Адæмон иудзинады бон Уæрæсейы Федерацийы æрвылхатт дæр нысан æрцæуы цытджынæй. Фæлæ йын уæддæр иууыл стырдæр кад кæнынц ног сырæзт суверенон республикæтæ. Уымæн æмæ уыдонæн ацы бæрæгбон баст у канд национ æмбарындзинæдтимæ нæ, фæлæ ма сæм, фыдыбæстæйы сæрибардзинад æмæ хæдбардзинад бахъахъхъæныны тыххæй цы адæмы хаттытæ фæкастысты, уыдоны иудзинадимæ дæр.

— Æфсымæрон республикæ Донецкы дыккаг аз нысан кæнынц Адæмон иудзинады бон. Уый цытæн Донецкы Республикæмæ фæхуыдтой нæ республикæйæ уазджыты — Хуссар Ирыстоны Бастдзинад æмæ дзыллон коммуникациты комитеты сæрдар Джиголаты Хасан æмæ Паддзахадон унитарон куыстуат постон-телеграфон службæйы генералон директор Уалыты Владимиры.

Æфсымæрон Донецкы Республикæйы Джиголаты Хасан æмæ Уалыты Владимир фесты 3-æм ноябрæй 5-æм ноябрмæ.

Хуссар Ирыстонæй ныццæуæг уазджытыл цытджын æгъдауæй фембæлд Хуссар Ирыстоны Уæлвæткон æмæ æххæстбарджын минæвар Донецкы Адæмон Республикæйы Хъыбызты Таймураз.

Хуссар Ирыстоны Бастдзинад æмæ дзыллон коммуникациты комитеты сæрдар Джиголаты Хасан куыд загъта, афтæмæй уыдон хайад райстой цытджын мадзалы, кæцы уагъд цыд, Донецкы Адæмон Республикæйыл дыууæ азы кæй сæххæст, уый цытæн. Мадзалы официалон хай байгом кæныны церемонийы рæстæджы æфсымæрон республикæ Донецкы адæм стыр æхсызгонимæ дзырдтой, æндæр адæмтимæ сын цы бастдзинад ис, уый тыххæй, тых æмæ фидардзинад иудзинады кæй ис. Уадз, æмæ, дам, алчи дæр æргом уæд хæлардзинадмæ. Мæн уырны, уыдон ацы ныхæстæ æрмæст популярондзинады тыххæй кæй нæ дзырдтой, фæлæ  дыууæ азы размæ, уыцы хæстон цауты сæ фарсмæ цы нацийы минæвæрттæ балæууыд, уыдон кадæн», — дзырдта Джиголаты Хасан.

5-æм ноябрæй Хуссар Ирыстоны Бастдзинад æмæ дзыллон коммуникациты комитеты сæрдар Джиголаты Хасан æмæ Донецкы Адæмон Республикæйы бастдзинады министр Виктор Яценко сæ къухтæ æрфыстой меморандумыл бастдзинад, информацион технологитæ æмæ дзыллон коммуникациты фадыджы.

Ацы меморандумыл къухæрфысты фæстиуæгæн дыууæ æфсымæрон республикæйы ‘хсæн фæтынгдæр уыдзысты хæларадон бастдзинæдтæ информацийы фадыджы. «Тагъд нæ къухтæ æрфысдзыстæм роумингон æмахсты сразыдзинадыл дæр. Уымæн æмæ ныртæккæ нæ дыууæ республикæйы ‘хсæн цы роумингон бастдзинад ис, уый у æгæр зынаргъ. Куыддæр ацы сразыдзинадыл къухтæ æрфыстæуа, афтæ бæрæг фæаслам уыдзæн роумингон бастдзинад», — загъта Джиголаты Хасан.

Джиголаты Хасан ма куыд загъта, афтæмæй Адæмон иудзинады боны цытæн Донецкы Адæмон Республикæ бацæттæ кодта постон маркæтæ, дыууæ адæмы, ома, нæ республикæ æмæ Донецкы республикæты символикæтимæ. Уыцы зынаргъ маркæтæй лæварæн æрвыст æрцыд РХИ-йы Президент æмæ Парламенты номыл.

Хуссар Ирыстоны Бастдзинад æмæ дзыллон коммуникациты комитеты сæрдары Донецкы Адæмон Республикæйы бастдзинады министрад схор-зæхджын кодта Кады фыстæгæй, цыран дзырдæуы: «Донецкы Адæмон Республикæ æмæ Хуссар Ирыстоны адæмы ‘хсæн æфсымæрон ахастытæ рæзыны хъуыдаджы уæ активон хайадисты тыххæй».

Уæ зæрдыл уын лæууын кæнæм, дыууæ адæмы ‘хсæн ахæм ахсджиаг фадыджы фыццаг хатт кæй æрцыд къухфыст. Ацы ран стыр куыст бакодтой дыууæ республикæйы Фæсарæйнаг   хъуыддæгты министрадтæ дæр.

Уазæгты Марфа

Comments are closed, but trackbacks and pingbacks are open.