Хуссар Ирыстоны цæрджытæн уадзынц диспансеризаци

Хуссар Ирыстоны соматикон рынчындоны базæйыл уагъд цæуы республикæйы цæрджыты, уыцы нымæцы сывæллæтты диспансеризаци. Уадзы йæ Уæрæсейы Федерацийы Федералон медико-биологион агентады медицинон къорд.

Уæрæсейаг медикты къорды сты ахæм дæныйадты специалисттæ, куыд неврологтæ, кардиологтæ, терапевттæ, хирургтæ, гинекологтæ, урологтæ, офтальмологтæ, отоларингологтæ, ультрамырон диагностикæйы дохтыртæ.

УФ-йы Федералон медико-биологион агентады мобилон комплексы ис цалдæр машинæйы медицинон ифтонггæрзтимæ – флюорографийы комплексимæ, маммографимæ æмæ цæугæ  лабораториимæ, кæцы ифтонг у иууыл нырыккондæр ифтонггæрзтæй.

Агентады медицинон къорды сæйраг дохтыр Алексей Шутов куыд загъта, афтæмæй Уæрæсейы Федералон медико-биологион агентады медицинон къорд, агентады къухдариуæггæнæг Владимир Уйбайы сæргълæудæй, Уæрæсейы Федерацийы Президент Владимир Путины бахæсмæ гæсгæ æрцыд Хуссар Ирыстонмæ цæрджытæн, уыцы нымæцы сывæллæттæн дæр диспансеризаци æмæ медицинон басгæрст ауадзынмæ.

Пациенттæй искæйы куы бахъæуа дарддæр дæр медицинон æххуыс, уæд сæ арвитдзысты Мæскуымæ Уæрæсейы Федералон медико-биологион агентады клиникон центрмæ.

Ныридæгæн уал бæрæг æрцыд, агентады клиникæмæ æрвыст чи хъуамæ æрцæуа, ахæм цалдæр рынчыны.

Уæрæсейы Федералон медико-биологион агентады медицинон къорды 47 специалисты Цхинвалы кусдзысты æртæ къуырийы бæрц, уый фæстæ та басгардзысты республикæйы районты цæрджыты.

Уæрæсейаг специалисттимæ иумæ кусынц Хуссар Ирыстоны дохтыртæ дæр. Сывæллæтты диспансеризаци цæуы Цхинвалы Сывæллæтты поликлиникæйы. Æрыгон пациентты чи сгары, уыдоны ‘хсæн ис педиатртæ, неврологтæ, кардиологтæ æмæ сывæллæтты хирург.

Уæрæсейы Федерацийы Федералон медико-биологион агентады медицинон къорд Хуссар Ирыстоны цæрджытæн диспансеризаци уагъта 2012 азы дæр.