Рæзы нæ горæт, бонæй-бон рæсугъддæр кæны, горæты хæрзарæзт уынгты нымæц дæр фылдæр кæны. Цыбыр рæстæгмæ хæрзарæзт æрцæудзысты ноджы цалдæр уынджы. Ацы уынгтыл хъазуатонæй кусынц Паддзахадон унитарон уагдон «Дорэкспоcтрой»-ы кусджытæ. Ацы куыстытæм æдзух йæ хъус дары æмæ сыл контроль кæны Хуссар Ирыстоны Хицауад.

Æрæджы дæр та Хуссар Ирыстоны Хицауады Сæрдар Хъуылымбегты Доменти бабæрæг кодта горæты уынгты арæзтады темптæ, кæцытæ арæзт цæуынц Республикæ Хуссар Ирыстоны социалон-экономикон рæзтæн ахъазгæнæг Инвестицион программæйы фæлгæтты. Инспекцион азылды рæстæджы Хицауады Сæрдаримæ уыдысты РХИ-йы Арæзтад, архитектурæ æмæ цæрæнуатон-коммуналон хæдзарады министрады минæвæрттæ министры хæдивæг Гаглойты Сергейы сæргълæудæй, семæ ма уыд Республикæйы Паддзахадон унитарон уагдон «Дорэкспострой»-ы директор Гуыззыдтаты Эдуард.

Инспекцион азылды хайадисджытæ сæрмагондæй бабæрæг кодтой, Хетæгкаты Къостайы æмæ Тугъанты Махарбеджы уынгтыл хæрзарæзтон куыстытæ цы темптæй цæуынц, уый, уымæн æмæ уыцы уынгты куыстытæ сты фæуынхъус.

Гаглойты Сергейы ныхæстæм гæсгæ, Хетæгкаты Къостайы уынгыл хæрзарæзтгæнæн куыстытæ кæронмæ фæхæццæ кæнынц. Тугъанты Махарбеджы уынгыл куыстыты сæйраг хай дæр баконд æрцыд.

«Графикмæ гæсгæ куыстытæ баконд æрцæудзысты сентябры кæрон», — бамбарын кодта Гаглойы фырт.

Дарддæр Хъуылымбегты Доменти бабæрæг кодта Горькийы уынгыл арæзтадон куыстытæ. Республикæйы Паддзахадон унитарон уагдон «Дорэкспо-строй»-ы инженер Елзарты Къоста куыд фехъусын кодта, афтæмæй ныртæккæ кæнынц фæндаджы асфальтмæ цæттæгæнæн куыстытæ. Уыцы куыстытæ фæуыдзысты къуырийы кæронмæ æмæ уынг цæттæ уыдзæн асфальтмæ.

Уырдыгæй Хъуылымбегты Доменти араст Дзадтиайы фырты уынгмæ. Ацы уынгыл ивд цæуынц зæххы бын коммуникацитæ. Уыцыиу рæстæджы йæ цæттæ кæнынц асфальтмæ дæр. Инспекцион азылды хайадисджыты ныхæстæм гæсгæ, фæндаг реконструкцигонд куы фæуа, уæд 8-æм июны уынгыл уыйбæрц машинæтæ нал цæудзæн, уымæн æмæ машинæтæй бирæтæ цæудзысты Фæскомцæдис — Дзадтиайы фырты уынгтыл.

Дзадтиайы фырты уынгыл уæвгæйæ Хицауады Сæрдармæ бахатыд Чилæхсаты Мария. Йæ ныхæстæм гæсгæ, 2008 азы августы хæсты рæстæджы бахъыгдард йæ хæдзары агъуыст æмæ бахатыд Хъуылымбегты Доментимæ, цæмæй йын баххуыс кæна йæ проблемæ аскъуыддзаг кæнынæн.

Хицауады Сæрдар ныфс бавæрдта Чилæхсаты Марияйæн, зæгъгæ, цы гæнæн уа, уымæй агуырд цæудзысты фадæттæ проблемæ аскъуыддзаг кæныны тыххæй.

Дарддæр Хъуылымбегты Доменти бабæрæг кодта Фæскомцæдисы уынджы арæз-тадон куыстытæ. Уыцы уынгыл дæр ивд цæуынц зæххы бын коммуникацитæ æмæ йæ цæттæ кæнынц асфальтмæ. Ацы уынджы цæрджытæ Хицауады Сæрдарæн фехъусын кодтой, зæгъгæ, сæм ныр цалдæр боны нæ цæуы нуазыны дон.

Хъуылымбегты Доменти телефонæй адзырдта Паддзахадон унитарон уагдон «Водоканал»-ы директор Зассеты Сергеймæ æмæ йын бахæс кодта, цæмæй оперативонæй аскъуыддзаг кæна уынджы донифтонгады проблемæ.

Инспекцион азылды хайадисджытæ бабæрæг кодтой Интернационалон уынджы арæзтадон куыстыты дæр. Ацы уынджы арæзтадон куысты темптæ графикæй фæстейæ кæй баззадысты, уый фæстиуæгæн сæ премьер райгондæй нæ баззад.

Уырдыгæй Хицауады Сæрдар араст Кобылы фырты уынгмæ. Инспекцион азылды хайадисджытæ куыд федтой, афтæмæй Кобылы уынджы иу хайыл активонæй цæуынц асфальтгæнæн куыстытæ, уынджы иннæ хайы та интенсивонæй цæттæ кæнынц асфальтмæ.

Инспекцион азылды кæрон Хъуылымбегты Доменти банысан кодта, зæгъгæ, горæты уынгты хæрзарæзтон куыстытæ æдзух дæр сты республикæйы къухдариуæгады контролы бын.

«Ис республикæйы Президенты хæслæвæрд, цæмæй, планмæ гæсгæ ацы аз цы уынгтæ хъуамæ æрцæуой хæрзарæт, уыдон эксплуатацимæ лæвæрд æрцæуой рæстæгыл», — бамбарын кодта Хъуылымбегты Доменти.

Уый банысан кодта, зæгъгæ, æртæ уынгыл — Цхинвалы, Хетæгкаты Къостайы æмæ Остъайы фырты уынгтыл куыстытæ практикон æгъдауæй кæронмæ бахæццæ сты.

«Æппæт куыстытæ дæр æххæст цæуынц развæлгъау сфидаргонд графикмæ гæсгæ, — загъта Хъуылымбегты Доменти. — Иннæ уынгтыл дæр эксплуатацимæ рæстæгыл радтынæй дарддæр контроль цæуы бакæнгæ куыстыты гъæдыл дæр».

Хицауады Сæрдар бахахх кодта, зæгъгæ, арæзтадон куыстыты рæстæджы бæрæг зындзинæдтæ æвзарынц, уыцы куыстытæ цы уынгтыл цæуынц, уыдон цæрджытæ.

Премьер-министр æмбæлон хæслæвæрдтæ радта, цæмæй кусджытæ бацархайой ууыл, æмæ дон зæронд доны хæтæлтæй ногтæм иу кæнгæйæ, доны цыды бæстон кæныны рæстæг уа минималон, цæмæй адæм рæстæгыл райсой нуазыны дон.

Хъуылымбегты Доменти куыд загъта, афтæмæй Фæскомцæдисы æмæ Дзадтиайы фырты уынгтыл куыстыты бæрц бирæ у. Уый фæстиуæгæн ацы уынгтæ, планмæ гæсгæ, эксплуатацимæ лæвæрд хъуамæ æрцæуой октябры мæйы.

«Иннæ уынгтæ эксплуатацимæ лæвæрд æрцæудзысты сентябры. Не ‘мбæстæгтæ ацы аз райсдзысты 11 хæрзарæзт уынджы. Уый бандавдзæн горæты æддаг хуызыл дæр æмæ столицæйы цæрыны комфортыл дæр», — банысан кодта Хъуылымбегты Доменти æмæ ма йæ ныхæстæм бафтыдта, зæгъгæ, Инвестицион программæйы фæлгæтты фи-дæн азы дæр иннæ уынгты хæрзарæзтон куыстытæ дарддæргонд цæудзысты.

Нæ уацх.

 

 

Comments are closed, but trackbacks and pingbacks are open.