Президент Бибылты Анатолийы сæргълæудæй коронавирусы инфекцийы ныхмæ архайды штабы рабадты Хуссар Ирыстоны сæйраг санитарон дохтыр Коцты Маринæ радзырдта, коронавирусы инфекцийæ рынчынты нымæц фылдæрæй фылдæр кæй кæны, уый тыххæй.
«Коронавирусы инфекцийы апарахаты коэффициент бæрзонд у. Октябры мæйы коронавирусы тыххæй тесттæ арæзт æрцыд 4384 адæймагæн, уыдонæй 31 процентæн низ сбæрæг», – загъта уый.
Æнæниздзинад хъахъхъæнын æмæ социалон рæзты министр Наниты Сослан банысан кодта, «сырх зонæйы» пациенттæ кæй фылдæр кæнынц, уый, афтæ ма туаггуыры æххуыс кæй хъæуы, уыдоны нымæц дæр.
«Иннæ рæстæджытимæ абаргæйæ, абон бирæ фылдæр хъæуы туаггуыр», – загъта министр.
Бибылты Анатоли министры хъусдард аздæхта бирæпрофилон медицинон центры хостæй ифтонгадмæ.
«Цæмæй рынчындон хостæй ифтонг уа, уый тыххæй паддзахад рахицæн кодта æхцайы фæрæзтæ. Уый фæстиуæгæн пациенттæ сæхæдæг ма хъуамæ æлхæной хостæ, ма хъуамæ уа ахæм цаутæ. Курæг дæ дæн, цæмæй дæ хъус æрдарай уымæ. Кæд ахæм цаутæ рабæрæг уа, уæд мын сæ хъуамæ фехъусын кæнай», – загъта Президент.
Ног коронавирусы инфекцийæ рынчынтæ кæй фылдæр кæнынц, уый тыххæй æмæ Республикæ Хуссар Ирыстоны территорийыл COVID-19-ы дарддæры апарахат æруромыны нысанæн райст æрцыд къорд мадзалы.
Сæрмагондæй, 2021 азы 1 ноябрмæ ахуыртæ уагъд нæ цæудзысты Хуссар Ирыстоны паддзахадон университеты, астæуккаг æмæ астæуккаг-профессионалон ахуыргæнæндæтты, скъолайы агъоммæ уагдæтты, сывæллæтты уæлæмхас ахуырады уагдæтты, сывæллæтты хиирхæфсæн центрты, сывæллæтты кафеты, аттракционты æмæ компьютерон клубты, физикон культурæ æмæ спорты объектты, ахæмты, куыд тренажерон залты, бассейнты æмæ спортивон секциты.
Фыццæгæм декабры онг нæй гæнæн чындзæхсæвтæ, цытджын мадзæлттæ æмæ динон мадзæлттæ аразын, нæй гæнæн культурон-массон, спортивон æмæ хиирхæфсæн мадзæлттæ уадзæн дæр.
Афтæ ма рекомендаци лæвæрд æрцыд, цæмæй марды кæндтæм дæр бирæ адæм ма цæуа.
Уымæй дарддæр куыстуæтты сæргълæуджытæн бар лæвæрд æрцыд, цæмæй рискы къордмæ чи хауы (сывæрджын сылгоймæгтæ, 65 азы кæуыл цæуы, уыдон, сæкæрниз, бронхты астмæ кæмæн ис, нард адæймæгтæ æмæ уыргты хроникон низтæй рынчынтæ, инсульт, инфаркт кæмæн уыд æ.а.д), уыдон раконд æрцæуой куысты дистанцион режиммæ, сæ куыстмыздтæ сын бахъахъхъæнгæйæ.
Уагдæтты къухдариуæггæнджытæн ма бар лæвæрд æрцыд, цæмæй, 10 азы кары онг сывæллæттæ кæмæн ис, уыцы ныййарджытæй иуы куыстæй сæрибар æрцæуа, йæ куыстмызд ын бахъахъхъæнгæйæ, цæмæй йæ сывæллонмæ кæса, уый нысанæн.
Министрадтæ, ведомствотæ æмæ организациты къухдариуæггæнджытæн бахæс æрцыд, цæмæй карзæй сæ хъус дарой «бацæуæнты фильтрмæ» буары тæвд æнæконтактонæй сбаргæйæ, куыстуæттæм цæуджыты къухтæ антисептиктæй айсæрдынмæ, маскæтæ æмæ дезинфекцион режиммæ, социалон дистанци хъахъхъæнынмæ.
Базарадон æмæ коммуналон объекттæн бахæсчындæуыд, цæмæй карзæй хъахъхъæной æмæ æххæст кæной, COVID-19-ы апарахат æруромыны тыххæй цы мадзæлттæ ист цæуынц, уыдон.
Оперативон штаб цы уынаффæ рахаста, уый йæ тыхы цæуы ацы азы 19 октябрæй.
Бибылты Анатоли хъусдард аздæхта вакцинацийы ахсджиагдзинадмæ дæр.
«Мах хъуамæ аудæм нæхиуыл æмæ бахъахъхъæнæм нæхи дæр æмæ нæ хæстæджыты дæр. Уый тыххæй иууыл хуыздæр у коронавирусы ныхмæ вакцинæ саразын. Суткæйы дæргъы COVID-19-æй чи фæрынчын вæййы, уыдоны нымæц хизы сæдæйæ уæлæмæ. Уый серьезон хъуыддаг у. Цыма хъуамæ æрцæуа, цæмæй адæм бамбарой вакцинацийы æнæмæнгхъæуындзинад», – банысан кодта Бибылты Анатоли.
Comments are closed, but trackbacks and pingbacks are open.