Ног азы бæрæгбон уæлдай уарзондæр у алкæмæндæр. Иууылдæр фæтырнынц, цæмæй сæ Ног азыл сæмбæлой аккагæй. Ног азы цытæн уагъд фæцæуынц алыгъуызон мадзæлттæ. Кæд  нæ республикæйы уагдæттæн сæ фылдæр ногазон мадзæлттæ декабры мæйы кæрон ауадзынц, уæд горæт Цхинвалы Æвзæнгты республикон библиотекæйы кусджытæн, сæ директор Тототы Ленæйы сæргълæудæй, традицион ссис Зæронд Ног азы бæрæгбон цытджын æгъдауæй нысан кæнын, уымæн æмæ нæ фыдæлтæ дæр уæлдай тынгдæр аргъ кодтой Зæронд Ног азæн.

Ныр дæр та уыд афтæ. 11-æм январы Æвзæнгты республикон библиотекæйы уагъд æрцыд бæрæгбонон мадзал Зæронд Ног азы цытæн. Мадзал сорганизаци кодтой Æвзæнгты республикон библиотекæйы кусджытæ сæ директоры сæргълæудæй æмæ Цхинвалы 6-æм астæуккаг скъолайы 5 «б» къласы ахуыргæнинæгтæ, ахуырадон уагдоны хореограф Мæлдзыгаты Фатимæйы къухдариуæгадæй, семæ ма уыд  ахуырадон уагдоны ахуыры хайы сæргълæууæг Дыгъуызты Лианæ дæр.

Мадзалмæ фæуазæг сты РХИ-йы Культурæйы министрады минæвæрттæ ацы министрады библиотекæты куысты фæдыл сæйраг специалист Дриаты Нателæйы сæргълæудæй. Банысан кæнын хъæуы уый дæр, æмæ ацы аз мадзалмæ кæй æрбацыдысты уæлдай фылдæр ныййарджытæ сæ сывæлллæтты арæхстдзинадмæ бакæсынмæ. Библиотекæйы стыр зал уыд бæрæгбонвæлыст. Залы хъуыстысты музыкæйы æхцон зæлтæ. Æрæмбырдуæвджыты цæстæнгас йæхимæ здæхта залы æвæрд рæсугъдвæлыст Назбæлас. Ногазон мадзал байгом кодта уагдоны сæргълæууæг Тототы Ленæ. Уый зæрдæбын арфæтæ ракодта æрæмбырдуæвджытæн, бафæндыд æй уыдонæн царды иууыл хуыздæр фæндиæгтæ. Сымах, зæгъ, стут æвзæнгты библиотекæйы уагъдцæуæг мадзæлтты активон хайадисджытæ æмæ уын æнтыстытæ уæд уæ ахуыры æмæ уый фæстæ та уæ дарддæры царды. Загъта, зæгъгæ, йын тынг æхсызгон у, уыйбæрц ныййарджытæ кæй æрбацыд мадзалмæ, уый. Уæлдай бузныджы ныхæстæ загъта Дыгъуызты Лианæйæн, дæргъвæтин рæстæджы иумæ æнгом куыст кæй кæнынц, уый тыххæй.

Уæдмæ æрæмбырдуæвджыты размæ рахызт Митын чызг (Æлборты Неля). Уый сывæллæтты фæдзурын кодта Митын Дадамæ (Дудайты Арсен). Ногазон арфæтæ зæгъыны фæстæ, уыдон æрцагуырдтой Назбæласы  (Тадтаты Миланæ) æмæ уый дæр сæ фарсмæ балæууыд. Сывæллæттæ аив бакастысты æмдзæвгæтæ. Сывæллæттæн  дзырдтой уыци-уыциутæ æмæ сын уыдон дæр дзуаппытæ лæвæрдтой. Ахуыргæнинæгтæ сæххæст кодтой ногазон зарджытæ, акафыдысты цалдæр кафты. Уæлдай тынгдæр мæ рахицæн кæнын фæнды Чилæхсаты Сергейы. Уый кафгæ-кафын йæ рæзгæ уæнгтæ афтæ рæсугъд айвæзта, йæ къахфындзтыл афтæ аив æркафыд æмæ йæм иууылдæр кæсынтыл фесты. Тынг цымдисон рауад инсценировкæ «Бахъахъхъæнæм удæгас назбæлæсты», зæгъгæ. Цæвиттон Митын Дада æмæ Митын Чызг хъæды куы уыдысты, уæд сæ цурмæ æрбацыдысты дыууæ лæппуйы æд фæрæттæ, цæмæй ракодтаиккой назбæлæстæ. Фæлæ уыдон семæ ауагътой æмбарынгæнæн беседæ, зæгъгæ, цалдæр боны тыххæй цæмæн халæм æрдзы рæсугъддзинад, хуыздæр, зæгъ, у аразгæ назбæлас балхæнын. Лæппутæ дæр сæм байхъуыстой æмæ фæстæмæ аздæхтысты. Сценкæйæн уыд хъомыладон нысаниуæг.  Равдыстой ма ноджы цалдæр сценкæйы.

Ногазон мадзалы уагъд æрцыд лоторея дæр. Гæххæттыл фыстæй номыртæ байуæрстой сывæллæттыл æмæ уыдонæй призон номыртæ кæмæ ра-зынд, уыцы сывæллæттæ райстой ногазон лæвæрттæ. Æмткæй залы уæвæг ахуыргæнинæгтæй алкæцыйы дæр библиотекæйы кусджытæ суазæг кодтой адджинæгтæй. Мадзалы кæрон æрæмбырдуæвджытæ иумæ систой зæрдылдарæн къам.

Банысан кæнын хъæуы уый дæр,  æмæ ахæм мадзæлтты руаджы сывæллæттæ кæй исынц уæлæмхас хъомылад, ахъаз сты сывæллæтты монон рæзтæн. Уадз, не ‘мбæстæгтæй алкæмæндæр, ног 2018 аз амондджын аз фæуæд. Хуыцау зæгъæд, æмæ ахæм рæсугъд мадзæлттæ уадзынхъом цы уæм.

Джиоты Екатеринæ

Comments are closed, but trackbacks and pingbacks are open.