РХИ-йы Ахуырад æмæ зонады министрады зонад æмæ профессионалон ахуырады хайады сæргълæууæг Цыбырты Альдæ куыд фехъусын кодта, афтæмæй Республикæ Хуссар Ирыстоны «Россотрудничество»-йы минæварад æрвылаз дæр хуссарирыстойнаг рауагъдонтæн рахицæн кæны лимиттæ Уæрæсейы Федерацийы æндæр æмæ æндæр уæлдæр ахуыргæнæндæттæм бацæуыны тыххæй.
Ацы аз Хуссар Ирыстоны Ахуырад æмæ зонады министрадæн рауагъдонты тыххæй рахицæн æрцыд 64 квотæйы. Уыдонæй магистратурæмæ рахицæн чындæуыд æрмæстдæр цыппар бынаты. Ивгъуыд азтимæ абаргæйæ, 2017 азы квотæтæ рахицæн не ‘рцыдысты юриспруденцийæ æмæ таможнæйон хъуыддæгты дæсныйадты тыххæй.
«Сæйраджыдæр квотæтæ уыдысты ахæм дæсныйадты фæдыл: арæзтады техникæ æмæ технологи; социологи æмæ социалон куыст; электроникæ, радиотехникæ æмæ бастдзинады системæтæ; сервис æмæ туризм; ахуырад æмæ педагогон зонæдтæ – специалон (дефектологион) ахуырад; æвзагзонынад æмæ литературæзонынад; физикон культурæ æмæ спорт; аивадзонынад, музыкалон аивад, хуызфыссыныды æмæ прикладон аивады æндæр хуызтæ», – банысан кодта Цыбырты Альдæ.
Уый ма куыд загъта, афтæмæй лимитты паддзахадон заказ арæзт цæуы Хуссар Ирыстоны министрадтæ æмæ ведомствоты бавдыстмæ гæсгæ, уыдон æрбавдисынц иууыл хъæуæгдæр дæсныйадты номхыгъд. Уыцы дæсныйадтæм гæсгæ Хуссар Ирыстоны Ахуырады министрад аразы заказ.
«Ацы аз мах рахицæн кодтам, Культурæйы министрад цы дæсныйæдты номхыгъд æрбавдыста, уыдонæн квотæтæ. Тагъд рæстæджы нæм Хетæгкаты Къостайы номыл паддзахадон драмон театр йæ дуæрттæ кæй байгом кæндзæн, уый тыххæй уыцы дæсныйадтæ ахсджиагæй хъæуынц. Квотæтæ ма райстæуыд Национ иртасынæдты ядерон университетмæ, Мæскуыйы инженерон-физикон институтмæ.
Ахуырад æмæ зонады министрад æмгуыст кæны уæлдæр ахуырады Федералон паддзахадон бюджетон ахуырадон уагдон «Цæгат Кавказы хæххон-металлургион институтимæ (Паддзахадон технологион университет)», афтæ ма Цæгат Ирыстоны Паддзахадон университетимæ дæр, кæцытæ æрвыл аз дæр рахицæн кæнынц квотæтæ нæ рауагъдонты тыххæй», – загъта Цыбырты Альдæ.
Цадæггай цæуы юридикон æмæ экономикон факультеттæй технологон дæсныйæдтæм рахизыны тенденци.
«Уæрæсейы Федерацийы уæлдæр ахуыргæнæндæттæм чи бахауд, уыдоны фæдыл кæройнаг фæстиуджытæ фæбæрæг уыдзысты æрмæстдæр 8-æм августмæ, уæлдæр ахуыргæнæндæтты сайттыл æвæрд куы æрцæуой, чи бахауд, уыдоны тыххæй бардзырдтæ, уæд», – кæронбæттæны банысан кодта Цхуырбаты Альдæ.
Comments are closed, but trackbacks and pingbacks are open.