Зынгæ этнограф, историон зонæдты доктор, Хуссар Ирыстоны зонæдты сгуыхт архайæг Гаглойты Зинаидæйы 100 азы юбилейы цытæн йæ хæстæджытæ æмæ æввахс адæм ивгъуыд къуырийы кæрон æрæмбырд сты Згъудеры уæлмæрды æмæ дидинджытæ сæвæрдтой йæ цырты раз. Уый фæстæ Зинаидæйы юбилейон мадзал адарддæр кодтой Хетæгкаты Къостайы номыл Хуссар Ирыстоны паддзахадон драмон театры. Ардæм æрбацыдысты Президент Гаглойты Алан, хицауады сæрдар Джуссойты Константин, ахуыргæндтæ, студенттæ æмæ Зинæйы хорз чи зыдта, уыцы æмбæстæгтæй бирæтæ.
Мысæн бонты ма хайад райстой Цæгат Ирыстоны делегацийы минæвæрттæ Гаглойты Анатолийы сæргълæудæй.
Номдзыд сылгоймаджы мысæн изæры раныхас кодта Гаглойты Алан. Уый банысан кодта, зæгъгæ, Зинаидæ бирæ сарæзта Ирыстон æмæ йæ адæмы размæцыды хъуыддаджы æмæ аккаг у, цæмæй йæ мысæм, зонын æй кæнæм æрыгон фæлтæртæн. Уый фæстæ бузныджы ныхæстæ загъта, мадзал бацæттæ кæнын кæй хъуыдымæ æрцыд, чи йæ бацæттæ кодта æмæ мадзалмæ чи æрбацыд, уыдонæн се ’ппæтæн дæр.
Мадзал амонæг Гаглойтэ Лианæ та æрæмбырдуæвджытæн радзырдта Гаглойты Зинаидæйы цард, архайд æмæ куыстыты тыххæй, театры фоейы цы равдыст байгом, уыцы æрмæджытимæ сæ базонгæ кодта æмæ сæ фæхуыдта театры залмæ.
Ам фыццаг цалдæр музыкалон уацмысы сæххæст кодтой Хуссар Ирыстоны паддзахадон музыкалон-инструменталон ансамбль «Айзæлд»-ы артисттæ. Паддзахадон ансамбль «Симд»-ы зарæггæнджыты æмæ кафджыты къордтæ дæр равдыстой сæ кафæн æмæ музыкалон номыртæ.
Сценæйыл ма цалдæр зарæджы акодтой Зинаидæйы хойы лæппутæ, РХИ-йы Адæмон артисттæ, Харебаты Вадим æмæ Харебаты Тимур. Зарæгæй зарæджы ‘хсæн экраныл æвдыст цыдысты документалон кинонывтæ. Гаглойты Зинаидæйы тыххæй сæ хъуыдытæ дзырдтой: Цыбырты Людвиг, Джуссойты Нафи, Гæбæраты Никъала, Санахъоты Мурат, Джиоты Мурат, Уанеты Владимир.
Гæззаты Иван
