Фæстаг рæстæджы дунейы экологон уавæр бæрæг кæй мæгуыраудæр кæны, уымæ гæсгæ ист цæуынц алыгъуызон мадзæлттæ. Нырыккон климатон ивындзинæдты проблемæмæ здæхт цæуы стыр хъусдард Республикæ Хуссар Ирыстоны æмæ РЦИ-Аланийы ахуыргæндты ‘рдыгæй дæр.

Ивгъуыд къуыри Дзæуджыхъæуы Цæгат Кавказы Хæххон-металлургон паддзахадон институты зонадон центры уагъд æрцыд дунеон зонадон-практикон конференци «Белые ночи-2019», «Рациональное использование природных ресурсов – основа развития горных территорий», зæгъгæ. Мадзалы организатортæ  уыдысты Экологи æмæ цардархайды зонæдты дунеон академи, æрдз хъахъхъæныны æппæтуæрæсейаг æхсæнады Цæгат Ирыстоны республикон хайад, РЦИ-Аланийы æрдзон ресурстæ æмæ экологийы министрад, Цæгат Ирыстоны уæлдæр ахуырадон уагдæттæ, паддзахадон æмæ зонад-иртасæн æндæр структурæтæ. Конференцийы хайад райстой Уæрæсейы бирæ регионты ахуыргæндтæ æмæ Китайæ бирæнымæц делегаци.

Экологон форумы хайад райстой Республикæ Хуссар Ирыстоны минæвæрттæ –  профессортæ, Хуссар Ирыстоны паддзахадон университеты биологийы кафедрæйы æмæ медикон-биологон иртасынæдты лабораторийы сæргълæууæг, МАНЭБ-ы хуссарирыстойнаг хайады къухдариуæггæнæг, академик Кокойты Теймураз æмæ ХИПУ-йы биологи æмæ химийы факультеты декан, МАНЭБ-ы академик Джиоты Циалæ.

Форумы пленарон рабадты æмæ секциты бакастæуыд докладтæ нырыккон экологийы уæлдай ахсджиагдæр проблемæты тыххæй. Профессор Кокойты Теймураз доклад бакаст ахæм темæйыл: «Проблемы демографии горных территорий и использование дикорастущих плодово-ягодных растений в Республике Южная Осетия», зæгъгæ. Джиоты Циалæйы  доклад та уыд «Исследования в области переработки растительного сырья, получения новых материалов, биологически активных веществ и медицинских препаратов». Хуссар Ирыстоны ахуыргæндты докладтæ стыр цымыдисдзинад сæвзæрын кодтой зонадон-прак-тикон конференцийы хайадисджытæм.

Конференцийы хайадисджыты зонадон уацтæ мыхуыр æрцыдысты журналы уырыссаг æмæ англисаг æвзæгтыл. Форумы хайадисджытæн мадзалы организатортæ бацæттæ кодтой цымыдисон культурон-æм-барынгæнæн программæ, уыцы нымæцы экскурси Ирыстоны хæхтæм.

ДЖИОТЫ Екатеринæ

Ацы æрмæджытæ дæр бакæс:

Ныхас зындгонд ирон ахуыргæндты зонадон архайдыл Зонадон конференци – Зонады бон Ссардтой зынгæ историк Цхуырбаты Иваны рухс ном Æрымысыдысты зындгонд ахуыргонды рухс ном. Бакастысты докладтæ Кавказ æмæ Хуссар Ирыстон политикты цæстæнгасæй

Comments are closed, but trackbacks and pingbacks are open.