Хуссар Ирыстоны къухдариуæгад архайы æмæ биноныг кæны мидæггагон политикæйы æмрæнхъ, йе ‘ддагон политикæйы нысанмæздæхт куыст. Уыдон дыууæ дæр сты кæрæдзийыл æнгом баст. Азы райдианы нæ бæстæйы Президент Бибылты Анатоли сарæзта фыццаг официалон визит Европæмæ – Сербаг Республикæмæ. Ахæм политикон æгъдауæй абарст къахдзæфтæ бæстæйæн гом кæнынц уæрæх æддагполитикон фадæттæ æмæ гæнæнтæ, кæцытæй, кæй зæгъын æй хъæуы, пайда цæудзæн.

Ацы бæстæмæ балцы нысаниуæджы фæдыл нын сæ хъуыдытæ дзурынц:

Национ политикæ, культурæ, ахуырад, зонад, дин æмæ дзыллон информацион фæрæзты фæдыл РХИ-йы парламентон комитеты сæрдар Гæбæраты Юри:

– Нæ паддзахад нын хъуамæ дуне базона, базоной, кæй ис зæххы къорийыл паддзахад Хуссар Ирыстон. Нæ бæстæйы Президент Бибылты Анатолийы балц Сербаг Республикæмæ дæр уыд уыцы нысанæн. Ацы республикæ йæ рæстæджы Югославийы сконды уыд, фæлæ Югославийы ныппырхы фæстæ. Сербаг республикæ у хицæн республикæ æмæ уыдон дæр фæнды, цæмæй сæ æгас дуне базона. Æмæ Бибылты Анатолийы балц Сербаг Республикæмæ, мæнмæ гæсгæ, айхъуыст дунейыл, ома, кæд Хуссар Ирыстоны Президент бабæрæг кодта европæйаг бæстæ, уæд дунейыл ис паддзахад Хуссар Ирыстон. Уымæй ноджыдæр зæрдыл лæууын кæны, мах дæр ам стæм, мах дæр адæм стæм.

Æз уый нымайын хорз, æнтыстджын политикон къахдзæфыл. Бæстæйы сæргълæууæг æрмæст йæ кусæн хатæны куы бада æмæ бæстæйы æрмæст мидæггагон хъуыддæгтæ йеддæмæ йæ хъус куы ницæмæ дара, уый мæнмæ раст нæ кæсы.

Нырмæ нын нæ бæстæйы паддзахадон хæдбардзинад цыппар паддзахады банымадтой, уый фæстæ нæ банымайдзысты æн-дæртæ дæр æмæ афтæ дарддæр.

Бибылты Анатолийæн йæ сæйраг нысан у, цæмæй Ирыстоны Хуссар хай Цæгатимæ баиу уа æмæ афтæмæй Уæрæсейы скондмæ бацæуæм. Фæлæ ис æндæрхуызон хъуыдыгæнджы-тæ, зæгъгæ, кæд ахæм фæндагыл цæуæм, уæд ма нæ цæмæн хъæуы, æндæр бæстæтæ нын нæ паддзахадон хæдбардзинад банымайой, ууыл кусын. Уымæн афтæ æмбарæн ис – Уæрæсеимæ баиу уæвынæй дæр цалдæр бæстæйы ‘рдыгæй нымад паддзахад уыдзæн фидар æмæ тыхджын. Æмæ цас тыхджындæрæй баиу уай æндæр бæстæимæ, уыйбæрц бæстæйæн йæ бартæ фылдæр сты.

Бибылты Анатоли цы бæстæтæм цæуы, уым æрмæст йæхи нæ зонгæ кæны, фæлæ æгас Ирыстон æмæ йæ адæмы. Ахæм у йæ æддагполитикон курс. Æмæ æрмæст политикон бастдзинæдтæ нæ цæуынц биноныг, биноныг цæуынц экономикон æмæ культурон бастдзинæдтæ дæр. Культурæйы фадыджы йæ зонæм –  дыууæ республикæйы сфæлдыстадон коллективтæ цæудзысты кæрæдзимæ, экономикæйы та нæ суæртты дæттæ æрмæст Сербаг Республикæмæ нæ ласдзыстæм, фæлæ сæ ласдзыстæм  Донецкмæ дæр. Уый, мæнмæ гæсгæ, хорзæрдæм бандавдзæн нæ бæстæйы экономикон рæзтыл.

Мах 2008 азы августы хæсты рæстæджы дуне базыдта æвзæр хъуыддаджы руаджы. Ныр та архайæм, цæмæй нæ базоной   нæ рæзты, æнтысты æмæ ноджы бирæ хорз хъуыддæгтæй.

Историон зонæдты кандидат, РХИ-йы сгуыхт журналист Хъуылымбегты Роберт:

– Куыд хæдбар республикæ, афтæ махæн хъуамæ фидар кæной нæ æддагон бастдзинæдтæ. Кæд æмæ нæ стратегион нысан у Уæрæсеимæ баиу уæвын, уæддæр ныртæккæ тактикон æмвæзадыл хъæуы саразын, цæмæй нæ æддагон бастдзинæдтæ фидар кæ-ной, уыдон нымæцы æрмæст Уæрæсеимæ нæ, фæлæ къаннæг бæстæтимæ дæр. Кæд Сербаг Республикæ сæрмагонд паддзахад нæу, ис конфедера-цион сконды Босни æмæ Герцоговинæимæ, уæддæр ын ис йæхи æфсад. Иууыл сæйрагдæр та у Уæрæсейы Федерацийы ‘рдæм здæхт политикæ кæй уадзы, æмæ чырыстон диныл хæст кæй у. Уымæ гæсгæ стæм иу хъуыды æмæ иу фæндыл хæст.

Бæстæйы сæргълæууæг Бибылты Анатолийы балц Сербаг Республикæмæ у фыццаг æмæ ахсджиаг, Уæрæсейы политикон тыгъдадмæ чи хауы, уыцы бæстæмæ. Ахсджиаг фембæлдтытæ уыд уымæн бæстæйы политикон къухдариуæггæнджытæ, дины сæргълæуджытимæ æмæ бæстæйы раздæры династийы минæвар принц Томислав Карагеоргиевичимæ.

Æвæццæгæн, ацы балц азы райдиан кæй уыд, уый ныфс æмæ перспективæтæ радта нæ дарддæры æддагон бастдзинæдты рæзт æмæ архайдæн. Уымæн æвдисæн у, ацы бонты нæ Мидхъуыддæгты министр Медойты Димитры кусæгон балц Науру Республикæмæ. Уыдон сты кæрæдзийыл баст, кæд се ‘мвæзад хицæн кæны, уæддæр сæ нысаниуæг у иу. Уымæй æххæст цæуы, йæ бындур не ‘ддагон бастдзинæдтæ уæрæх æмæ райтынг кæнын кæмæн у, уыцы политикæ.

Къæбулты Маринæ

Comments are closed, but trackbacks and pingbacks are open.