12-æм октябры Хуссар Ирыстоны рагондæр уæлæмхас ахуырадон-хъомыладон уагдæттæй сæ иу — Æвзонг натуралистты республикон станц банысан кодта йæ юбилей  — сæххæст ыл 60 азы. Æмæ 60 азы та цъус, мыййаг, куынæ сты, цæмæй уæлæмхас ахуырадон уагдон æвзонг фæлтæримæ  уал азы дæргъы цы хъæуæг æмæ хæрзиуæгон куыст кæны, уый фæдыл сæхицæй раппæлыдаиккой. Коллектив æппæлыны аккаг та æнæмæнгæй сты рæзгæ фæлтæримæ сæ цæсгомджын æмæ æвæллайгæ куысты тыххæй.

Ацы бон Æвзонг натуралистты республикон станцы паддзахиуæг кодта уæлдай æнахуыр хъарм атмосферæ. Уагдон уыд бæрæгбонвæлыст. Кадджын бæрæгбон та æнæ уазджытæй кæй нæ фидауы, уымæ гæсгæ юбиляр-коллектив сæ уарзон уагдоны кæрты хъæлдзæг зæрдæйы равгимæ æнхъæлмæ кастысты се ‘рхонгæ уазджытæм. Станцы кусджытæн раарфæ кæнынмæ фыццаг æрбацыд РХИ-йы Президент Бибылты Анатоли. Уæдмæ фæзындысты иннæ уазджытæ дæр — РХИ-йы Ахуырад æмæ зонады министр Гасситы Натали, Сывæллæтты сфæлдыстады галуаны директор Джиоты Арянæ йæ дæлбар уагдоны кусджытимæ, РХИ-йы Фæсивæдон политикæ, спорт æмæ туризмы фæдыл комитеты сæрдар Зассеты Сергей, Медиа-центр «Ир»-ы директор Гаглойты Иринæ æмæ æндæртæ.

Цалынмæ бæрæгбонон мадзал нæ райдыдта, уæдмæ уал уазджытæ, уыцы нымæцы Президент Бибылты Анатоли дæр, азылдысты уæлæмхас ахуырадон уагдоны хатæнты æмæ сын федтой сæ куысты уавæртæ. Мадзал уагъд æрцыд станцы актон залы. Ацы зал кæд цалцæг æрцыд æмæ йæ уындæй зæрдæ райы, уæддæр ахæм егъау мадзæлттæ уадзынæн чысыл  у. Фæлæ цард размæ цæуы æмæ фарн йемæ хæссы.

Бæрæгбонон мадзал амыдта уагдоны бæстæзонæн  кружок «Мой край»-ы ахуыргæнæг Тедеты Ингæ. Уый лæмбынæг радзырдта станцы сырæзты историйы тыххæй. Загъта, зæгъгæ, куыд æппæт рæстæджыты, афтæ абон дæр уагдоны кусы курдиатджын æмæ æнгом коллектив æмæ, зæгъ, дарддæр кæнынц станцы кадджын традицитæ. Банысан ма кодта, зæгъгæ, райгонд сты сæ директор Мæргъиты Ирбегы архайдæй. Ирбег райгуырд Ирыстоны рæсугъддæр къуымтæй сæ иу — Тлигомы. Æвæццæгæн, зæгъ, ын йæ райгуырæн хъæуы диссаджы æрдзы  рæсугъддзинад фæахъаз сты æрдз уарзынæн æмæ уыцы уарзондзинад рæзгæ фæлтæрæн дæттынмæ. Уый, зæгъ, у тынг куыстуарзаг æмæ хæдзардзин адæймаг, рæхсы æппæт кæнинаг куыстытæм дæр.

Мадзалы раныхас кодта Мæргъиты Ирбег йæхæдæг дæр. Уый нæ ахызт уагдоны раздæры къухдариуæггæнджыты æмæ кусджыты иувæрсты, алкæй ном дæр сæ ссардта. «Натуралист професси нæу, уый у цардыуаг. Натуралист у ахæм адæймаг, кæцы æнахуыр уарзтæй уарзы æрдз. Ацы уагдоны къæсæрæй 60 азы дæргъы бирæ ахуырдзаутæ, бирæ æвзонг фæлтæр æрбахызтысты æмæ сын ам сæ зонындзинæдтæ æнæвгъау амыдтой станцы ахуыргæнджытæ, ахуыр сæ кодтой æрдзы зæххы куыст уарзыныл. Уыдонæй бирæтæ сæ сомбоны професси равзæрстой ацы уагдоны кружокты руаджы. Бузныг уæ зæгъын алкæмæн дæр, нæ иумиаг бæрæгбон немæ кæй адих кодтат, уый тыххæй», — загъта Мæргъиты Ирбег.

Кæй зæгъын æй хъæуы, юбилейы цытæн станцы кусджытæн раарфæ кодта РХИ-йы Президент Бибылты Анатоли: «Абон ацы уæлæмхас ахуырадон уагдоны ис æцæг рæсугъд бæрæгбон. 60 азы дæргъы ардæм цæуынц сывæллæттæ æмæ сæ ахуыр кæнынц  æрдзыл аудыныл, цæрæгойтæ уарзыныл. Мæнæн æхсызгон у, чысылæй æз дæр ардæм кружоктæм кæй цыдтæн, уый. Иннæ ахæм ма мын æхсызгон у уый дæр, æмæ цы чиныг-альбом рафæлдæх-тон, уым мæ ныв дæр æмæ ме ‘мбæлтты нывтæ дæр кæй сты. Мæ зæрдæ уын зæгъы дарддæры æнтыстытæ уæ ахсджиаг куысты. Баххуыс уын кæн-дзыстæм, цы чиныгыл кусут, уымæй 150 экземпляры рауадзынæн. Бæрæгбоны хорзæх уæ уæд». Бæстæйы сæргълæууæг Бибылты Анатоли Æвзонг натуралистты станцы коллективы схорзæхджын кодта РХИ-йы Президенты Кады грамотæйæ. Баныфс сын æвæрдта, юбилейон лæвар дæр сын кæй бакæндзæн, уымæй.Йæ коллегæтæ æмæ уазджытæн раарфæ кодта уагдоны ахуыры хайы сæргълæууæг Гасситы Дзерассæ: «Абон мах нысан кæнæм нæ иумиаг бæрæгбон æмæ уын арфæ кæнын уе ‘пптæн дæр. Ацы уагдон нæ сывæллæтты уарзон бынат у. Гуырдзиаг-ирон ныхмæлæуды райдианæй фæстæмæ нæ кусджытæ иу бон дæр нæ ныууагъой сæ куыст, бахъахъхъæдтам уагдоны. Абон станцы кусы 19 программæйы. Зæгъæм, Гæбæраты Луизæйы къухдариуæгадæй сывæллæттæ зайын кæнынц уырыдзыйы цалдæр сорты. Мæргъиты Ларисæйы къухдариуæгады бын та зайын кæнынц урс æмæ бур хъæдындзы хуызтæ æмæ иу гектарæй райстой 60 центнеры. Уый стыр æнтыст у. Ноджыдæр ыл бакусдзыстæм æмæ нæ иртасæнтимæ базонгæ кæндзыстæм хъæууон хæдзарады кусджыты. Ныр дыууæ азы дæргъы æвзонг натуралисттæ бæрæг кæнынц боныгъæды бæрæггæнæнтæ дæр. Мæргъиты Ирбег у æцæг ирон нæлгоймаг. Уый йæхæдæг ауадзы конкурс «Зон дæ райгуырæн бæстæ», зæгъгæ. «Ирон къæбиц»-ы Хъоцыты Фирæйы сæргълæудæй сывæллæттæ ахуыр кæнынц ирон хæринæгтæ аразыныл. 8-æм апрелы уагдоны уагъд æрцыд ирон уæлибыхты бæрæгбон. Тынг хорз кусынц дидинджытæ зайын кæныныл Хъуылымбегты Евелинæ, Джыккайты Зоя, Дзагнидзе Ламарæ, кæцы станцы кусы 52 азы. Арæх ауадзæм экологон акцитæ, куыд зæгъæм, «Цъæх æвзар», «Сыгъдæг суадон». Сывæллæтты  балцыты акæнæм Ирыстоны алы къуымтæм. Нæ уагдоны юбилейы цытæн æрæджы стадионы цур ныссагътам  самшиты 60 талайы Чилæхсаты Заирæйы къухдариуæгадæй. Мах дарддæр дæр архайдзыстæм, цæмæй нæ куыст размæ цæуа æмæ нæм фылдæр сывæллæттæ цæуой нæ программæтæм. Ноджы дæр уæ бæрæгбоны хорзæх уæд».

Коллективæн раарфæ кодта Ахуырады министр Гасситы Натали дæр. Уый банысан кодта, зæгъгæ, ацы уæлæмхас ахуырадон уагдон ныридæгæн у брендон организаци. Загъта, зæгъгæ, станцмæ цæуы бирæ сывæллæттæ æмæ, зæгъ, тынг райгонд сты уагдоны директоры куыстæй. Гасситы Натали станцы коллективы схорзæхджын кодта РХИ-йы Ахуырад æмæ зонады министрады Кады грамотæйæ. Балæвар сын кодта фотоаппарат.

Станцы кусджытæн арфæйы ныхæстæ загъта Сывæллæтты сфæлдыстады галуаны директор Джиоты Арянæ. Уый загъта, зæгъгæ, æнхъæл уыд уагдоны ивындзинæдтæ кæй æрцыд, фæлæ ахæм бирæ ивындзинæдты æнхъæл нæ уыд. Бирæ хъарм ныхæстимæ сын Джиоты чызг балæвар кодта микроуылæнон пец.

Мадзалы ма æрæмбырдуæвджыты раз раныхас кодта уагдоны раздæры директор Козаты Жаннæ. Уый банысан кодта, зæгъгæ, алкæмæндæр  ис ацы уагдонимæ баст йæхи мысинæгтæ. Тынг хорз коллектив дзы уыд æмæ ныр дæр ис. Уæлдай тынгдæр банысан кодта уагдоны раздæры директор Къудухты Маринæйы æвæллайгæ куысты. Уый станцы дирек-торæй бакуыста 27 азы дæргъы æмæ йæ къухдариуæгады  рæстæджы Советон Гуырдзыстоны нымад цыд иууыл хуыздæр уагдоныл.

Станцы директор Мæргъиты Ирбег уагдоны хуыздæр æмæ рагондæр кусджыты схорзæхджын кодта Кады грамотæтæй. Иу уысм æмырæй алæууынæй  ссардтой, се ‘нусон бæстæм чи аивгъуыдтой, уыцы æмкусджыты нæмттæ. Мадзалы  ма раныхас кодтой Медиа-центр «Ир»-ы директор Гаглойты Иринæ, уагдоны раздæры хъомылгæнинæгтæ Бибылты Ирæ, Гуфтайы астæуккаг скъолайы директор Тедеты Гретæ æмæ Бибылты Ацæмæз. Ацæмæз уагдонæн бакодта зæрдылдарæн лæвар дæр. Мадзалы рæстæджы экраныл æвдыст цыдысты станцы архайдимæ баст кадртæ.

Æрæмбырдуæвджыты раз сæ аивадон арæхстдзинад равдыстой æмæ сын сæ зæрдæтæ бахъæлдзæг кодтой Дзауы районы Гуфтайы астæуккаг скъолайы ахуыргæнинæгтæ, Сывæллæтты сфæлдыстады галуаны хъомылгæнинæгтæ, уыцы нымæцы брейк-дансы къорд «Арс»-ы хайадисджытæ, 1-æм скъолайы æмæ скъола-интернаты ахуырдзаутæ.

Джиоты Екатеринæ

Comments are closed, but trackbacks and pingbacks are open.