Фыццæгæм сентябрæй Цхинвалы районы Зары астæуккаг скъола райдыдта хæссын курдиатджын педагог, РХИ-йы Ахуырад æмæ зонады раздæры министр æмæ нæ республикæйы фыццаг Президенты чызг Цыбырты Маринæйы ном.

Уый фæдыл йæ ныхасы рæстæджы цытджын бæрæгбонон линейкæйы банысан кодта РХИ-йы Ахуырад æмæ зонады министры хæдивæг Гаглойты Элиса.

Фыццæгæм сентябры бæрæгбонон мадзалы хайад истой Республикæ Хуссар Ирыстоны Хицауады Сæрдар Пухаты Эрик, РХИ-йы фыццаг Президент Цыбырты Людвиг, Цхинвалы районы администрацийы сæргълæууæг Плиты Алан, афтæ ма ацы хъæуы цæрджытæ æмæ Цыбырты Маринæйы æввахс адæм. «Скъолайæн искæй ном лæвæрд куы æрцæуы, уæд бæрндзинад æвæрд цæуы ахуырадон уагдоныл, уымæн æмæ кæддæриддæр фæхъæуы уыцы адæймаджы рухс ном арын æмæ йæ хъуыды кæнын», – загъта РХИ-йы Ахуырад æмæ зонады министры хæдивæг Гаглойты Элиса. Уый ма банысан кодта, зæгъгæ, скъола кæй ном хæссы, уый рухс номæн кадгæнгæйæ, хъæуы уæлдæр кæнын скъолайы престиж зонындзинæдтæй, цæмæй йын уа фидар бындур. Ууыл та йæ рæстæджы архайдта Цыбырты Маринæ Ахуырад æмæ зонады министрады кусгæйæ. Йæ раныхасы кæрон ма Гаглойты Элиса Зонындзинæдты боны цытæн арфæ ракодта алкæмæн дæр æмæ ахуыргæнинæгтæн йæ цæст бауарзта фидар æнæниздзинад æмæ ахуыры хорз æнты-стытæ.

Пухаты Эрик дæр йæ раныхасы сæрмагондæй банысан кодта, зæгъгæ, ацы скъолайæн Цыбырты Маринæйы ном ратгæйæ, ахуыргæнинæгты æмæ ахуыргæнджыты уæхсчытыл ис стыр бæрндзинад.

«Абон мæ Зонындзинæдты бон сымахæн фæнды зæрдиаг арфæ ракæнын. Скъолайæн мæ зæрдæ зæгъы стыр æнтыстытæ æмæ хæрзиуджытæ. Кæддæриддæр уын ахуырмæ уæт цымыдисдзинад æмæ скъолайæн та –  аккаг ахуыргæнинæгтæ», – загъта Пухаты Эрик.

Цхинвалы районы администрацийы ахуыры хайады гæс Лолоты Барис дæр банысан кодта, Цыбырты Маринæ бирæ кæй нæ ацард, фæлæ йæ фæстæ ныууагъта рæсугъд æмæ райдзаст фæд, хорз æй чи зыдта, уыдоны зæрдæты. «Маринæ уыдис тынг хорз адæймаг. Уыдис рæсугъд, фæлмæн æмæ курдиатджын сылгоймаг. Йæ цард уый снывонд кодта йæ адæмы сæрвæлтау æмæ кæддæриддæр махæн, не ‘ппæтæн дæр уыдис цæвиттойнаг», – загъта Лолоты Барис.

Цыбырты Людвиг мадзалы стыр бузныг загъта ацы хъуыддаджы инициатортæн, йæ чызджы рухс ном ын кæй сæнусон кодтой æмæ фехъусын кодта, Цыбырты Маринæйы номыл Зары хъæуы скъолайы хуыздæр скъоладзауæн ахуыры азы кæрон лæвæрд кæй цæудзæн æхцайы преми. Преми та у 20 мин сомы бæрц.

Comments are closed, but trackbacks and pingbacks are open.