ХИПУ-йы музейон комплексы байгом Уæрæсейы Федерацийы сгуыхт нывгæнæг-портретист, профессор Николай (Никас) Степаны фырт Сафроновы персоналон равдыст «Весна впечатлений», зæгъгæ, ахæм номимæ. Зындгонд нывгæнæгыл хуссарирыстойнаг æмбæстæгтæ, студентон фæсивæд сæмбæлдысты рæдауæй цины æнкъарæнтимæ.
Никас Сафронов у ныры дуджы ахæм нывгæнæг, кæцы аивады къабазы Стыр Уæрæсейы кад хæссы бæрзонд æмæ йе сфæлдыстады хъæздыг ахорæнты руаджы та æнгом кæны дунейы аивадуарзджыты. Зындгонд нывгæнæг арæх Уæрæсейæн æдтейæ дæр сорганизаци кæны йæ равдыстытæ. Никас арæх цæуы балцыты æмæ кусы йæ дæсныйад фæхуыздæр кæныныл, арфдæр ахуыр кæны хуызфыссынад æмæ стыр æхцондзинадимæ амоны йæ куысты сусæгдзинæдтæ дæр мастер-къласты рæстæджы. Йе сфæлдыстадæн ын стыр аргъ кæнынц критиктæ. Уый ма кæны хæрзаудæн архайд дæр. Равдыст гом кæныны церемонимæ æрбацыдысты Республикæ Хуссар Ирыстоны Президент Бибылты Анатоли, аивадæн табугæнджытæ, университеты студенттæ æмæ ахуыргæнджытæ, интеллигенцийы минæвæрттæ.
Цытджын мадзал бацæуæн ныхасæй байгом кодта университеты музейон комплексы сæргълæууæг Хъотайты Еленæ. Уый, фыццаджыдæр, банысан кодта нæ республикæйы æмбæстæгтæн цалдæр боны дæргъы кæй уыдзæнис Никас Сафроновы цымыдисон сфæлдыстадимæ базонгæ уæвыны фадат. Уый ма цыбыртæй æрдзырдта нывгæнæджы цард æмæ сфæлдыстадыл. «Абоны равдысты мах нывгæнæгæн равæрдтам фæндзай нывæй фылдæры бæрц æндæр æмæ æндæр жанрты, кæцыты ирдæй зыны йæ профессионализм. Никасæн ис йæхи сæрмагонд стиль æмæ уымæй йæ нывты экспозици кæны цымыдисондæр», – банысан кодта Хъотайты чызг. Уый ма йæ ныхасы кæрон арфæйы æмæ бузныджы ныхæстæ загъта нывгæнæгæн, кæй нæм фæуазæг ис æмæ нæ йе сфæлдыстадимæ кæй зонгæ кæны, уый тыххæй.
Никас Сафронов, ныхасы рацæугæйæ фыццаджыдæр, банысан кодта Хуссар Ирыстоны æрдзы рæсугъддзинад, афтæ ма ирон адæмы уазæгуарзондзинад, кæй сты æмæ йæ хорзæй кæй суазæг кодтой, уый. «Æз Хуссар Ирыстонмæ æрцыдтæн Бибылты Анатолийы фæхуындмæ гæсгæ. Мах цалдæр азы бæрц стæм зонгæ æмæ нын ис хæларадон ахастытæ нæ кæрæдзимæ. Арæх-иу амбæлдыстæм Мæскуыйы æндæр æмæ æндæр мадзæлтты æмæ-иу йæ ныхасы сæр кæддæриддæр уыдис йæ райгуырæн Хуссар Ирыстоны тыххæй. Абоны равдыст сорганизаци кæныны хъуыддагмæ йе ‘ххуысы къух фæдаргъ кодта Уæрæсейы Федерацийы Хуссар Ирыстоны æххæстбарджын минæвар Гасситы Знауыр æмæ сын зæгъын стыр бузныг.
Фæнды мæ æрцæуын майы мæйы, цæмæй бакусон Хуссар Ирыстонимæ баст куыстыты циклыл, стæй Беслæны трагедийы фæдыл. Æз бацыдтæн Беслæны трагедийы амæттæгты уæлмæрдмæ дæр æмæ сын сæ рухс нæмттæ арыны тыххæй сæвæрдтон дидинджытæ. Ирыстоны хуссары дæр æмæ цæгаты дæр цы уæззау трагедитæ æрцыдис, уыдон сты мах трагедитæ дæр æмæ сыл æз дæр сымахимæ иумæ хъынцъым кæнын.
Мæн уырны æмæ нын дарддæр дæр кæй уыдзæнис хъарм, хæларадон ахастытæ æмæ æмгуыстад кæй кæндзыстæм алыхуызон проектты», – загъта нывгæнæг.
Университеты ректор Тедеты Вадим дæр йæ раныхасы банысан кодта равдысты нысаниуæг нæ адæмы культурон царды æмæ бузныджы ныхæстæ загъта Бибылты Анатоли æмæ Гасситы Знауырæн зындгонд нывгæнæджы кæй æрхуыдтой Хуссар Ирыстонмæ æмæ сын кæй ис йе сфæлдыстадимæ æввахсмæ базонгæ кæныны фадат. «Равдысты байгоммæ мах не ‘ппæт дæр æнхъæлмæ кастыстæм æнæрхъæцæй. Никас Сафроновы куыстытæ федтон интернеты дæр æмæ сты тынг цымыдисон, фæлæ сæ æввахсмæ куы фенай, уæд та сты ноджы ирддæр æмæ цымыдисондæр, лæг сæм кæсынтыл фæвæййы. Ацы равдыстмæ тынг цымыдис кæнынц бирæтæ, алы рæттæй нæм æрбадзурынц, фæнды сæ æрбацæуын. Равдыст аххæсдзæн 21 апрелмæ, бацæуæн æм ис æнæ аргъæй. Равдысты экспозицийы тынг мæ зæрдæмæ фæцыд Джон Ленноны портрет, уымæн æмæ мын уарзон у «Битлз»-ы сфæлдыстад. Стыр цымыдисимæ зонгæ кодтон иннæ нывтимæ дæр», – банысан кодта Тедеты Вадим.
Республикæ Хуссар Ирыстоны Нывгæнджыты цæдисы сæрдар Цхуырбаты Тамерлан дæр йæ коллегæйы æрцыды хъуыддаг банымадта ахсджиаг цауыл. Загъта, зæгъгæ, лæгæй-лæгмæ нæ уыд йемæ зонгæ, фæлæ йын рагæй хъусы йæ ном æмæ йе стыр курдиаты кой. Бузныг загъта мадзалы организатортæн ахæм стыр лæвар кæй бакодтой аивадуарзджытæн æмæ аргъгæнæг кæй уыдзысты зындгонд нывгæнæджы сфæлдыстадæн.
Нывгæнæгæн раарфæ кодта нæ бæстæйы сæргълæууæг Бибылты Анатоли дæр. Уый бузныг загъта Никас Сафроновæн йæ нывты равдыст æмæ йе ‘рцыдæй. «Абон Хуссар Ирыстоны культурон царды æрцыдис ахсджиаг цау æмæ йæ бирæ азты дæргъы сæ зæрдыл дардзысты аивадæн табугæнджытæ. Ахæм зындгонд æмæ курдиатджын нывгæнæг æрласта йæ куыстытæ, цæмæй сæ мах æввахсмæ фенæм æмæ райсæм стыр æхцондзинад. Бузныг дæн мæ хорз æмбалæй, адæймагæй, кæцыимæ фондз азæй фылдæр стæм хæларадон ахастыты», – банысан кодта Президент Бибылты Анатоли. Президент ма бузныджы ныхæстæ загъта Уæрæсейы Федерацийы Хуссар Ирыстоны æххæстбарджын минæвар Гасситы Знауыр æмæ минæварады кусæг Уалыты Зарæйæн, ацы ахсджиаг культурон цау Хуссар Ирыстоны кæй сорганизаци кодтой, уый сæраппонд.
Зынаргъ уазæджы цытæн зарæг «Мой дом» сæххæст кодта университеты вокалон-инструменталон ансамблы солисткæ, курдиатджын зарæггæнæг Хъодалаты Мария æмæ уый фæстæ æппæт студентты номæй бузныджы ныхæстæ загъта Никасæн. Зæрдиаг арфæтимæ ма æрыгон нывгæнджыты номæй ныхасы рацыд нæ горæты сывæллæтты нывгæнæн ахуыргæнæндоны ахуыргæнæг, РХИ-йы сгуыхт нывгæнæг Сабанты Анжелæ. Уый йæхи конд ныв балæвар кодта Никасæн, цыран нывгæнæгæн уыдис йæхи портрет дæр. Дарддæр мадзалы фæлгæтты Никас Сафронов йæхæдæг та дипломтæй схорзæхджын кодта, 2016-æм азы Мæскуыйы æрыгон нывгæнджытæн цы конкурс расидтысты, уый уæлахиздзаутæй нæ горæтæй æртæйы, кæцыты æхсæн фыццаг бынат бацахста Æлборты Аслан.
Мадзалы цытджын æгъдауæй Президент Бибылты Анатоли æмæ Никас Сафронов алыг кодтой сырх лентæ æмæ адæм багуылф кодтой равдыстмæ.
Равдысты æцæгдæр фенæн уыдис зындгонд политиктæ æмæ æхсæнадон архайджыты портреттæ, пейзажтæ, сюрреалистон композицитæ, кæцытæн ныр та аргъгæнæг уыдис ирон публикæ.
Уыцы бон ма Никас Сафронов мастер-къластæ ауагъта Колыты Аксойы номыл аивæдты лицейы ахуыргæнинæгтæн, кæцытæ ныридæгæн тырнынц нывкæныны сусæгдзинæдтимæ базонгæ уæвынмæ.
Цхуырбаты Ларисӕ
Comments are closed, but trackbacks and pingbacks are open.