15 январы милицийы Фæндагон змæлды æдасдзинады управленийы уагъд æрцыд хыгъдон æмбырд, цыран хатдзæгтæ сарæзтой сæ бакæнгæ куыстæн. Хайад дзы райстой милицийы æхсæнадон æдасдзинады хистæры хæдивæг Лалыты Геннади, милицийы хисæрмагонд æдасдзинады управленийы хистæр Гæззаты Валери, æхсæнадон фæтк бахъахъхъæныны фæдыл управленийы сæргълæууæг Гаглойты Маир, Паддзахадон инспекцийы къухдариуæгад æмæ рæнхъон кусджытæ.
Паддзахадон инспекцийы хистæры хæдивæг Ходты Сергей йæ раныхасы æрдзырдта 2020 азы бакæнгæ куысты фæдыл, анализ сарæзта инспекторты архайдæн æмæ радта статистикон бæрæггæнæнтæ æрцæугæ фæндагон-транспортон цауты тыххæй. Уымæй уæлдай ма сæ бакæнгæ куысты тыххæй раныхас кодтой управленийы дæлхæйтты сæргълæуджытæ.
2019 азимæ абаргæйæ, фæкъаддæр сты фæндагон-транспортон цаутæ. Азы дæргъы республикæйы фæндæгтыл æрцыд 137 аварийы, кæцыты алыгъуызон цæфтæ райстой 43 адæй-маджы. Статистикæмæ гæсгæ фæкъаддæр ис, рынчындонмæ чи бахаудта, уыдоны нымæц дæр. Авариты рæстæджы шофыр æмæ бæлцæттæ æдасæй куы баззайынц, кæнæ йæ фæстиуæгæн стыр зиæнттæ куынæ æрцæуы, уæд паддзахадон статистикæйы нымадмæ нæ бахауынц. Уымæ гæсгæ 2020 азы паддзахадон статистикæмæ бахаудтой æрмæстдæр 35 фæндагон-транспортон цауы.
Хъыгагæн, аивгъуыйгæ азы авариты фæстиуæгæн фæмард 3 адæймаджы (2019 азы та фæмард 4 адæймаджы). Уæззау цæфтæ райстой 14 адæймаджы, 29-æй та – уæлæнгай цæфтæ. Иннæ æрцæугæ авариты ныппырх сты æрмæст автомашинæтæ. Банысан кæнын хъæуы уый, æмæ кæд азæй-азмæ машинæты нымæц фылдæр кæны, уæддæр авариты æмæ фæндагон фæткойтæ фехалыны цауты нымæц та къаддæр кæны.
Анализ саразыны фæстиуæгæн рабæрæг сты авариты сæйрагдæр аххосæгтæ. Иууыл арæхдæр авариты бахауынц нозтджын шофыртæ, кæцытæ аххосджын сты 51 фæндагон-транспортон цауы. Уымæй уæлдай ма шофыртæ арæх фæцæуынц стыр тагъдадæй, рахизынц сæ ныхмæ цæуæг машинæты фæндагмæ, нæ фæкæсынц светофортæм æмæ иу уынгæй иннæ уынгмæ азилæнты нæ феххæст кæнынц фæндагон фæткойтæ. Æппæт ацы фæткхалæн цаутæй иууыл тæссагдæр у дæ ныхмæцæуæг машинæйы фæндагмæ рахизын.
Иууыл уæззаудæр цæфтæ райсынц ахæм авариты æмæ ма æрцæуы уды зиæнттæ дæр. Фæлæ уæддæр арæх фенæн вæййы горæты уынгты ахæм шофырты, кæцытæ нæдæр сæхиуыл фæхъуыды кæнынц, нæдæр – искæуыл, афтæмæй фескъæрынц стыр тагъдадæй искæй фæндагыл, фехалынц фæндагон фæткойтæ æмæ фыдбылыз æруадзынц. Ахæм шофыртæ кæнæ ахæстоны хъуамæ бадой, кæнæ сæм мауал хъуамæ уа машинæ скъæрыны бары гæххæттытæ, цæмæй нæ уынгты уа æдасдзинад.
Æдæппæт 2020-æм азы фæндагон змæлды æдасдзинады инспектортæ рабæрæг кодтой 9633 фæткхалæн цауы (2019 азы та уыдысты 11 156 фæткхалæн цауы). Кæд иумийагæй сисгæйæ, фæкъаддæр сты фæткхалæн цаутæ, уæддæр нозтджынты нымæц фæфылдæр ис 44 адæймаджы бæрц. Азы дæргъы рабæрæг ис 449 нозтджын шофыры, кæцытæ æфхæрд æрцыдысты закъоны фæл-гæтты. Инспектортæ фæивар кодтой шофырты 1 639 550 сомы бæрц, фæлæ дзы нырма паддзахады казнæмæ бафыстæуыд 432 050 сомы бæрц. Иннæты фæдыл ныридæгæн кусынц нæ респуб-ликæйы службæйон приставтæ.
Цæмæй фæндагон-транспортон цаутæ къаддæр кæной, уый тыххæй азы дæргъы уагъд цыдысты алыгъуызон рейдон мадзæлттæ. Ацы рейдты хайад истой куыд фæндагон змæлды æдасдзинады инспектортæ, афтæ мидхъуыддæгты министрады иннæ службæтæ дæр. Иумийагæй сисгæйæ, æнтыстджын куыст бакодтой инспектортæ, фæлæ горæт Цхинвалы ныридæгæн дæр транспортон уавæр у уæззау æмæ æндыгъд. Уымæ гæсгæ паддзахадон инспекци йæ разы хæс æрæвæрдта, цæмæй 2021 азы ноджы фæкъаддæр уой аваритæ æмæ макæй уадзой фæндагон змæлды фæткойтæ халын.
Джиоты Александр
Comments are closed, but trackbacks and pingbacks are open.