Цхинвалы ныр фæндзæм аз æнтысгæйæ кусы хуыйæн фабрикæ БТК-4. Уый зынгæ ахъаз кæны нæ республикæйы экономикæйы рæзтæн æмæ уæлæмхас куысты бынæттæ саразынæн.
РХИ-йы Хицауады Сæрдар Пухаты Эрик бацыд фабрикæмæ, ныхас кодта куыстуаты разамынад æмæ коллективимæ æмæ сын бузныг загъта сæ æнтысгæ æмæ эффективон куысты тыххæй. Уый азылд кондадон цехтыл, æндæр уæлæмхас хатæнтыл, зонгæ кодта кусджыты куысты уавæртимæ.
«Цавæрфæнды куыстуаты рæзт æмæ архайд дæр кæнгæ сты йæ алы кусæджы фæллойадон архайдæй. Сæ æнæлаз куыст фадат дæтты къухты хуыздæр кæройнаг фæстиуджытæ бафтын кæнынæн. Директор Коцты Хъазбеджы разамындæй æз ам уынын æнгом коллектив æмæ куысты хорз фæстиуæг. БТК-4-йы руаджы нæ республикæйы æмбæстæгтæн фадат ис, стыр куыстмыздимæ нырыккон æмæ комфортон уавæрты кусынæн», – банысан кодта Пухаты Эрик.
Фабрикæйы генералон директор Коцты Хъазбег Хицауады Сæрдарæн радзырдта, абоны бонмæ куыстуаты æппæт æнæ-мæнгхъæуæг уавæртæ арæзт кæй æрцыдысты æнтысгæ куыст кæнынæн, кусджытæ куыд сæ хæдзæрттæм, афтæ сæ хæдзæрттæй дæр ласт цæуынц сæрмагонд автобустыл, кусы дзы хæрæндон æмæ дзы кусджытæ хæрынц æнæаргъæй. «Нæ кусджытæ райгонд сты сæ куыстæй. Бирæтæ дзы, æгæрыстæмæй, сæ куыстмæ рацæуынц улæфтбонты дæр, уымæн æмæ цас бакусой, уымæй кæнгæ у сæ куыстмызд дæр. Уыдон сты квалификациджын кусджытæ, куыст организаци æрцыд æмбæлон æмвæзадыл», – загъта куыстуаты генералон директор.
Кондады хайады хистæр Инна Грунвальд банысан кодта куысты ахадындзинады бæрзонд æмвæзад æмæ цæттæ кæй сты куыстмæ ног кусджытæ райсынмæ.
«Куыст цæуы хорз кусæгон режимы, темптæ сты бæрзонд. Кондад рахызт æххæст хъомысадмæ. Ис ныл стыр план æвæрд æмæ йæ æххæст кæнæм 110 процентæй. Мах кусынмæ исæм æрыгон специалистты. Нæхимæ хонæм технологты, мастерты, хуыйæджы дæсныйад хорз чи зоны, ахæмты, æгæрыстæмæй квалификаци кæмæ нæй, ахæмты дæр. Уыдоны та ахуыр кæнæм бынаты», – радзырдта уый.
РХИ-йы Хицауады
официалон сайт
Comments are closed, but trackbacks and pingbacks are open.