27 – июны Хуссар Ирыстоны паддзахадон университеты уагъд æрцыд журнал «Русское слово в Южной Осетии»-йы 10-æм юбилейон номыры презентаци æмæ ма сфæлдыстадон конкурс «Речевой кодекс вежливости»-йы хайадисджыты хорзæхджын кæныны церемони.
Хуынд сæм æрцыдысты РХИ-йы Ахуырад æмæ зонады министр Гасситы Натали, Россотрудничествойы къухдариуæггæнæг Михаил Степанов, Уæрæсейы Федерацийы минæварад Хуссар Ирыстоны æххæстбарджын минæвары уынаффæгæнæг Сергей Манько, ХИПУ-йы ахуыргæнджытæ, конкурсы фæуæлахизуæвджытæ журнал «Русское слово в Южной Осетии»-йы уацты автортæ æмæ æндæртæ.
Мадзал бацæуæн ныхасæй байгом кодта Уырыссаг æвзаг æмæ литературæйы ахуыргæнджыты ассоциацийы президент, университеты ахуыргæнæг Тедеты Залинæ. Уый æнкъард зæрдæйæ банысан кодта, ирон адæмыл уæззау хабар кæй æрцыдис, Джусойты Нафи не ‘хсæн нал ис, зæгъгæ. Тедеты чызг æрдзырдта адæмон фыссæг æмæ стыр ахуыргонды бирæ лæггæдты тыххæй, стæй йын йæ рухс ном ссардтой иу уысм æдзæмæй алæууынæй. Тедеты чызг ма банысан кодта, зæгъгæ, мах куырыхон хистæры мæлæты хабар куы фехъуыстам, уæд нæ мадзал ауадзыны бон аивын нæ бафæдыдис, фæлæ стæй æрцыдыстæм ахæм хъуыдымæ, зæгъгæ, Нафи та куы фехъуыстаид ахæм мадзал уадзæм, уæд та йын уыдаид æхсызгон æмæ та нæ фарсмæ дæр æрбалæууыдаид. Джусойты Нафи ма уыдис нæ организацийы цытджын уæнг æмæ нæ журналы номыртæй дæр иу сæрмагондæй рауагътам йæ 90 азы юбилейы цытæн, – загъта йæ раныхасы Тедеты Залинæ.
Афтæ ма ноджы æрдзырдта, æппынæдзух сæ фарсмæ куыд лæууыдис æмæ сын цавæр ног хъуыдытæ бацамыдта, æппæт уыдоны тыххæй.
Уырыссаг æвзаг æмæ литературæйы ахуыргæнджыты ассоциацийы президент Тедеты Залинæ ма æрæмбырдуæвджытæн æмæ конкурсы фæуæлахизуæвджытæн бузныджы ныхæстæ загъта ХИПУ-йы ректор Тедеты Вадимы номæй. Уый ис Уæрæсейы Федерацийы кусæгон балцы. Уый фæстæ конкурс «Речевой кодекс вежливости»-йы æмæ æндæр ахæм мадзæлтты фæуæлахизуæвджыты Гасситы Натали æмæ Михаил Степанов схорзæхджын кодтой арфæйы гæххæттытæй æмæ зæрдылдарæн лæвæрттæй. Конкурсы хайад райстой нæ горæты 5-æм, 3-æм скъолаты ахуыргæнинæгтæ, ахуыргæнджытæ, ХИПУ-йы студенттæ æмæ æндæртæ.
Мадзалæн йæ кæронбæттæн хайы та уыдис журнал «Русское слово в Южной Осетии»-йы 10-æм номыры презентаци. Ацы номыры тыххæй дæр Тедеты Залинæ æрдзырдта бæстонæй. Бузныг загъта журналы мыхуырырацæ-уæг автортæн сæ цымыдисон æмæ мидисджын уацты тыххæй.
Журнал «Русское слово в Южной Остетии» уагъд цæуы уырыссаг æвзаг æмæ литературæйы ахуыргæнджыты хъæппæрисæй. Йæ сæйраг редактор у ХИПУ-йы журналистикæйы кафедрæйы сæргълæууæг, РХИ-йы сгуыхт журналист Хъодалаты Хансиат.
Журналы къухдариуæггæнджытæ сты Уырыссаг æвзаг æмæ литературæйы ахуыргæнджыты ассоциацийы президент, ХИПУ-йы уырыссаг æвзаг æмæ литературæйы кафедрæйы сæргълæууæг Тедеты Залинæ, РХИ-йы Ахуырад æмæ зонады министр Гасситы Натали æмæ филологон зонæдты кандидат ХИПУ-йы уырыссаг æмæ фæсарæйнаг литературæйы кафедрæйы доцент Цыбырты Маринæ.
Ацы журналы мыхуыр цæуынц нæ университеты æмæ скъолаты уырыссаг æвзаг æмæ литературæйы ахуыргæнджыты, студентты æмæ æндæрты æрмæджытæ.
Журналы фæрстыл ма бакæсæн вæййы уæрæсейаг ахуыргæндты зонадон куыстытæ дæр, кæцытæ стыр ахъаз кæнынц бынæттон ахуыргæнджытæн æмæ студенттæн.
«Русское слово в Южной Осетии»-йы 10-æм номыры презентацийы æмæ йæ æрмæджыты тыххæй сæ хъуыдытæ æмæ сæ фиппаинæгтæ загътой РХИ-йы Ахуырад æмæ зонады министр Гасситы Натали æмæ ХИПУ-йы уырыссаг æвзаджы кафедрæйы доцент, РХИ-йы уæлдæр скъолайы сгуыхт кусæг Остъаты Джульеттæ æмæ æндæртæ.
Туаты Ларисæ
Comments are closed, but trackbacks and pingbacks are open.