Мыхуыр æмæ информацийы паддзахадон комитеты пресс-конференцимæ хуынд æрцыдысты РХИ-йы Сæйраг таможнæйы управленийы сæргълæууæг Цхуырбаты Мурат æмæ Хъалонтæ æмæ фиддонты комитеты сæргълæууæг Къацты Владимир.

Таможнæйон æфтиæгтæ рæзынц

Цхуырбаты Мурат куыд радзырдта, афтæмæй ивгъуыд азы кæронмæ Сæйраг таможнæйон управлени бюджетмæ бахаста 196 милуан сомы. Уый та у йæ размæ азтæй 126 милуан сомы фылдæр.

2018 азы таможнæйон æфтиæгтæ кæй фæфылдæр сты, уымæн ахъаз уыд, Ленингоры районы Раздæхæны цы таможнæйон пост фæзынд, уый. Куыд ма хъусын кодтам, афтæмæй ацы бынаты арæныл раздæр цы товартæ ласт цыд Хуссар Ирыстонмæ, уыдон тыххæй хъалон фыст нæ цыд. Пункт бакæныны хъуыддаг та фадат радта продукцийы гъæд æмæ гуырахстыл контроль кæнынæн. Ныр уырдыгæй иттæг хорз æфтиæгтæ цæуын райдыдта, кæд æмæ ныр нæ фæкъуылымпы уа, Гуырдзыстоны цы хæцгæ вирусон низ фæзынд уый аххосæй, уæд. Куыд зонæм, афтæмæй уый фæстиуæгæн æхгæд æрцыд Раздæхæны пост.

Цхуырбаты Мурат куыд загъта, афтæмæй æфтиæгты ахсджиагдæр хай цæуы Рукъы таможнæйон постæй. Рукъы таможнæйон постæй æфтиæгтæ фылдæр кæнынц, нæ республикæмæ ластцæуæг уæзтыл контроль кæй фæтыхджындæр æмæ сæ документацимæ лæмбынæгдæр хъусдард кæй уыд, уый фæстиуæгæн. Амалиуæг-гæнджытæ активондæрæй райдыдтой ласын товартæ республикæмæ. Акциз-тæ цы продукцийæн лæвæрд цæуы, уыдон дæр хорз æфтиæгтæ хæссынц бюджетмæ.

Таможнæйы сæргълæууæг куыд загъта, афтæмæй урæд æрцæуынц контрабандон товартæ дæр. Рукъы таможнæйы урæд æрцыд, тамако æмæ “насвай” чи ласта, ахæм машинæтæ. Гуырдзыстонæй Раздæхæны постыл та хъавыдысты сæны продукци ласынмæ.

Цхуырбаты Мурат ма радзырдта та-можнæйы хъуыддæгты фæдыл ахуыр кæнынмæ Уæрæсейы цы студенттæ уыдысты æмæ ивгъуыд аз Хуссар Ирыстонмæ чи æрæздæхтысты, уыдон ифтонг кæй æрцыдысты куыстæй. Ныртæккæ уыдонæй 5 кусы Раздæхæны таможнæйон посты.

Фыццаг миллиард

Хуссар Ирыстоны Хъалонтæ æмæ фиддонты комитеты сæргълæууæг Къацты Владимир фехъусын кодта республикæйы паддзахадон бюджет фыццаг хатт хи æфтиæгтæй кæй баххæст миллиард сомæй фылдæрæй.

2018 аз махæн уыд иттæг æнтыстджын – бюджетмæ бахастам миллиард сомæй фылдæр. Ацы æнтыст нæ къухы бафтыд нæ бæстæйы Президент æмæ Хицауад комитеты куыстмæ æмбаргæ ахаст кæй дарынц æмæ сæм цы фарстытимæ бацæуæм, уыдон æнæкъуылымпыйæ кæй аскъуыддзаг кæнынц, уый руаджы. Хъалонты органты куыст комкоммæ баст у Хицауады принципиалондзинадыл», – загъта Къацты Владимир.

Хъалонтæ æмæ фиддонты комитеты сæргълæууæг радзырдта комитетмæ æфтиæгтæ, сæйраджыдæр, кæй цæуы æртæ хуыз хъалонтæй:

  1. Уæлæмхас аргъы хъалон кæцы ивгъуыд аз радта 283 милуан сомы.
  2. Хъалон сыгъдæг æфтиагæй, уый та уыд 328 милуан сомы.
  3. Физикон гоймæгтæй æфтиæгтæ 411 милуан сомы.

Афтæмæй комитет иумиагæй бюджетмæ бахаста иу миллиард 48 милуан сомы, планы та уыд иу милиард æмæ 10 милуан сомы.

Къацты Владимир радзырдта, йæ дæлбар уæвæг комитет 2018 азы кæй басгæрста, хъалонтæй йæхи чи иппæрд кæны, ахæм 79 уагдоны. Басгæрсты фæстиуæгæн сбæрæг, уыдон сæхи кæй тылиф кодтой, уый бюджетæн зиан æрхаста 28 милуан сомы.

«Кæцыдæр закъонхалджытæ бафыстой сæ хъалонтæ, иннæты фæдыл дæр цæуы куыст республикæйы барадхъахъхъæнæг органты руаджы. Генералон прокуратурæ уыдоныл бакодта уголовон хъуыддæгтæ», – дзырдта уый.

Афтæ ма Хъалонты комитеты сæргъ-лæууæг радзырдта, уыдон арæх кæй басгарынц республикæмæ медикамент-тæ чи ласы, уыцы фирмæты архайд. «Республикæйы регистрацигонд ис æртæ фирмæ, кæцытæ ласынц ми-дæмæ медикаменттæ. Фæлæ ацы фирмæтæ сæ рæстæджы бадзырдтæ куы арæзтой, уæд сæ хыгъдтæм нæ бахастой хæс цы хъалонты дардтой, уыцы суммæ.

Иу фирмæйы фæдыл мах ауагътам сгарæн мадзæлттæ. Куыд рабæрæг, афтæмæй уый афæдзы дæргъы бюджетмæ хъуамæ бахастаид иу милуан сомы. Аннæты фæдыл дæр ныртæккæ куыст цæуы, февралы мæйы кæронмæ бæрæг æрцæудзæн, уыдон дæр цы суммæ хъуамæ бахæссой бюджетмæ, уый. Развæлгъау информацимæ гæсгæ, уыцы суммæ уыдзæн 10 милуан сомы», – загъта Къацты Владимир.

«Растдон»-æн фæстæмæ аздахдзысты

хъалонты иу хай

Дзидзагуыстгæнæн завод «Растдон»-æн хъалонты иу хай фæстæмæ здæхт æрцæудзæн, уæлæмхас аргъыл хъалоны суммæ. «Растдон» нæ республикæйы кусын райдыдта 2017 азы.

Йæ продукци цæуы «Нæртон» маркæйы бын. Проекты реализацийы рæстæджы уыдон республикæмæ ластой алы-гъуызон арæзтадон æрмæджытæ. Фиддонтæ æмæ хъалонты комитет уыдонæй истой уæлæмхас аргъы хъалон. Ныртæккæ куыстуаты уавæртæ сты къуындæг. Йæ куысты ис къуылымпытæ. Ахæм хъомысадæй нæ кусы, цæмæй систематикон æгъдауæй фида хъалонтæ. Уымæ гæсгæ уæлдæрлæууæг органты хъуыды у ахæм, цæмæй куыстуатæй бюджетмæ цы уæлæмхас аргъы хъалон æрбацыд, уыцы 10 милуан сомы фæстæмæ аздахой», – журналисттæн фехъусын кодта Къацты Владимир .

Уый ма дзырдта, зæгъгæ, кварталы мидæг «Растдон» бафиды хъалонтæ 200-300 мин сомы. Фæлæ уыцы хъалонтæ сты физикон гоймæгтæй æфтиæгтæ. Куыстуатæн проблемæтæ кæй фæзынд, уый тыххæй йын лæвæрд æрцæудзæн фæстæмæ 10 милуан сомы. Фæлæ куыстуат йæ къахыл куы слæууа æмæ куса æххæстгуырахстæй, уæд та ногæй фидын райдайдзæн хъалонтæ æнæхъæнæй.

Комитеты сæргълæууæг рахицæн кодта стырдæр организациты, кæцыты фæрцы 2018 азы фæфылдæр сты хъалонты суммæтæ. Уыдон сты хуыйæн фабрикæ БТК-4 æмæ «Остелеком». БТК-4 бафыста 46 милуан сомы хъалонтæ æмæ «Остелеком» – та – 94 милуан сомы.

Уазæгты Марфа

Comments are closed, but trackbacks and pingbacks are open.