Республикæ Хуссар Ирыстоны Хицауады Сæрдар Пухаты Эрик раарфæ кодта Цхинвалы районы ахуырдзаутæ æмæ ахуыргæнджытæн Зонындзинæдты боны цытæн.
Пухаты Эрик азылд Рустау, Зар æмæ Дампалеты скъолатыл.
Премьер ахуырдзаутæн радзырдта, йæхæдæг дæр хъæууон скъола каст кæй фæцис æмæ банысан кодта, адæймаг кæм ахуыр кæны, сæйраг уый кæй нæу, фæлæ сæйраг у ахуырмæ йæ фæндондзинад æмæ йæ тырнындзинæдтæ.
«Сæйраг у сывæллоны ахуырмæ бацырын кæнын, цымыдисдзинад æм сæвзæрын кæнын», – загъта Пухаты Эрик скъолайы ахуыргæнджытимæ ныхас кæн-гæйæ.
Педагогтимæ ныхасы рæстæджы сын Хицауады Сæрдар фæндвидарæй загъта, зæгъгæ, Хуссар Ирыстоны хъæуты чысылкомплектон скъолатæ æхгæд не ‘рцæудзысты.
«Хъæуы фондз ахуырдзауы куы уа, уæд скъола кусдзæн, уымæн æмæ ахуырдзау ахуыргæнæн уагдонæй куы ацæуа, уæд йæ фæстæ ацæудзысты йæ ныййарджытæ дæр. Мах та хъуамæ сæндидзын кæнæм нæ хъæуты, фæхуыздæр кæнæм хъæуты цæрджыты цардуагон уавæртæ», – банысан кодта Пухаты Эрик.
Уыимæ иумæ ма уый базонгæ хъæуты скъолаты ахуыргæнинæгты ахуыры уавæртимæ дæр. Хицауады сæргълæууæг банысан кодта, зæгъгæ, æппæт уæ-вæг проблемæтæ дæр скъуыддзаг æрцæудзысты.
Банысан кæнын хъæуы уый, æмæ ног ахуыры аз Зары астæуккаг скъола базæйон кæй ссис Рустау æмæ Дампалеты скъолатæн.
Comments are closed, but trackbacks and pingbacks are open.