Бæрæг куыд у, афтæмæй 2008 азы 26 августы Уæрæсейы Федераци Республикæ Хуссар Ирыстоны паддзахадон хæдбардзинад куы банымадта, уый фæстæ 9 сентябры Республикæ Хуссар Ирыстон æмæ Уæрæсейы Федерацийы ‘хсæн бындур æвæрд  æрцыд  дипломатон ахастытæн. Фараст азы дæргъы дыууæ паддзахады ‘хсæн арæзт æрцыд 90-æй фылдæр алыгъуызон сразыдзинады. Баконд æрцыдысты æмæ æнтыстджынæй кусынц минæварадтæ. Уыдон консулон функцитæй дарддæр æххæст кæнынц æндæр æмбæлон функцитæ дæр. Ацы куыстмæ  уæзгæ хай хæссынц хуссарирыстойнаг æмæ уæрæсейаг æддагполитикон ведомствотæ.

Хуссар Ирыстон æмæ Уæрæсейы ‘хсæн ахастытæн ис стратегион партнерон мидис. Уыдон рæзынц æмбар, кæрæдзийы интерестæн кад кæныны принциптæм гæсгæ. Абоны онг дæр Уæрæсейы Федераци æххуыс кæны Хуссар Ирыстоны социалон-экономикон проблемæтæ скъуыддзаг кæнынæн, дунеон аренæйы размæ кæны Хуссар Ирыстоны позици.

Хуссар Ирыстон æмæ Уæрæсейы Федерацийы ‘хсæн дипломатон ахастыты сырæзтыл 9 азы сæххæсты бæрæгбоны цытæн Парламенты бæстыхайы РХИ-йы Фæсарæйнаг хъуыддæгты министр  Медойты Димитр йæхимæ райста Республикæ Хуссар Ирыстоны Уæрæсейы Федерацийы минæварады кусджыты. Химæрайсты хайад райстой Хуссар Ирыстоны Уæрæсейы Федерацийы минæварады кусджытæ, РХИ-йы Фæсарæйнаг хъуыддæгты минæвæрттæ, Парламенты депутаттæ.

Парламенты Сæрдар Гасситы Петр раарфæ кодта æрæмбырдуæвджытæн бæрæгбоны цытæн æмæ ныфс бавæрдта, Хуссар Ирыстон æмæ Уæрæсейы ‘хсæн дарддæр дæр æппæтфарсон æмахастытæ кæй фидар кæндзысты æмæ кæй уæрæхдæр кæндзысты дыууæ паддзахады адæмты пайдайæн.

Уый фæстæ раныхас кодта Медойты Димитр. Уый раарфæ кодта æрæмбырдуæвджытæн Уæрæсе æмæ Хуссар Ирыстоны ‘хсæн дипломатон ахастытыл 9 азы сæххæсты цытæн.

Медойты Димитр куыд банысан кодта, афтæмæй 2008 азы 26 августы нæ республикæйы кæрон æрцыд Хуссар Ирыстоны ногдæр историйы иууыл вазыгджындæр рæстæгæн, Уæрæсейы Федерацийы æрдыгæй нæ паддзахады хæдбардзинад нымад кæй æрцыд, уый фæрцы. Уыимæ иумæ 9 сентябры Республикæ Хуссар Ирыстон æмæ Уæрæсейы Федераци кæрæдзимæ дипломатон нотатæ куы радтой, уæд кæронмæ фидар æрцыд Хуссар Ирыстоны хæдбардзинад, уый фæстиуæгæн Хуссар Ирыстон рахызт йæ ногдæр историйы ног этапмæ — сабырдзинад, стабилон цард æмæ размæцыдмæ.

Дарддæр Медойты Димитр куыд бафиппайдта, афтæмæй «Хуссар Ирыстонæн хъысмæтскъуыддзаггæнæн ссис сæрибардзинадмæ æмæ хæдбардзинадмæ Хуссар Ирыстоны цæрджыты фæндондзинад æмæ сæ æнæбасæтгæ тох, уыимæ иумæ ма Уæрæсейы къухдариуæгады принципиалон позици.

«Алы аз дæр 8 августы мах банысан кæнæм фыдохы бон — Хуссар Ирыстонмæ Саакашвилийы фашистон æфсæдты æрбабырсты бон. Уыцы бон Хуссар Ирыстоны ногдæр историйы нысан æрцæудзæн иууыл трагикондæр бонæй. Уыцы аз нæ адæмæн уыд уæззау цауты, бирæ удызиæнтты аз. Уыимæ иумæ ма 2008 азы август у нæ адæмы æмæ нæ горæт хъахъхъæнджыты æхсардзинад æмæ хъæбатырдзинады символ дæр. Уый тых-хæй 26 август æппæт Ирыстоны нысан цæуы куыд æппæтадæмон бæрæгбон, афтæ.

Фæстаг дыууæ æнус æмæ æрдæджы бæрц ирон-уæрæсейаг ахастытæ бирæ фæлварæнты рацыдысты, фæлæ нæдæр дуджы, нæдæр историйы ивындзинæдтæ фехæлдтой, уыцы бастдзинæдтæн æмæ ахастытæн нæ рагфыдæлтæ цы бындур æрæвæрдтой, уый. Иумиаг историон уидæгтæ, хæларсыхагон æмæ хæларадон ахастытæ, — ахæм нысаниуæг ис хуссарирыстойнаг-уæрæсейаг ахастытæн. Цард йæхæдæг фенын кодта уыцы фæндаджы растдзинад. Ирон-уæрæсейаг цæдис æрмæст хъахъхъæд не ‘рцыд, фæлæ ма бирæ хатт фæфидардæр æмæ рахызт ногдæр, гъæдджындæр æмвæзадмæ. Ирон-уæрæсейаг ахастытæ хуымæтæг нæ уыдысты, фæлæ уыдысты иузæрдыг. Уырны мæ, дарддæр дæр хуссарирыстойнаг-уæрæсейаг ахастытæ кæй рæздзысты динамикон æмæ фæдфæдылонæй, дыууæ паддзахады æддагпаддзахадон ведомствотæ та æмархайд кæндзысты конструктивонæй  нæ бæстæты ахастытæ рауæрæхдæр кæныныл нæ адæмты æдасдзинад сфидар кæныны охыл», — йæ нахасы кæрон банысан кодта Медойты Димитр.

Уый ноджыдæр раарфæ кодта æрæм-бырдуæвджытæн бæрæгбоны цытæн æмæ ма йæ ныхасмæ бафтыдта, зæгъгæ, Хуссар Ирыстоны адæм æгæрон аргъ кæнынц Уæрæсейы Федерацийы фарсхæцынад æмæ æххуысæн, аргъ кæнынц дыууæ паддзахады æмæ адæмты ‘хсæн хæлардзинад æмæ æмкуысткæнынгады традицитæн.

Хуссар Ирыстоны Уæрæсейы Федерацийы минæварады уынаффæгæнæг Сергей Манько куыд банысан кодта, афтæмæй 2008 азы 9 сентябры Хуссар Ирыстон æмæ Уæрæсейы ‘хсæн дипломатон ахастытæ арæзт кæй æрцыд, уымæй биноныг æрцыд историон рæстдзинад, кæцыйæн мингай азты развæд кодтой алайнаг-уырыссаг ахастытæ. Дыууæфарсон ахастыты сырæзтæй æххæстгуырахстæй йæ тыхы бацыд Венæйаг конвенци — дунеон ахастыты бындурон документ.

Сергей Манько куыд банысан кодта, афтæмæй Хуссар Ирыстоны адæмæн паддзахадон хæдбардзинад сæ къухы бафтыд бирæнымæц уды зиæнттæ æмæ хъизæмæртты фæстиуæгæн.

Уæрæсейы Федераци æмæ Республикæ Хуссар Ирыстоны ‘хсæн дипломатон ахастыты сырæзтыл 9 азы кæй сæххæст, уый цытæн  Республикæ Хуссар Ирыстоны Уæрæсейы Федерацийы минæварады номæй æрæмбырдуæвджытæн раарфæ кодта Сергей Манько.

Осиаты Индирæ

Comments are closed, but trackbacks and pingbacks are open.