Хуссар Ирыстоны Мидхъуыддæгты министрад схорзæхджын кодта ведомствон хорзæхтæй милицийы хуыздæр фадыгон бæрнджынты. Уымæй уæлдай ма се службæйон архайды хуыздæр фæстиуджытæ чи равдыстой уыдонæн радтой æхцайы премитæ, – фехъусын кодтой министрады пресс-службæйы. Ведомствойы къухдариуæггæнæг Наниты Игорь, хорзæхджын чи æрцыдысты, уыдонимæ ныхас кæнгæйæ, банысан кодта милицийы фадыгон бæрнджынты куыстæн кæй ис стыр нысаниуæг æхсæнадон æдасдзинад ифтонг кæныны хъуыддаджы.
“Милицийы фадыгон бæрнджынты куыстæн стыр нысаниуæг ис æхсæнадон фæтк хъахъхъæныны хъуыддаджы. Сымахмæ бахатынц не ‘мбæстæгтæ, зын уавæры куы бахауынц, уæд. Уыдон æрбацæуынц ахæм ныфсимæ, кæй сын баххуыс кæндзыстут закъонмæ гæсгæ», – загъта Наниты Игорь.
Министр загъта, зæгъгæ, хуссарирыстойнаг милицийæн æмæ милицийы фадыгон бæрн-джынтæн сæ сæйраг хæс у æхсæнадон фæтк хъахъхъæнын æмæ организацигонд фыдракæнддзинадимæ тох кæнын.
Ведомствойы къухдариуæггæнæг банысан кодта, Мидхъуыддæгты органты архайдæн аргъгæнæг кæй сты адæм. Уымæ гæсгæ, милицийы кусджытæ хъуамæ æппæт дæр аразой, цæмæй закъонæн лæггад кæнгæйæ, лæггад кæной адæмæн.
Наниты Игорь ма фехъусын кодта, абоны бон Мидхъуыддæгты министрадæн цы материалон-техникон проблемæтæ фæзыны, уыдон кæй æрцæудзысты скъуыддзаг тагъд рæстæджы.
“Зæгъæн ис, æмæ 2018 азы райдайæнæй, РХИ-йы Президент æмæ хицауады æххуысæй нæ уавæртæ фæхуыздæр уыдзысты финансон æмæ материалон-техникон ифтонгкæнынады”, – загъта министр. Риуылдаргæ майдан “РХИ-йы Мидхъуыддæгты министрады милицийы хуыздæр фадыгон бæрн-джын” министры къухæй райстой мидхъуыддæгты Цхинвалы районы управленийы кусæг, милицийы майор Джиголаты Алан, афтæ ма мидхъуыддæгты Цхинвалы горæтон управленийы кусæг, милицийы капитан Нарыкъаты Вадим.
Comments are closed, but trackbacks and pingbacks are open.