РХИ-йы Хицауады Сæрдар Хъуылымбегты Доментийæн кусæгон фембæлд уыд Ахуырад æмæ зонады министр Гасситы Натали æмæ йæ хæдивджытимæ, цæмæй æруынаффæ кодтаиккой, республикæйы скъолатæ ног ахуыры азмæ куыд цæттæ сты, уыцы фарстытыл.

Фембæлды ма хайад райста Хицауады Сæрдары хæдивæг Пухаты Эрик, кæцы йæ хъус дары ахуырады фадыгмæ. Министрты кабинеты сæргълæууæджы цымыдис кодта, Хицауады сæрмагонд уынаффæмæ гæсгæ сфидаргонд мадзæлттæ куыд æххæст цæуынц, уый, кæцытæ ифтонг кæнынц ног ахуыры сæрмагонд азы æнтыстджын райдиан.

Гасситы Натали куыд фехъусын кодта, уымæ гæсгæ сæрдыгон мæйты республикæйы æппæт уагдæттæ цыдысты капиталон æмæ цæугæ цалцæг. Ныртæккæ уагдæттæ фесты цалцæггонд кæнæ та сты фæуынхъус.

«Практикон æгъдауæй æппæт скъолаты дæр ист æрцыдысты фыццаградон мадзæлттæ 1-æм сентябрмæ скъолаты бацæттæ кæныны тыххæй. Фæуд кæнынц цалцæггæнæн куыстытæ æрмæст хатæнты нæ, фæлæ хъармгæнæн системæты дæр», — банысан кодта уый.

Фембæлды рæстæджы уæлдай хъусдард здæхт æрцыд скъолаты материалон-техникон æмæ кадрон ифтонгадмæ. Гасситы Наталийы ныхæстæм гæсгæ, ацы аз райдыдта скъолаты библиотекæты регуляронæй баххæст кæныны фæдыл планонбæрцон куыст. Уый хъуамæ фæахъаз уа ныййарджытæн, кæцыты бахъæуы ахуыргæнæн чингуытæ балхæныны тыххæй дзæвгар æхца бахардз кæнын.

Уый æддейæ ма, ныхас кодтой уæлæмхас ахуыры фарстытыл дæр. Сæрмагондæй, Æвзонг натуралистты станцы æххæст куыст сифтонг кæнын. Ныртæккæ уагдоны ивд цæуынц электрон телтæ æмæ фыццаг уæладзыджы чысыл актон залы та æххæст цæуынц цалцæггæнæн куыстытæ, Æвзонг техникты станц дæр ифтонг цæуы цырд темптæй.

Хъуылымбегты Доменти банысан кодта уæлæмхас ахуыры нысаниуæг сывæллæтты монон-хæрзæгъдаудзинадыл хъомыл кæныны процессы.

«Сæйраг ахуыры æмрæнхъ фæсивæдæн хъуамæ фадат уа сæ индивидуалон социалон культурон æмæ ахуырадон домæнтæ реализаци кæнынæн, кæцытæ ивынц тынг тагъд», — загъта уый.

Кусæгон професситы престиж фæбæрзонддæр кæныны темæйыл ныхас кæнгæйæ, Хицауады Сæрдар срекомендаци кодта Ахуырад æмæ зонады министрадæн, цæмæй уæлдай хъусдард аздахой фæсивæдимæ профо-риентацион куысты фарстытæм.

Гасситы Натали куыд банысан кодта, уымæ гæсгæ Цхинвалы бирæпрофилон колледжæн йæ бон у республикæйы хъæуæг кусæгон кадртæй сифтонг кæнын, фæлæ, хъыгагæн, нырма фæсивæд разæнгардæй нæ пайда кæнынц ацы фадатæй. «Мах фæнд кæнæм хистæркъласонты ‘хсæн куыст адарддæр кæнын, цæстуынгæйæ сын фенын кæнын, колледжы æрмадзты ахуыртæ куыд цæуынц, уый, кæцы сын феххуыс уыдзæн иу кæнæ иннæ кусæгон дæсныйад равзарынæн», — загъта Ахуырады министр.

Ныхасы рæстæджы ма дзырд цыд районты, уыцы нымæцы арæнгæрон зонæты скъолаты кадртæй баххæст кæныны проблемæты темæйыл дæр. Гасситы Наталийы ныхæстæм гæсгæ,  ахуыры азы райдианы æнæмæнгхъæуæг у Цхинвалы скъолаты фæдаргъдæргонд боны программæйы фæдыл мониторинг саразын, цæмæй бæрæг æрцæуа уыцы сывæллæтты нымæц, кæцыты æцæгæйдæр хъæуы ахуыры ахæм формæ.

Хъуылымбегты Доменти бафиппайдта, зæгъгæ, ахуыры системæйы ма хъуамæ уа æнæэффективон программæтæ, æмæ æнæхъæн ахуырадон-хъомыладон процесс хъуамæ лæггад кæна иунæг нысанæн  — æххæст ахуырад сифтонг кæнын æмæ алыварсон размæдзыд гоймаджы схъомыл кæнынæн.

Фембæлдæн хатдзæгтæ аразгæйæ, уый банысан кодта, зæгъгæ, ис æппæт разæууæлтæ дæр радон ног ахуыры аз æнтыстджынæй райдайынæн æмæ раарфæ кодта ахуырады ведомствойы къухдариуæгадæн, ног ахуыры азмæ бацæттæ кæныны куыстытæ кæй сорганизаци кодтой, уый тыххæй.

«Ахуырады фадыджы хæстæ паддзахадæн сты приоритетон, æмæ мах цæттæ стæм æппæт хорз ногдзинæдтæн баххуыс кæнынмæ, кæцытæ здæхт сты ахуырады фыдыбæстæйон системæйы эффективондзинад фæбæрзонддæр кæнынмæ», — банысан кодта Хицауады Сæрдар.

 

РХИ-йы Хицауады

официалон сайт

Comments are closed, but trackbacks and pingbacks are open.