Æфсæддон патриотикон хайад «Звезда»-йы минæвæрттæ Алексей Моргунов æмæ Александр Иванча нæ Алайнаг епархийы аргъуанæн балæвар кодтой алайнаг епархийы агъоммæ чырыстон литературæйы чингуытæ. Ацы рæдау адæймæгты, Ирыстоны хæлæртты аргъуанмæ æрбакодта Паддзахадон университеты ректор Тедеты Вадим.

Уый куыд радзырдта, уымæ гæсгæ уæрæсейаг хæлæрттимæ базонгæ нæ университеты æфсæддон кафедрæ бакæныны аххосагмæ гæсгæ. Уый фæстæ дæр æнгом ахастытæ уыд семæ, фæндондзинад æвдыстой ноджыдæр Хуссар Ирыстонæн æххуыс бакæнынмæ. Бауынаффæ кодтой алы здæхтыты æмгуыстад кæнынмæ, уыцы нымæцы фадыджы дæр.

«Æмæ абон цы чырыстон литературæйыл фыст чингуытæ æрластой, уыдон сты электронон хуызы дæр. Мæ хъуыдымæ гæсгæ, уыдон фæахъаз уыдзысты чырыстондзинад пропагандæ кæнынæн æмæ нын ахсджиаг цы монон æргъадтæ ис, уыдон дæр æвдыст сты ацы чингуыты.

Махæн ма ахсджиаг у æфсæддон-патриотикон здæхты æмгуыстад кæнын. Уымæн æмæ махæй алчидæр у Хуссар Ирыстоны патриот дæр æмæ Уæрæсейы Федерацийы патриот дæр, мах æнустæм иумæ хъуамæ уæм», — дзырдта Тедеты Вадим.

Фыд Яковы ныхæстæм гæсгæ Алексей Моргуновимæ базонгæйæ сæрысуангæй ссардтой иумиаг позицитæ, иумиаг темæтæ, кæцыты хъæуы бæстон кæнын. «Æфсæддон-патриотикон æмæ динон исадтæ сты Фыдыбæстæ саразыны идея. Уыцы идеяты хъуагдзинад æнкъарæм мах. Историмæ чысыл экскурс куы саразæм, уæд аланты истори, Уырысы историйы бирæ ис чырыстон элементтæ, куыд сыгъдæг æфсæддон къухдариуæггæнджытæ  Дмитри Донской, Александр Невски æмæ æнд.», — дзырдта Яков.

Дарддæр уый радзырдта Мæскуымæ йæ балцы рæстæджы Алексей Моргуновимæ йæ фембæлды тыххæй: «Алексей мæн акодта горæт Воскресенскмæ, уым мын фенын кодта алæмæттаг бынæттæ — аргъуантæ кæм рæзынц, уыдæттæ.

Уым уыд ахæм ныхас дæр — нырыккон иууыл зындгонддæр чырыстон хуыцауы лæг профессор Алексей Осиповæн цы бирæнымæц чингуытæ ис мыхуыр, уыдон балæвар кæнын. Уый махæн, кæй зæгъын æй хъæуы, æхсызгон уыд. Уымæн æмæ Алексей Осипов у зындгонд чырыстон катехизатор, егъау апологет, хуыцауы ныхас тауæг, педагог æмæ публицист, Мæскуыйы монон академийы профессор.

Æмæ уыцы идея абон сæххæст ис», — банысан кодта фыд Яков.

Уыцы чингуытæй фæфылдæр уыдзæн аргъуаны библиотекæ. Самал гæнæн дзы уыдзæн аргъуаны чингуыты дуканиты, иу хай та дзы лæвæрд æрцæудзæн университетæн.

Алексей Моргунов банысан кодта, мораль æмæ хæрзæгъдаудзинад ныртæккæ кæй сты æнæмæнгхъæуæг. Монон хъомыладæн адæймаджы царды ис егъау нысаниуæг. Бындур куынæ уа ацы хъуыддагæн, уæд нæ уыдзæн фидæн дæр.

Алексей банысан кодта Яковы тырнындзинад æмæ аудындзинад аргъуан æмæ адæмы тыххæй пайдайы хъуыддæгтæ аразынмæ. Бузныджы ныхæстæ загъта нæ Республикæйы Президент Тыбылты Леониды номыл, зæгъгæ, уый æмразы у ахæм æмархайдмæ.

Чингуыты фæдыл Моргунов радзырдта, зæгъгæ, уыдон фæрсгæйæ алы адæймаг æнæмæнгдæр сараздзæн йæхицæн удирвæзынгæнæн хатдзæгтæ.

«Тынг мæ фæнды, цæмæй хуссарирыстойнаг адæм, æцæгæйдæр, амондджын уой. Æз уырыссаг адæмы номæй зæгъдзынæн уый, æмæ нын хорз ахаст кæй ис ирон адæммæ — сымахæн ис æнгом бинонтæ, хъæлдзæг сабитæ. Уымæ гæсгæ Ирыстоны рæсугъд æмæ ирд фидæн уæ къухты ис», — банысан кодта Моргунов.

Александр Иванча радзырдта йæ архайды спецификæйы тыххæй, зæгъгæ, хъуамæ цæттæ кæнон хæстонты. «Фæнды мæ, цæмæй фæбæрзонддæр уа дæлхæйтты æфсæддон цæттæдзинад. Уыимæ иумæ хъуамæ монон хъомылад, æндидзынад дæр фæстæ ма зайа. Мо-нон хъомыладæн стыр нысаниуæг ис -. Бирæтæ æхцайы тыххæй хæцынмæ æмæ марынмæ цæуынц дунейы алы къуымтæм, уæлдай сын нæу — кæй æхсынц æмæ кæдæм æхсынц. Уымæн æмæ сæм нæй уырнындзинад, æрмæстдæр сæ уырны æхца. Уымæ гæсгæ нæ разы ахæм хæс æвæрæм — Хуссар Ирыстоны æфсæддон дæлхæйтты æфсæддон цæттæдзинад фæбæрзонддæр кæнын, уый æмрæнхъ монон хъомылад дæр райсын», — дзырдта Иванча.

Алы уырнæг адæймаг дæр зоны, цæмæн цæуы тох кæнынмæ — уымæн ис бинонтæ, ис ын Фыдыбæстæ, адæм, йæ Хуыцау — уыдонæн æндæргæнæн нæй. Уымæ гæсгæ Александр Иванча йæ хæсыл банымадта — схъомыл кæнын адæмы, хæстонты монон йемыдзаг цæттæ адæмæй.

Бузныг æмæ арфæйы ныхæстæ сæ æгæрон лæвары тыххæй ма уазджытæн загъта Фыд Симон дæр.

Къæбулты Маринæ

Comments are closed, but trackbacks and pingbacks are open.