10 ноябры сæ профессионалон бæрæгбон банысан кодтой Мидхъуыддæгты министрады органты кусджытæ. Бæрæгбоны цытæн киноконцертон зал «Чермен»-ы уагъд æрцыд цытджын мадзал. Хайад дзы райстой Президент Гаглойты Алан, Хуссар Ирыстоны Уæрæсейы Федерацийы Æххæстбарджын минæвар Марат Кулахметов, хицауады уæнгтæ йæ сæрдар Джуссойты Константины сæргълæудæй, Парламенты депутаттæ йæ сæрдар Æлборты Аланы сæргълæудæй æмæ мидхъуыддæгты министрады кусджытæ.
Мадзалы райдианы цытджын уавæрты сценæмæ рахастой паддзахадон тырыса æмæ айзæлыдысты паддзахадон гимны зæлтæ.
Уый фæстæ раныхас кодта Хуссар Ирыстоны мидхъуыддæгты министр Гæззаты Валери. Уый æрдзырдта, милицийы рæнхъыты чи службæ кæны, уыдоны хæс рагæй фæстæмæ кæй у æхсæнадон фæтк æмæ закъон хъахъхъæнын.
«Стыр хъайтардзинад равдыстой милицийы рæнхъыты службæгæнджытæ Стыр Фыдыбæстæйон хæсты рæстæджы. Уыдонæн сæ патриотикон къахдзæфтæ сты абоны онг кæстæр фæлтæрæн фæзминаг æмæ цæвиттон», – загъта уый æмæ хъусдард аздæхта Хуссар Ирыстоны милицийы сырæзты историмæ.
«Хуссар Ирыстоны милицийы истори баст у нæ паддзахады сырæзты историимæ. Уый фæдыл мæ бузныджы ныхæстæ зæгъын фæнды барадхъахъхъæнæг органты ветерантæн. Абон дæр уыцы ветерантæй бирæтæ цæсгомджынæй æххæст кæнынц милицийы бæрнон куыст. Фыдыбæстæ иууыл уæззаудæр бонтæ куы æвзæрста, уæд милицийы рæнхъыты кусджытæ цæсгомджынæй æххæст кодтой сæ разылæууæг хæстæ, æппæтдæр арæзтой, цæмæй хъахъхъæд цæуа æхсæнадон фæтк æмæ закъон. Бирæтæ cæ цард радтой, цæмæй абон мах цæрæм хæдбар паддзахады. Уыцы хъайтартæн та сæ рухс ном нæ ферох уыдзæн махæй æнустæм», – банысан кодта Гæззаты Валери.
Мадзалы хайадисджытæ æмырæй алæугæйæ, ссардтой, барадхъахъхъæнæг огранты кусджытæй йæ сæр нывондæн чи æрхаста, уыдоны рухс нæмттæ.
Гæззаты Валери æрдзырдта, æвæрццаг фæстиуджытæ ма кæй дæттынц æхсæнведомствæйон ахастыты райрæзт æмæ Уæрæсейы Федераци æмæ нæ Республикæ Хуссар Ирыстоны Мидхъуыддæгты министрадты ‘хсæн сразыдзинæдтæ арæзт кæй цæуы, уый. Банысан кодта, Уæрæсейы Федераци цы егъау æххуыс кæны, ууыл. Нæ республикæйы Уæрæсейы Федерациийы руаджы цы иумæйаг информацион координацион центр конд æрцыд, уый куыстæн ныридæгæн ис хорз фæстиуджытæ. Афтæ ма автомобилон инспекцийы куыстæн «Æдас горæт»-ы фæлгæтты ис æвæрццаг къахдзæфтæ. Бирæ азты дæргъы министрады кусджытæн фадат нæ уыд пенсийы ацæуынæн, 20 азы бæрц министрадæн йæ бон нæ уыд фæмардуæвæг кусджыты бинонтæн компенсаци бафидын. Фæлæ Уæрæсейы Федерацийы финансон æххуысы фæрцы ацы фарстатæ скъуыддзаг æрцыдысты.
Цытджын мадзалы Мидхъуыддæгты министрады кусджытæ æмæ ветерантæн бæрæгбонон арфæйы ныхæстæ загъта бæстæйы сæргълæууæг Гаглойты Алан.
– Абон мах кад кæнæм, барадхъахъхъæнæг органты службæ йæ царды сæйраг нысан, кæмæн ссис æмæ фыдракæндты ныхмæ тох сæ царды иууыл ахсджиагдæр хъуыддаг кæмæн у, уыдонæн. Мидхъуыддæгты министрады æвæджиаг хæстæ сты фыдракæндты ныхмæ тох, закъондзинад ифтонг кæнын, æхсæнады фæтк æвæрын æмæ æмбæстæгты бартæ хъахъхъæнын. Уæ куысты эффективондзинады бæрæггæнæн баст у æхсæнады æууæнкдзинадыл. Бузныджы ныхæстæ мæ зæгъын фæнды барадхъахъхъæнæг органты ветерантæн, кæцытæ профессионализм æмæ патриотизм равдыстой, нæ республикæ иууыл зындæр уавæры куы уыд, уæд. Ныфс мæ ис абоны фæлтæр дæр сæ Фыдыбæстæйы раз аккагæй кæй æххæст кæндзысты сæ профессионалон хæстæ.
Гаглойты Алан паддзахадон хорзæхтæй схорзæх-джын кодта Мидхъуыддæгты министрады ветерантæ æмæ службæгæнджыты.
Министр Гæззаты Валери та барадхъахъхъæнæг органты кусджыты схорзæхджын кодта ведомствæйон хорзæхтæй.
Уæрæсейы Федерацийы Мидхъуыддæгты министры номæй арфæйы фыстæг бакаст иумæйаг Информацион координацион центры директор булкъон Василий Шепелев. Уый фехъусын кодта, Хуссар Ирыстоны барадхъахъхъæнæг органты кусджытæ Уæрæсейы Федерацийы Мидхъуыддæгты министрады ведомствæйон хорзæхтæй хорзæхджын кæй æрцыдысты, уый.
Бæрæгбон адарддæр концертон мадзалæй.
ТАНДЕЛАТЫ Виленæ
Comments are closed, but trackbacks and pingbacks are open.