Хуссар Ирыстон йæхимæ здахы фæсарæйнаг капитал

Республикæйы разамынадæн раздæрау приоритетондæр сты социалон-экономикон рæзты фарстатæ.

РХИ-йы Президент Тыбылты Леонид хæс æрæвæрдта, цæмæй Хуссар Ирыстоны уавæртæ арæзт цæуа фæдфæдылон рæзтæн æмæ Хицауадæн бабæрн кодта республикæйы инфраструктурæйы рæзты фæдыл фæндæттæ бацæттæ кæнын. Рæзт хъуамæ ифтонг цæуа æрмæст хи ресурсты хыгъдæй нæ, фæлæ фæсарæйнаг хисæрмагонд капитал æрбахоныны хыгъдæй дæр.

Фæстаг азты стабилондзинад æмæ æдасдзинад, интенсивон æндидзæн процесс ирдæй фенын кодтой, республикæмæ гæнæн кæй  ис  капитал бавæрæн, йæ егъау потенциалæй йын спайда кæнгæйæ.

Ацы бонты Цхинвалмæ æрцыдысты хъуыддагон фæндæттимæ дыууæ стыр бизнесмены: Мæскуыйы арæзтадон индустрийы зæронддæр куыстуат, арæнгæрон акционерон æхсæнад «Арæзтадон æрмæджыты Мæскуыйы комбинат»-ы директорты Советы сæргълæууæг Андрей Чижик æмæ Полициæгты дунеон ассоциацийы Мæскуыйы регионалон хайады вице-президент Игорь Грязнов, кæцы ма у егъау хисæрмагонд компаниты къухдариуæггæнæг дæр.

Уыдон развæлгъау фембæлдысты Хицауады Сæрдар Хъуылымбегты Доменти æмæ йæ хæдивæг Козаты Димитримæ æмæ æруынаффæ кодтой Хуссар Ирыстоны эконом  æмæ бизнес-классы цæрæнуаты арæзтады фарстытыл, афтæ ма республикæйы банчы къабазмæ фæрæзтæ æрбаздахыныл.

Игорь Грязнов цæттæ у Хуссар Ирыстоны хисæрмагонд банк бакæнынмæ, кæцы потенциалон клиенттæн фæрæзтæ дæтта афæдз 5 проценты ставкæйыл. Андрей Чижик та фæнд кæны республикæйы цæрæнуатон базары фадæттæ сахуыр кæнын, цæмæй цæрджытæн уæй цæуой, сæ къух сын чи араза, ахæм аргъыл.

Фембæлды куыд банысанчындæуыд, афтæмæй, паддзахадæн стратегион нысаниуæг кæмæн нæй, уыцы экономикон къабæзтæм фæсарæйнаг капитал æрбахонын пайда уыдзæн бынæттон фæлхасгæнæгæн, афтæ ма фæтагъддæр кæндзæн экономикон прогресс.

Республикæ Хуссар Ирыстоны

Хицауады официалон сайт