдон æмбырды хорзыл банымадтой ацы куыстуаты архайд æмæ сын загътой арфæйы ныхæстæ. «Ирбис»-ы кусджытæ стыр æххуыс бакæнынц милицийæн бæрæгбонон мадзæлттæ уадзыны рæстæджы, стæй ма егъау куыст бакодтой карантинон мадзæлттæ райсыны рæстæджы нæ республикон рынчындоны.

Мидхъуыддæгты министры хæстæ æххæстгæнæг Пухаты Мераб хорзыл банымадта ацы уп-равлениты куыст аивгъуыйгæ азы, фæнысан кодта хъæндзинæдтæ дæр æмæ бамбарын кодта, зæгъгæ, куысты процесс æмæ дисциплинæ æдзух хъæуы хуыздæр кæнын, проблемон фарстатæ та скъуыддзаггонд хъуамæ цæуой æвæстиатæй.

ДЖИОТЫ Алыксандр

Comments are closed, but trackbacks and pingbacks are open.