РХИ-йы Хицауады Сæрдар Хъуылымбегты Доменти, Ахуырад æмæ зонады министр Гасситы Наталиимæ фæуазæг сты Æвзонг натуралистты республикон станцмæ сæ куысты уавæртимæ сын базонгæ уæвыны нысанæн.

Уый федта зæххы фадыг, цыран сывæллæттæ ахуыр кæнынц хъæууонхæдзарадон куыстытыл, этнографион музей, цыран æмбырд æрцыдысты рагон дзаумæттæ, «удæгас къуым», кабинеттæ, афтæ ма фембæлд уагдоны коллективимæ дæр.

«Æз стыр цыт кæнын уæ педагогон архайдæн æмæ бузныг зæгъын уыцы ахуыргæнджытæн, кæцытæ иууыл уæззаудæр уавæрты дæр сæ куыст нæ ныууагътой. Коллективы руаджы уагдон цард хæсты азты дæр æмæ бахъахъхъæдта йæ хуыздæр традицитæ, кæцытæ æнтыстджынæй рæзынц абон дæр. Уырны мæ,  сывæллæтты хæрзæгъдаудзинад æмæ монон хъомылад кæй ис æууæнкджын къухты. Бузныг уын уæ æвæллайгæ куысты тыххæй!», — банысан кодта РХИ-йы Хицауады Сæрдар.

Уæ зæрдыл уын лæууын кæнæм уый, æмæ ивгъуыд аз Æвзонг натуралистты станц, гæнæн ис афтæ зæгъæн дæр, æмæ кæй райгуырд дыккаг хатт. Хицауад рахицæн кодта фæрæзтæ уагдоны иуæй-иу кабинеттæ сцалцæг кæныны, хъæрмадон системæ саразыны тыххæй æмæ самал кодта микроавтобус сывæллæтты ласынæн, кæцыйы руаджы уагдонæн йæ бон ссис æмбæлонæй кусын.

Абон уым уæлæмхас ахуырад исынц 460 ахуырдзауы Цхинвалы æппæт скъолатæй. Гасситы Натали куыд банысан кодта, уымæ гæсгæ æввахс рæстæджы уагдон райсдзæн ноджы иу комфортондæр транспортон фæрæз, кæцы ныридæгæн æлхæд æрцыд æмæ æнхъæлмæ кæсы Ахуырад æмæ зонады министрады æмбæлон документтæм.

Æвзонг натуралистты станцы директор Мæргъиты Ирбег радзырдта, уагдоны цы кружоктæ архайынц, уыдоны фæдыл, афтæ ма станцы куысты здæхтытыл дæр æмæ банысан кодта, зæгъгæ, сывæллæттæ стыр райгондæй архайынц практикон куысты, сæ хъус дарынц æрдзмæ, ахуыр кæнынц æрдззоныны бындуртæ.

«Сывæллæттæ цымыдис кæнынц алцæмæ æмæ мах дæр тырнæм, цымыдисон формæйы скъолайы теоретикон æгъдауæй цы цæуы, уыдон сын равдисынмæ. Нæ хæс у алфæмбылай дунемæ аудгæ ахаст дарыныл сывæллæтты сахуыр кæнын, удæгас æрдзы рæсугъддзинадæн аргъ кæнын, æмбæлон æмбарынгæнæн архайд сорганизаци кæнын», — загъта Мæргъиты Ирбег.

«Сывæллæттæн уæлдай æхцондзинад хæссы цæрæгойтæ æмæ зайæгойтæм зилын, «удæгас къуыммæ» экскурситæ, цыран нæ ахуыргæнджытæ радзурынц, нæ республикæйы территорийыл цахæм цæрæгойтæ цæрынц, чи сæфы, ахæм хуызтæм чи хауы æмæ уæлдай тынгдæр аудын кæуыл хъæуы, уыдоны тыххæй», — загъта уагдоны ахуыры хайы сæргълæууæг Гасситы Дзерассæ, уазджытæн Хуссар Ирыстоны флорæ æмæ фаунæйы минæвæртты стендтæ æмæ нывтæ æвдисгæйæ.

«Æрдзмæ уарзондзинад,  куыд иугонд экосистемæ афтæ йæ æнкъарынæн, цыран нæй уæлдай цæгтæ, ис стыр хъомыладон нысаниуæг рæзгæ фæлтæрæн», — бафиппайдта Хъуылымбегты Доменти, уый фæдыл Æвзонг натуралистты станцы архайдæн зын саргъгæнæн кæй у, уый банысан кæнгæйæ, кæцы скъоладзауты зонгæ кæны æрдзы дунейы алыгъуызондзинадимæ.

«Удæгас æрдзмæ æмхицдзинад рæзын кæны адæймаджы, кæны йæ хæларзæрдæ дæр», — загъта уый.

Ныхасы рæстæджы  æруынаффæ кодтой алыгъуызон темæтыл станцы æрвылбонон куысты хъуагдзинæдтæй республикон масштабы проблемæты онг. Хъуылымбегты Доменти радзырдта Хицауады куысты плæнттыл, уыцы нымæцы приоритетон здæхтыты тыххæй дæр, дзуапп кодта ахуыргæнджыты фарстытæн.

«Абоны бонмæ арæзт æрцыд бирæ уый тыххæй, цæмæй адæм сæхи банкъарой царды уæлдай комфортондæр уавæрты, федтой экономикæйы алы фадыджы реалон размæцыд, кæцыты бæрæггæнæнтæ хуыздæрæй хуыздæр кæнынц азæй азмæ. Уый тыххæй дзурын никæмæн хъæуы, уый æргом информаци у. Мах адарддæр кæндзыстæм размæцыд ивгъуыд азты фæлтæрддзинад хынцгæйæ. Сæйраг у, нæ архайдтыты консолидаци уæвын, нæ иумиаг хъуыддаг æргомæй аразын, нæ тыхтæ æрбамбырд кæнгæйæ», — банысан кодта уый.

Ацы аз Æвзонг натуралистты станцыл æххæст кæны 60 азы æмæ Хицауады Сæрдар баныфсæвæрдта, зæгъгæ, æппæт дæр сараздзæн, цæмæй фæрæзтæ ссардæуа æмæ  баххуыс кæной уагдоны хатæнтæ сцалцæг кæнынæн æмæ техникон инвентарь баххæст кæныны тыххæй.

РХИ-йы  Хицауады

официалон сайт

Comments are closed, but trackbacks and pingbacks are open.