Ирон адæмы буцдзинад Хетæгкаты Леуаны фырт Къоста канд йæ адæмы уарзон хъæбул нæу, уый уарзон ссиc дунейы бирæ бæстæты адæмтæн дæр. Фаг у зæгъынæн уый дæр æмæ йæ уацмыстæ тæлмац кæй æрцыдысты бирæ æвзæгтæм æмæ зонгæ кæнынц йе сфæлдыстадимæ. Фыссæджы сфæлдыстадмæ сæ хъусдард раджы аздæхтой канд Ирыстоны интеллигенцийы минæвæрттæ нæ, фæлæ уымæн æддейæ дæр. Зæгъæм, Гæдиаты Цомахъы куыст хуыйны «Хетæгкаты Къоста – хæххон мæгуыр ирæтты зарæггæнæг», Тототы М. «Хетæгкаты Къоста æмæ йæ дуг», Салæгаты З. «Фольклор Хетæгкаты Къостайы поэзийы», Дзанайты И. «Къостайы поэтикон дæсныйад», Гагкаты К. «Хетæгкаты Къостайы поэзийы æвзаджы æмæ стилистикæйы хиæдтæ», Исаты М. «Къостайы ирон уацмысты фразеологи», А. Малинкин « Хетæгкаты Къостайы поэзи», профессор Л. П. Семенов «Къоста æмæ уырыссаг культурæ», «И. Уткин «Хетæгкаты Къостайы лирикæйы тыххæй», Б.Кандиев «Хетæгкаты Къостайы эстетикон цæстæнгæстæ», М. Шагинян «Хетæгкаты Къостайы публицистикæ», Е. Адельберг «Хетæгкаты Къоста-нывгæнæг», В. Иванов «Ирон фæндыр», П. Павленко «Адæмон хъайтар» æмæ æндæртæ.

   Къостайы æмдзæвгæтæ сты тынг музыкалон æмæ сæм уымæ гæсгæ раджы æрдардтой сæ хъус композитортæ æмæ музыкæйы ахуыргæнджытæ. Уый фæстиуæгæн уыдон иттæг зæрдиагæй зарынц æмæ æххæст кæнынц куыд хæдахуыр, афтæ прфессионалон зарæггæнджытæ. Зæгъæм, композитор Е. Колесников мелодитæ ныффыста ахæм æмдзæвгæтыл, куыд «Скъолайы лæппу», «Фыдуаг», «Кæмæн цы…», «Гино», «Цъиу æмæ сывæллæттæ», «Фæззæг», «Зымæг», «Уасæг», «Æрра фыййау», «Мæгуыры зæрдæ», «Мæгуыры зарæг» æмæ æндæртыл. Афтæ Цæллагты Барис мелоди скодта æмдзæвгæ «Зæрватыкк»-æн, Гæздæнты Рустем – «Уалдзæг»-æн, Кокойты Тæтæрхъан музыкæ ныффыста æм-дзæвгæ «Дзывылдар»-ыл, Алыккаты Ахболат та «Хъуыбады»-йыл. Ирон адæм сæ зæрдæмæ раджы айстой поэты æмдзæвгæтæ æмæ уымæ гæсгæ «Додой», «Салдат», «Фесæф», «Æнæ фиййау», «Æхсины лæг», «Æфсати» зарыдысты сæхи æрхъуыдыгонд мелодитæм гæсгæ æмæ систы адæмон. Уымæй дарддæр ма Къоста кæддæриддæр дзырдта æмæ тох кодта йæ адæмы бартыл æмæ йыл фæллойгæнæг адæм сæхæдæг дæр скодтой зарджытæ. Мæнæ уыдонæй фыццаг зарæджы иу куплет:

     «Тох! Хъæбатыр Къоста.

    Хъæбатыр тох бирæ фæкодтай,

   Ирыстоны цытджын фырт.

   Хæххон фæллойгæнæг адæмы

   Сæрыл, гъей!»

     Иннæ зарæг та райдайы афтæ:

  «Ды, дам, дæ цард куы радтай, ды Къоста,

   Дæ цард куы зæгъынц,

    Хетæджы фырт.

  Ой, æмæ нæ цæхæрцæст Къоста,

  Дæ уарзон Ирæн,

 Дæ мæгуыр адæмæн

  Дæ адæмы фарн æмæ кадæн,

 Ей, ей!»

   Ирыстоны композитор, зарæггæнæг, хормейстер, музыкалон-æхсæнадон архайæг Алыккаты Ахболат бацæттæ кодта поэты æмдзæвгæтæ «Катай», «Сагъæс», «Хъуыбады», «Æфсати», «Додой», «Азар», «Сидзæргæс», «Чи дæ ?», «Фесæф»  æмæ сæ æххæст кæнынц хоры зарæггæнджытæ фортепианоимæ, композитор æмæ музыкалон-æхсæнадон архайæг Гæбæраты Ильяйы романс хуыйны «Джук-дзæбидыр». Композитор, фольклорист, дирижер, педагог, музыкалон-æхсæнадон архайæг Галаты Барис йæ иууыл стырдæр æнтыстыл нымайы кинофильм «Фатимæ»-йы музыкæ, кæцы ныффыста А. Кереселидзеимæ иумæ. Галайы фырт кæддæриддæр сæрмагонд активон æргом здæхта поэты сфæлдыстадмæ. Йæ уац «Къоста æмæ музыкæ»-йы фыста, зæгъгæ, йæ поэзи сомбоны фæлтæрæн уыдзæн хъæздыг хæзнадон, куыд поэттæн, афтæ музыканттæн дæр. Композитор, музыкалон-æхсæнадон архайæг Плиты Христофор æдзухдæр цымыдис кодта ирон литературæйы къласик Хетæгкаты Къостайы сфæлдыстадмæ. Поэты æмдзæвгæтыл композитор ныффыста цалдæр романсы. Поэмæ «Фатимæ»-мæ гæсгæ сфæлдыста оперæ «Ирон фæндыр» æмæ поэты царды цауты фæдыл та ныффыста оперæ «Къоста». Райдианы ацы оперæ уыд иуактон, уый фæстæ йыл композитор ногæй бакуыста æмæ дзы рауад музыкалон-къласикон уацмыс æмæ сси композиторы хуыздæр уацмыстæй сæ иу. Композитор, педагог Хæбæлаты Зинæ Къостайы поэмæ «Фатимæ»-йыл ныффыста оперæ, сывæллæтты хорæн фортепианоимæ «Иуæндæс зарæджы Къостайы æмдзæвгæтыл» æмæ æндæртæ.

   Поэт-зарæггæнæджы æмдзæвгæтыл ма аивадон  æгъдауæй хæрзгъæд уацмыстæ сфæлдыстой композитортæ Ефимцова Людмилæ, Къæбойты Никъала, Поляниченко Александр, Хъаныхъуаты Ларисæ, Карницкая Нинæ, Кокойты Аслан, Кокайты Барис, Хаханты Дудар, Тотиты Андрей æмæ æндæртæ.

                                                               ХУЫБИАТЫ Никъала

Comments are closed, but trackbacks and pingbacks are open.