Нæ республикæйы разамынад хъæууон цæрджытæн архайы сæ царды уавæртæ фæхуыздæр кæныныл, кусыны фадæттæ сын аразыныл. Уымæ гæсгæ зæхкусæгон хæдзарадтæ æмæ индивидуалон амалиуæггæнджытæн къаннæг æргътыл фидар æрцыдысты арендæйон фиддонтæ.

Зæххы фадгуытæ æмбæлон куыст кæй нæ цæуынц æмæ сын сæ фиддонтæ арендатортæ рæстæгыл кæй нæ фидынц, уыцы æмæ æндæр фарстытыл, дзырд цыдис, Хицауады Сæрдар Пухаты Эрик цы æмбырд ауагъта, уым.

Æмбырды куысты хайад райстой Хицауады Аппараты къухдариуæггæнæг Гаглойты Олег, РХИ-йы экономикон рæзты министр Кокойты Геннади, йæ хæдивæг Козаты Роин, РХИ-йы хъæууон хæдзарады ми-нистр Пухаты Лев, Юстицийы министр Лалыты Залинæ, сæудæджерад, энергетикæ æмæ транспорты комитеты сæргълæууæг Бекъойты Геннади, афтæ ма горæты æмæ районты хъæууон администрациты сæргълæуджытæ.

Æмбырды хайадисджытæн экономикон рæзты министры хæдивæг Козаты Роин фехъусын кодта, зæгъгæ, зæххы фадгуытæ æмæ кондадон фæзуæттæн арендæйон фиддонтæ къаддæр æргътыл фидыны тыххæй. Республикæ Хуссар Ирыстоны Хицауады Уынаффæ райста 2014 азы 20-æм майы. Уымæ гæсгæ бæлвырд æрцыд кондадон фæ-зуæттæ æмæ зæххы фадгуыты арендæйы минималон аргъ.

Паддзахадон исад æмæ зæххы хъуыддæгты фæдыл паддзахадон Комитеты исады хъусынгæнинагмæ гæсгæ зæххы иу квадратон метры арендæйы аргъ у 10 къапеккæй 75 къапеччы онг, иу мæйы дæргъы. Ахæм ныллæг æргътæй арендатортæ пайда кæнынц æрмæстдæр сæхи пайдайæн, хицæн зæххы фадгуыты субарендæйы стырдæр æргътæм.

Арендатортæ сæхи пайдайæн кæй архайынц, уымæ гæсгæ паддзахадон казнамæ та нæ цæуынц æм-бæлон æхцайы фæрæзтæ, — загъта йæ раныхасы Козаты Роин.

Хицауады Сæрдар Пухаты Эрик банысан кодта арендæйы æргътæм ногæй æркæсыны, афтæ ма дæрд-даг хъæуты цæрджыты арендон фидтонтæй ссæрибар кæныны ахсджиагдзинад.

«Зæхх хъуамæ лæвæрд цæуа ахæм адæймæгтæн, кæцытæ йæ кусынц. Арендатортæ та сæ фиддонтæ хъуамæ фидой хицауады райсгæ уынаффæмæ гæсгæ».

Хицауады уæнгтæ ма æруынаффæ кодтой, æрдзон хъæздыгдзинæдтæ кæм ис (пайдайы къахæггæгтæ, дон, хъæд æмæ æндæр ахæмтæ), уыцы зæххы фадгуыты арендон ахастытæй сисыны, хæдзариуæггæнæг субъекттæ æмæ индивидуалон амалиуæггæнджыты архайды контроль фæтыхджындæр кæныны фарстытыл.

Comments are closed, but trackbacks and pingbacks are open.