«Хуссар Ирыстоны территорийыл таможнæйон æрнывылкæнынады фадыджы Евразиаг Экономикон цæдис æмæ Уæрæсейы Федерацийы барады архайды тыххæй» закъон цы фæахъаз уыдзæн Хуссар Ирыстоны адæмæн?
РХИ-йы юстицийы министр Гаглойты Олег нын радзырдта:
«Фыццаджыдæр уый, æмæ закъондæттынад кæй гармонизаци кæнæм. Уый бахынцгæйæ, растаможка, таможнæйон процедурæтæ уадзын, регистраци кæнын фæхуымæтæгдæр уыдзысты. Ацы хъуыддаджы Уæрæсейы æмæ Хуссар Ирыстоны закъондæттынадтæ суыдзысты æмхуызон. Кæд раздæр Уæрæсейы æмæ Хуссар Ирыстоны таможнæйон процедурæтæ кæрæдзийæ хицæн кодтой, уæд ныр та уыдзысты æмхуызон, нæ таможнæйон органты нал хъæудзæн, сæ уæрæсейаг коллегæтæ цы процедурæтæ ауагътой, уыдон аразын, уымæн æмæ-иу сæ цæттæйæ райсдзысты. Растдæр зæгъгæйæ та — дыууæ бæстæйы таможнæйон процедурæтæ дæр уыдзысты иумиаг, цæвиттон, уыдзæн нын иууон товарон номенклатурæ æмæ иууон процедурæтæ.
Дыккаг та уый, æмæ закъондæттынады гармонизацийы фæлгæтты уæрæсейаг фарс ныфс бавæрдта Хуссар Ирыстоны таможнæйон комитеты сифтонг кæнын программон ифтонгадæй æмæ æмбæлон техникæйæ».
Дарддæр юстицийы министр банысан кодта, зæгъгæ, «развæлгъау бадзырдæуыдзæн Евразиаг экономикон цæдисы иууон таможнæйон тарифты ставкæтæй пайда кæнынмæ рахизыныл æмæ товартæ æддæмæ ласыны тыххæй Уæрæсейы Федерацийы цы ставкæтæ ис, уыдоныл. Ахæм рахызты фæтк бæрæг кæндзæн, Уæрæсейы Федераци æмæ Хуссар Ирыстоны таможнæйон органты интеграцийы тыххæй 2016 азы цы Сразыдзинадыл æрфыстæуыд къухтæ, уымæ хауæг хицæн суагъæ.
Уыцы суагъæ арæзт æрцæудзæн, мидведомствойон процедурæты кæрæдзиимæ, афтæ ма уæрæсейаг фарсимæ æрæмных кæнгæйæ, дарддæр ыл къухтæ æрфыстæуыдзæн. Æппæт ацы процедурæты фæстæ суагъæ йæ тыхы бацæудзæн, Парламент æй куы сратификаци кæна, уæд. Уæрæсейы Федерацийы æрдыгæй йæ ратификаци нæ бахъæудзæн, уымæн æмæ дзы ницы ивындзинæдтæ æрцыд. Цæмæй ацы суагъæ йæ тыхы бацæуа, уый тыххæй хуссарирыстойнаг закъондæттынгады бахъæудзæн корректировкæ кæнын, уыцы нымæцы «Хуссар Ирыстоны территорийыл таможнæйон æрнывылкæнынады фадыджы Евразиаг Экономикон цæдис æмæ Уæрæсейы Федерацийы барады архайды тыххæй» закъоны дæр.
«Æппæт уыдæтты тыххæй йæ Хуссар Ирыстоны æрдыгæй хъæуы ратификаци кæнын», — бахахх кодта юстицийы министр.
Гаглойты Олег радзырдта, ацы закъон амалиуæггæнджытыл куыд бандавдзæн, уый тыххæй дæр.
Уый куыд банысан кодта, афтæмæй ныртæккæ дзырд нæ цæуы таможнæйон ставкæтæ фæфылдæр кæнын æмæ тарифон плæнттыл. Уыдоныл уынаффæ цæудзæн хицæнæй, кусдзысты сыл уæрæсейаг коллегæтимæ иумæ.
Хуссар Ирыстонмæ товар цы амалиуæггæнджытæ ласынц, уыдонæн дæр таможнæйон процедурæтæ фæхуымæтæгдæр уыдзысты, товарты таможнæйон декларацийы фæтк кæй фæхуымæтæгдæр уыдзæн, уый фæстиуæгæн.
Гаглойты Олегы ныхæстæм гæсгæ, закъон йæ тыхы бацæудзæн 2023 азы 1 январæй. Уæдæ ног азæй фæстæмæ Хуссар Ирыстоны территорийыл кусдзысты Евразиаг экономикон цæдисы нормæтæ.
РХИ-йы экономикон рæзты министр Тадтаты Дзамболат дæр фидарæй банысан кодта, зæгъгæ, «Хуссар Ирыстоны территорийыл таможнæйон æрнывылкæнынады фадыджы Евразиаг Экономикон цæдис æмæ Уæрæсейы Федерацийы барады архайды тыххæй» закъоны райст негативонæй нæ бандавдзæн хуссарирыстойнаг амалиуæггæнджытыл.
Уый куыд бамбарын кодта, афтæмæй 2021 азы 30 декабры райст æрцыд 2022-2025 азтæн Хуссар Ирыстоны социалон-экономикон рæзты программæ. Хицæн уæлæмхасæнæй дзы нысан æрцыдысты хъалонты закъондæттынады гармонизаци æмæ таможнæйон закъондæттынады гармонизаци. «Интеграцийы тыххæй» 2015 азы Сразыдзинады æмæ «Таможнæйон органты интеграцийы тыххæй» 2016 азы Сразыдзинадмæ гæсгæ, Хуссар Ирыстон хъуамæ рахиза таможнæйон фадыджы Евразиаг экономикон цæдисы закъондæттынадмæ. Тарифтæм хауæг фарстатæ дæр бæстон æрцæудзысты хицæн суагъæйæ.
«Цы закъон райстæуыд, уый дзурæг у, республикæ Евразиаг экономикон цæдисы закъондæттынадмæ кæй хизы, ууыл. Закъон фæахъаз уыдзæн Республикæ Хуссар Ирыстон æмæ Уæрæсейы Федерацийы таможнæйон органты интеграцийы фæдыл дарддæры куыстæн æмæ уыцы здæхты уæрæсейаг-хуссарирыстойнаг бадзырдты реализацийæн», — банысан кодта министр.
ОСИАТЫ Индирæ
Comments are closed, but trackbacks and pingbacks are open.