Зарæг уыд се ‘мбæлццон

9-æм май – Стыр Фыдыбæстæйон хæсты советон адæмы Уæлахизы бон, кæддæриддæр сæрмагонд бынат ахста æмæ ахсдзæнис нæ адæмы историйы.

Рæстæг цæуы, фæлæ адæмы зæрдæйы ноджы арфдæр уидæгтæ уадзы, Уæлахиз чи æрхастой, уыдоны æнæмæлгæ хъæбатырдзинад. Уыцы Стыр Уæлахиз æнæкæрон циндзинад æрхаста нæ адæмæн дæр æмæ йæ нæ рох кæнынц абон дæр. Уæдæй фæстæмæ ацы бæрæгбон нысан цæуы цытджын æгъдауæй.

Хæсты ветеранты ном ссарыны тыххæй иу ахæм мадзал ауагъд æрцыд нæ горæты 12-æм астæуккаг скъолайы дæр.

Хæст хæст у æмæ йемæ кæд хаста мæлæт, уæддæр-иу хæстонтæн тохы быдыры дæр фæцис аулæфыны фадат æмæ-иу раст уыцы рæстæджы айхъуыст сæ зард. Зарæг сын сæ зæрдæты уагъта ныфс, разæнгард сæ кодта тохмæ. Ацы хъуыддаг бахынцыдтой нæ горæты 12-æм астæуккаг скъолайы ахуыры хайы сæргълæууæг Дзæгъиаты Еленæ, скъолайы зард æмæ кафты кружокты ахуыргæнджытæ Гаглойты Олеся æмæ Габуты Дианæ, сценари æвæрæг ахуыргæнæг Гæджиты Земæ æмæ Стыр Уæлахизы 72 азы сæххæсты боны цытæн бацæттæ кодтой бæрæгбонон концерт.

Концертмæ æрбацыдысты скъолайы ахуыргæнинæгтæ æмæ ахуыргæнджытæ æмæ стыр цымыдисæй бакастысты скъолайы, 5-10 кълæсты ахуыргæнинæгтæ цы концерт бацæттæ кодтой, уымæ. Мадзалмæ хуынд æрцыдысты хæсты ветерантæ дæр цалдæрæй.

Бæрæгбонон концерт цымыдисон уымæй уыд æмæ дзы кæй зæлыдысты сæрибары сæрыл тохмæ сидæг зарджытæ, цæмæй бахъахъхъæной æмæ фервæзын кæной знагæй сæ райгуырæн бæстæ. Æххæст кодтой ирон æмæ уырыссаг кæфтытæ дæр. Зарæгæй зарæджы æхсæн ахуыргæнинæгтæ аив кастысты хæсты темæйыл фыст æмдзæвгæтæ. Ахуыргæнинæгтæ цы хæстон зарджытæ зарыдысты, уыдон   кæд раджы фыст æрцыдысты, уæддæр абон дæр сæ тых нæ фесæфт, сты актуалон. Ныр дæр агайынц адæймаджы зæрдæ æмæ æнæуынондзинад æвзæрын кæнынц знагмæ.

12-æм скъолайы ахуыргæнинæгтæй нæ ферох хæсты рæстæджы мады фæлгондз равдисын дæр. Уыдон дзырдтой, сылгоймаг хæсты рæстæджы куыд стыр фыдæбæттæ æвзæрста, æрбадт, æрынцой йын кæй нал уыдис. Йæ чысыл сывæллæтты хъомыл кæнынæй дарддæр ма стыр уæз, йæ лæмæгъ уæхсджытыл кæй æрæнцад, фронтæн хъуыд æххуыс кæнын æмæ колхозы кодтой удуæлдай куыст, æхсæвыгон та быдтой æрмкъухтæ, цъындатæ æмæ сæ æрвыстой фронтмæ – хæстонтæн. Сылгоймаджы ахæм удуæлдай фыдæбон ахуыргæнинæгтæ равдыстой канд зарæджы нæ, фæлæ ма ирон кафты мады фæлгондз саразгæйæ дæр.

Хæсты темæ сывæллæттæ тынг сæ зæрдæмæ кæй айстой, уый ирдæй зынд сæ алы ралæудæй дæр. Сæ раныхас, сæ зард, сæ кафтыл бæрæг уыдис, сæ зæрдæты сын кæй агайдта. Уыцы æнкъарынад та рахызт мадзалы хайадисджытæн се ‘ппæтмæ дæр.

Ахуыргæнинæгтæн сæ зарджытæ канд хъæбатырæй чи тох кодта, уыдоны тыххæй нæ уыдысты, фæлæ йæ цард йæ адæмы сæрибардзинады тыххæй чи æрхаста уыдоны тыххæй дæр. Æдзард хæстонты номарыны тыххæй ссыгътой цырæгътæ. Ссардтой сын сæ рухс ном æмырæй алæугæйæ. Ахуыргæнинæгтæ хорз цæттæдзинад кæй равдыстой, уый тыххæй ахуыргæнинæгтæ æмæ ахуыргæнджытæн арфæйы ныхæстæ загъта горæты Ветеранты Советы сæрдар Гобозты Æхсар. Йæ цæст сын бауарзта сæ ахуыры хорз фæстиуджытæ æмæ цæмæй хæст макуы феной. Кад кæнын фæразой, уыцы тугкалæн хæсты нæ сæрибардзинады тыххæй чи тох кодтой æмæ сæ цард чи рауæлдай кодтой, уыцы хæстонтæн.

Мадзалы ма ахуыргæнинæгтæ æмæ ахуыргæнджытæн раарфæ кодта скъолайы директор Æрсойты Геннади дæр.

Бестауты Валя