Цхинвалы Сывæллæтты сфæлдыстады галуаны схорзæхджын кодтой 2015-2016-азты интеллектуалон хъазт «Зонды къуыбар»-ы уæлахиздзаутæ æмæ финалистты. Уый тыххæй фехъусын кодта галуаны ахуыргæнæг, хъазты организатор Битеты Маринæ.

Йæ ныхæстæм гæсгæ хъазт «Зонды къуыбар»-ы хайад райстой республикæйы скъолаты 8-æм кълæсты 473 ахуырдзауы.

«Традицимæ гæсгæ хъазты уыд 4 этапы. Алы туры фæстæ дæр хъазт кодта ва-зыгджындæр, æмæ уыцы иурæстæджы цымыдисондæр, мидисджындæр æмæ эмоционалондæр», — загъта Битеты Маринæ.

Уый ма банысан кодта, зæгъгæ, мадзалы рæстæджы хорзæхджын æцыдысты уæ-лахиздзаутæ хъазты ахæм номинациты: «Ирон æвзаджы дæснытæ» — Уалыты Кристинæ (2-æм астæуккаг скъола), «Ирон литературæ» —  Цхуырбаты Алинæ (1-æм астæуккаг скъола), «Ирыстоны истори» — Козаты Алан (Колыты Аксойы номыл аивæдты лицей), «Ирæтты æгъдæуттæ æмæ традицитæ» — Хуыгаты Орнеллæ «гимнази «Альбион»).

«Хъазты уæлахиздзаутæ хорзæхджын æрцыдысты интеллектуалон хъазт «Зонды къуыбар»-ы дипломтæ, статуэткæтæ æмæ Челехсаты Хъазбеджы чиныг «Осетия и осетины»-йæ. Хъазты иннæ финалисттæ дæр райстой æмбæлон сертификаттæ», — загъта Битеты Маринæ.

Уый ма йæ ныхасмæ бафтыдта, зæгъгæ, хъазты уæлахиздзаутæ æмæ финалисттæ систы «Чысыл Академийы» хъусджытæ. Уыдонимæ æнæхъæн аз кусдзысты Уанеты Захары номыл Хуссар Ирыстоны зонадиртасæн институты ахуыргæндтæ.

ИА «Рес»

Comments are closed, but trackbacks and pingbacks are open.